1 SAMUEL 5 - KHYINGEI PU'TLOU Bible (BSI)

Mardingpina Theengkung Lungurnei Umpu Malungkhakur

¹ Heirouri Philistia rapne Dunpuei Mardingpina Theengkungya louheibini, heitoubi Ebenezer'rouweini Ashdod'ra yentlungkur.

² Heirou Philistia rapni Dunpuei Mardingpina Theengkungya louheibini, Dagon thraichim rilla urlhakbi, heitoubi heiwaya Dagon thrailha pongra dunbine khoukur.

³ Heirouri thangei ningshun'nungri Ashdod'yei thimi rapni kanthouwei kheenrouri Dagon thrailha heiwari Umpuei Theengkung maibongra mai sikhuplhakbi kanel'lhakbine louklei. Heisi tounarouri yane Dagon thrai lhaya khulkanthoubine, heitoubi aiyei bira hanui kallengne dunkhoupithu.

⁴ Heiya heithangei ningshun manren yane kanthouyei kheenroukhi, thilak, Dagon thrailha heiwari hanuikhi Umpuei Mardingpina Theengkungei maibongra thleira makhupne kanel'lhakbine louleithu. Heirou Dagon'yei lule, aiyei hutbur khintamrek heiwakhi deekurbine shumtrum lira dabi louklei, heirou aiyei sharung mtum heiwatom maleithungbi bi khatra dabine louklei.

⁵ Heitounei ngamrou Dagon thraiyei suipipu rapnikhi, heirou Dagon thraichimra wachangkhou thimi rapnekhi angtu'rampha Ashdod'rei klei Dagon thraichim shumtrumra ho trumlhak'ngammakne leileihui.

⁶ Heihillouri, Ashdod'le, heiyei karhillei klei thimi rapbei doura Umpune thuithikur tanti piwurbini norkur; heitoubi thimi rapya yaiyei hak'unra mtum-mtum porthutyerbini mrimyerkur.

⁷ Heirou Ashdod'yei thimi rapne thukkur lhouthuk rapya munarouri, yane kyun, “Israel rapbei Dunpuei Mardingpina Theengkung heiwari kaihangra heisi khounungei yamakrou, kouweiyo toulanungri, Aihutdei tanti heiwari kanungei kallachakme, heirou kaiyei Dagon thraiyakhi duine mantrangleime.”

⁸ Heisi toubine yani thimi malhetbini Philistia'yei yama uparap nammaya ungyerkur; heitoubi yani kyun, “Israel rapbei Dunpuei Mardingpina Theengkung heiwari kousi touserouwo?” Heirouri yama upa rapni loukyun, “Israelei Dunpuei Mardingpina Theengkung heiwari Gath'ra urlouheibi theiyurase.” Heisitoubi yani Israellei Dunpuei Mardingpina Theengkung heiwaya theithutbini khoukur.

⁹ Heirouri yani Theengkung heiwaya theithutkur hillouri, Gathyei khukarthil heiwakhi klah'knangne norwurthubi nammani tamungkur. Ngamri Umpuei tanti heiwari khukarthil heiyei doura yongdabi thimi chungwani- douwa, naoshun-naopar rapkhi heirou tara-tartrui rapkhi lhuimakni hitumkur; heisitoubine yaidourakhi rchung porbine mrimyerkur.

¹⁰ Heitounei ngamrou yane Dunpuei Mardingpina Theengkung heiwari Ekron'ra heithulthutkur. Heirou Dunpuei Mardingpina Theengkung heiwani Ekronra wadakur heirouri Ekron'yei thimi rapni ungraochabi loukyun, “Kayakhi heirou kaiyei thimi rapyakhi hatnanungei Israel rapbei Dunpuei Mardingpina Theengkung heiwaya kaileinara heithullhakurame.”

¹¹ Heitounei ngammei yani thimi malhetbini Philistia rapbei yama upa rapya ungyerbini atoubi kyun, “Israellei Dunpuei Mardingpina Theengkung heiwari hilmallengurlaklo; aiyei bira shallurasuei; heiyanungri heiwani kayakhi, heirou kaiyei thimi rapyakhi hiyermakroume.” Kouweiyo toulanungri, khukarthil karyouni tamungurchiya, heirou Dunpuei tanti heiwari beimakne kalleime.

¹² Heitoubi tanti heirouwei himakkur thimi rapyari rchung wayerbi mrimyerwurlei; heirou khukarthil heiyei thimi rapbei klah-mrimnei ungraochabi chapkur heiwari nungthou katokrounakni thimmura.