1 SAMUEL 4 - KHYINGEI PU'TLOU Bible (BSI)

Philistia Rapni Raal Manebi Mardingpina Theengkungya Lungloukur:

¹ Heisitoubi Samuel'ne Israelrap nammanungei tlou shunthutpikur: Asinungri Israel rapni Philistia rapya raal kardourilnanungei raalbomra wathukkur; heitoubi Israel rapni Ebenezerra rungbom sheembini leikur, heirou Philistia rapnekhi Aphek'ra rungbom sheembine leikur.

² Heirouri Philistia rapne Israel rapya karhani kardourilnanungei raalbomra wathukkur. Heirou Israel rapnikhi wathukbini raal kardourilyei kheenrouri, Philistia rapne raal manewurbi, Israel rapbei raalluirap lishing phalli hatdurpi.

³ Heirou raallui rapne rungbomra yenkallengei kheenrouri, Israellei yama upa rapni loukyun, “Koutounei angturi Umpune kaya Philistia rapbei maibongra raal maneyerkurawo? Kane Umpuei Mardingpina Theengkungya Shilohrouwei waloubini kaihangra urbini raal chawase; heiyanungri heiwani kaya kaiyei yeekna thimi rapbei hutrouwei kalproume.”

⁴ Heisitoubi Israel rapne Shiloh'ra thimi heimalhetkur; heitoubi yani bi heirouwei Cherubim tlakra ombini klei Pu Umpuei Mardingpina Theengkung heiwaya wa'urthutloukur. Heirou Eli'yei chanapawa napung'khnikhi, Hophni'le Phinehas'ne bi heirou Dunpuei Mardingpina Theengkungle kalhonne louleinarou pulni wathukkur.

⁵ Heirou Umpuei Mardingpina Theengkung heiwaya rungbomra yenchunglhakkur heirouri, Israelrap nammani hou chouni ungraochakur heirouri thleikhi dir-dir kartlinkur.

⁶ Heirou Philistia rapne chouwei ungraochanei houya mayeknarouri, yani yunkril, “Hebrewa rapbei rungbomra hou choune ungraochakur heiwari kouya mu'knawo?” Heirouri Umpuei Mardingpina Theengkungri yaiyei rungbomra yenlhakurlame touri yane ningmuwurla.

⁷ Heitounei ngamrou Philistia rapri chiwurchiya, ngamri yani yunrilkur, “Dunpuri yaiyei rungbomra yongchangurame.” Heirouri yane yunkril, “Ulleiyo, kari lhawai lahwurame! Bongnungri anaksi lhouri tekchakhi thukthimakhuime.

⁸ Ulleiyo, kari lhawai lahwurame! Huni kayari heinaksi mantrangkur thrai rapbei hutrouwei kalthutpirouwo? Ramthingra Egyptbei thimi rapya pharthrai limlimni chansher dayerkurri heithrai raprime.

⁹ Chimaklo, O Philistia thimirap; lhouwa thukni krakni leiyalo; heinimanungri Hebrewa rapni kaiyei shok hoikhou heinaksini nakhi yaiyei shok khoini leirouwame. Ngam heineri lhouwa thukni krakni leiyalo!”

¹⁰ Heisitoubi Philistia rapni krakni raal kardourilkur; heitoubi Israel rapya raal manikur; heirouri Israel rapbei raallui rapni ai'aiyei cheemra minung-minung truklhakkur. Raalbom heirouri thimi chungni hikur, heirou Israel rapbei hoei raallui rapkhi lishing somthumbil hikur.

¹¹ Heirou Umpuei Mardingpina Theengkung heiwakhi lunglouheila, heirou Eliyei chanapawa napung'khnikhi, Hophnile Phinehas'khi raalbom heirouwei hiyura.

Eli Hikur, Heirou Umpu ei Thang'al Israelrap'rouwei Thukkura:

¹² Heirouri Benjamin cheemkhurei napawa raallui napung-khatni raalbom'rouwei trukthutdurbi, heitoubi aiyei phirulkhi taangcheetdurbi, heirou aiyei lura rahui chaiphangbini heiyei tlaini heihakrou Shiloh'ra yentrukbi hungtlungkur.

¹³ Heirouri ani hungchangei kheenrou, bi heitamrou Elini lampalla omna doura ombini, Dunpuei Mardingpina Theengkung heinung'tlim lhawai klahni kanrilbi karngeibi louklei. Heirouri napawa heiwani khukarthilla hungchangbi pao heiwaya hungtamnarouri, khukarthillei thimirap nammani ungraochani chapkur.

¹⁴ Heirou Elini thimi rapni hou chouni ungraobi chapburnei houya mayeknarouri, ani heikngai, “Thimi rapni ungraochabi chapkurya koutoukurawo?” Heirouri napawa heiwani khnotni hungchangbini Elinung kyun:

¹⁵ Kheen heinungri Eliri kum somkole tako tlungura, heitounei ngamrou aiyei mitlungri yenmehwurbi mit mumakura.

¹⁶ Heirouri napawa heiwani Eli'nung pao heiya shunpikur, “Keiri raalbomrei yenkallengkur thimi khatme, keiri angtuhak raal kardourilna birouwei kartleithutdurbi yentrukme.” Heirouri ani loukngai, “Raalri kousi touwurla, Keichawa?”

¹⁷ Heirouri pao yenmalleng napawa heiwani loumallangbi kyun, “Israel rapri Philistia rapbei maibongrouwei trukurchiyame; heirou raalbomra thimikhi chungwani hithungurame; heirou neiyei chanapawa napung'khni- Hophni'le Phinehas yakhu teinaokhi hithungurame, heirou Dunpuei Mardingpina Theengkung heiwakhi lungthungurlame.”

¹⁸ Heirouri asitoubi thukkura, touri napawa heiwani Dunpuei Mardingpina Theengkungei mintlangkur heirouri Eli'ne aiyei omnarouwei hil-lhangra elni kallangsundawurbi shumtrum lira ngak shukhrip'deekbi hikur; kouweiyo toulanungri, Eli heiri tarachakabi ai'mshakhi beimakni khrit. Heisitoubi ani Israel rapbei doura kum somlibil picharpu khoini paalkhoupi.

Umpu ei Thang'alri Shaalthutdura

¹⁹ Kheen heirouri aiyei mouwi, Phinehas'yei nu heiwiri nao urbine puklum hungtlungura; heirou ane Dunpuei Mardingpina Theengkungya lunglouheinei paole, aiyei mrangwale, heirou aiyei shalwa Phinehas yakhu pachaei hiwurnei paokhi mayekurla; kheen heihakrou aiyei nao puknei manshan nawurbi naopuk waishangurla.

²⁰ Heirou ane hibong'chekrou aiyei naokal hoipikur napuiya heiwine anung shun, “Chimaklo, ukning tangalo; ngamri neiyei naochari napawaleime.” Heiya ane koutloukhi mallangmakne ningmak'karsane louleikur.

²¹ Heirouri ane nao heichaya min ‘Ichabod’ toubine thulpikur, heitoubi ane kyun, “Umpuei thang'alri Israel'rouwei shaalthutdurame,” ngamri Dunpuei Mardingpina Theengkungya lunglouheila, heirou aiyei mrangwale, aiyei shalwakhi hiyura.

²² Heirou ane kyun, “Umpuei thang'alri Israelrap'rouwei shaalthutdura, kouweiyo toulanungri, Dunpuei Mardingpina Theengkungkhi lunglouheila.”