1 SAMUEL 6 - KHYINGEI PU'TLOU Bible (BSI)

Mardingpina Theengkung Heiri Israel Rapnungei Yenmallengpikur

¹ Asinungri Umpuei Mardingpina Theengkung heiwari Philistia rapbei ramra tangla tlun'enibil leiwurkhoula.

² Heirouri Philistia rapni thimi malhetbini Suipipu raple. Thuikhei thim rapya ungyerbine atoubi kyun, “Umpuei Mardingpina Theengkung heiwari kani kousi touserou? Kane koutoubi heiwaya aiyei bira hanui hilmallengserou; kanungei bei shunpilaklo.”

³ Heitounarou yane loukyun, “Kounakpi nane Israel rapbei Dunpuei Mardingpina Theengkungya mallengpirou dawanungri, heiwaya hangwalne mallengpimak, heiya nane heiwaya kalhonne naiyei rasit kuknanungei khrumna put khat kyaone mallenglak. Heiyanungri naiyei knakhi damrou, heitoubi koutounei Aiyei tanti heiwani naidoura norkurro toukhi nani murouwa.”

⁴ Heirouri Philistia rapne loukngai, “Kounaksi khrumna putya kaiyei rasit kuknanungei kane Anungei mallengpiserou?” Heirou yane loushun, “Sina'yei thimi lharap phangatamya naiyei sharungrei heiporthutnei hutlha kyaone, heirou sinayei rpuk'lha phangatamkhi sheemthutlak; heitoubi lharap heiwari Philistiaei Krung khatsollei lha khatsol hoiyerlak; ngamri pharthrai heiwari nai thimirap nammanungle, Krung kantangei dourakhi dawura.

⁵ Heisitoubi nani lharap heiri naiyei sharungra porthutkur heinaksi, heirou naiyei ramra kontumkur rpuklha naksini sheemthutlak; heitoubi nani Israel rapbei Dunpuei thangya mathangrou da; heiyanungri Ane naidourei, naiyei thrai rapbei dourei, heirou nai ramrei leikur tanti heiwaya louthutpikur kya.

⁶ Heiyanungri Egyptbei thimi rapni, heirou Pharaohni yaiyei solungya kalyerkur heinaksine koungamei naiyei solungya kalyerkurrawo? Yayari Ane thuithine noryei kalnungri yane Israel rapya malhetdurbi, yane shaalthutkur nimakko?

⁷ Ngam heineri, asinungri nani hal'kaari ran khat sheembini, heitoubi halputpu tekchakhi bangnamak, chadou pom halpui khintam loubini marshiklaka.

⁸ Heitoubi Umpuei Mardingpina Theengkungya loubine, heitoubi hal'kaari doura khangbaanglaka. Heitoubi heile kalhonne naiyei sheemthutkur sina'yei putchei rapya, naiyei mral kuknanungei khrumna put khoini Anungei mallengpinungei Theengkung khatra marpeilhakbini, heiyei pongra dunlhaklak. Heitoubi hal'kaari heiwaya malhetdurlak, aithukni heisi chawurlakasu.

⁹ Heitoubi hal'kaari heiwaya heithithunglak, kounakpi hal'kaari heine Israelei rikarchunna ram Beth-shemesh lhangra heisi shaalkur hoiyanungri, Umpune kaidoura heinaksi klah'knang dayerbine norkur hoiyura, heiya kounakpi hal'kaari heiwani heilhangra chamakanungri, kani mubomthuklei touri Ane kaya norkurri nimaklei, heisi youknayei knalam hoileime toubine mulaka.”

¹⁰ Heirouri Philistia rapne suipipu raple, thuikhei thim rapbei shunpikur heinaksibil touwurla; heitoubi yani halpui chadou pom khintam loubini, heitoubi kaarira msuikur; heiya yaiyei halshun rapri halshangra msuibine khouthungkur.

¹¹ Heitoubi yani Umpuei Mardingpina Theengkung heiwari hal'kaari doura khangbangthungkur; heirou sina'yei rpuklha raple, porlam knayei sinayei thimi lharap marshiklhakkur Theengkung heiwakhi khangbaangthungkur.

¹² Heisitoubi halpui rapni hal'kaari heiwaya rungmlomni, Beth-shemesh'yei Lamtang thungni, thyarakhi heirou thyoirakhi kalleklhakmakni yengdang tanglouheibi wakur. Heirou Philistia yama-upa rapkhi yaihilla heichanthungbini Beth-shemesh ri'karchunna bi phani wa'tlungkur.

¹³ Kheen heirouri Beth-shemesh'yei thimi rapne phailoura gehu trun lukbini louklei; heirouri yani mangalthutbi louthiyei kheenrouri, Mardingpina Theengkungya loumulhakbi langthoukur.

¹⁴ Heirou hal'kaari heiwari Beth-shemesh cheemkhurrei Joshua'yei phailou tlaira heitanglhakbini, heitoubi thlungtang khatpayei pongra wamathrumkur; heirouri yani hal'kaariyei heengya threbine, heitoubi halpui khintam heiwaya Umpunungei pumni meira hongbini khrumna put khoini makatkur.

¹⁵ Heitoubi Lev rapni Umpuei Mardingpina Theengkung heiwale, sina'yei thimilha raple, rpuk lharap kyao Theengkung heiwakhi khangsundabini, heitoubi thlungtang pongra dunkhoukur. Heitoubi Beth-shemesh'yei thimi rapne heiyei tlainirou Umpunungei khrumna putya meira pumni hongbi makatkur.

¹⁶ Heirouri Philistia rapbei yama krung rapni lhouthuk heiwaya wamulhakhoubi, yane heinihakrou Ekronra hanui kallengurthu.

¹⁷ Philistia rapne yanungei porfletdurnei hutlha khoini sheemthutbi, borh limnei khrumna put khoini Umpunung makatkur sinayei thimilha rapri: Ashdod'nungtlim khatle, Gaza'nungtlim khatle, heirou Ekron'nung tlim khatle;

¹⁸ heitoubi sinayei rpuk lharap heiwari Philistia'yei yama-krung napung phangaei raalpalni kuikoolkur khukarthil raple, yultlai rapbei mshing hilthungni sheemthutkur. Heirou yani Umpuei Mardingpina Theengkung khangbangbi dunkhouna thlungtang heiwari angtu ramphani mu'kna hutlha khoini Beth-shemesh'ra Joshua'yei phailou loumahra leileihui.

¹⁹ Heirouri Umpune Beth-shemesh'yei thimirap thayakhi hatkur, ngamri yani Umpuei Mardingpina Theengkung heiwayei rilla mitni thrilthikur. Heitoubi Ane bi heirou thimi napung somret hatkur; heitounei ngamrou thimi rapni beimakni khi-kanrilni chapkur, ngamri Umpune thimi chungwani hatkur.

²⁰ Heirouri Beth-shemesh'yei thimi rapni kyun, “Anakei khying Dunpu, Umpuei maibongrari huni mayungchangrou? Heirou kairouwei thukkurbi hunungei chathurouwo?”

²¹ Heisitoubi yani thimi malhetbini Kiriath-Jearim'ra paalbi klei thimi rapnungei pao shunkur, “Philistia rapni Umpuei Mardingpina Theengkung heiwaya katmallengpithulame; heineri nani yuchumbini Theengkung heiwaya nanungei yuloubaanglaklo.”