1 SAMUEL 30 - KHYINGEI PU'TLOU Bible (BSI)

David'ne Amalek Rapya Raal Manekur

¹ Heihillouri asitoubi hungthukkura touri, David'le aiyei raallui rapni Ziklag'ra wa'tlungurbi, heirou khyumni tlung tlainirou, Amalekia rapni khate touri Negeb'rale Ziklag'ra raal dakur, heitoubi Ziklag'ya raal maniwurbi, heiwaya meini shutaakkurkhou.

² Heitoubi yani heiyei rilla louklei thimirap nammaya, napuiya, naoshun-naopar rapyakhi heirou tangle-mandi lhuimakni raalman khoini, khatchatomkhi hatmakni mankur; heitoubi yaya ruilouheibi shaalkur.

³ Heirouri David'ne aiyei raallui rapni Ziklag khukarthil heiyei rilla hungchangei kheenrouri, thilak, khukarthil heiwari meini tlengwa kaangtaakkurbini louklei, heirou yaiyei nu-cha rapkhi namyerwa raalman khoini manlouheibini ruiloukur.

⁴ Heisi tounarouri, David'le aiyei thimi rapni hou chouni ungraobi, khruk yenhisundakur ramphani chapkur.

⁵ Kheen heirouri David'yei nu napung'khnikhi touri Jezreel'rei Ahino-am'le, Carmel'rei Nabal'yei trulmeiwi Abigail yakhuntakhi raalman khoini manchokloukur.

⁶ Heiyakhi duinara, David'ri beimakni lhawai lahwura, ngamri thimi rapni ayari thlungni nanghatnanungei yunrilwura; koungameiyo toulanungri, thimi rapni ai'aiyei nu-cha rapnung'tlim beimakni ukningra malungkharilkur. Heiya David'ne aiyei Dunpu, Umpuya ningmalungambi aiyei ukning thoubaangkur.

⁷ Heirouri David'ne Ahimelech'yei chanapawa Suipipu Abiatharya shun, “Kringpibi keinungei Ephod heiwaya bei yenlhakpilo.” Heisi tounarouri Abiathar'ne David'nungei Ephod heiwaya yenlhakpikur.

⁸ Heirou David'ne Umpunung tlou ngaithibi kyun, “Raalluirap heiya keine hulbi chanthungserouko? Heirou keine yaya chanthungbini raal manichangrouko?” Heirouri Umpune anungei mallangbi loushun, “Chanthunglaklo, ngamri nangni yaya manibini, raalman khoini manloukur naiyei nu-cha rapya nangni kalthungkur maniroume.”

⁹ Heisi tounarouri, David'ne, aiyei raallui machathrukle kalhonni chanthungurbi, heitoubi yani Beor kungban yuileina bira wa'tlungkur; heitoubi bi heitamrou thimi thari heileithungkur.

¹⁰ Heiya David'ne aiyei raallui macha phali'le kalhonni yaihilla hulbini chanthungkur; heiya raallui macha'khniri lawachakurbi Beoryei kungban heiralkur manimakurnei ngamrou bi heitamrou heileithungkur.

¹¹ Heirouri yani ramhangei lamrakra Egypt'rei kartlang douwa khat tlakarthangkur, heirou yani aya manbini heitoubi David'nung yenruilhakur; heirouri yani anungei mumtolkhi heirou yuikhi marshikthutbini anungei pishaikur.

¹² Heirou yani anungei khyudheiyei mumtolle, darkha heitaar bomrap thakhi pishaikur; heirouri kartlang douwa heiri sharung beiri katmantrangkur; kouweiyo toulanungri, a heiwari tlaini khyumnile masa khyumnibil koukhatkhi chamaimakkur, heirou yuikhi mongmakni msul-yuikhatni manroubini leiwurkhou.

¹³ Heirou David'ne anungei tlou darbini kngai, “Nangri huei thimiyo? Heitoubi koulhangrei, nimanung kouramreiyo?” Heirou ani loumallangkur, “Keiri Egyptrei kartlang douwa khatme, Amelekia napawa khatdei shok khatme; heirou keiri khyumniyei maibongrei nalhakurnei ngamrou, keiyei cheempu upawani keiya lakkurkhounei hiltobi leithungkur.

¹⁴ Heirou kani Judah'yei ram khate lhangra touri Negeb'ra Cherethia rapyale, Caleb'yei ram khate lhangra raal dawurbi, Ziklag'ya raal maniwurbini meini shutaakkurkhoula.”

¹⁵ Heirouri David'ne anungei shun, “Heiyanungri nangni keiya yaiyei raallui rapbei leina hangra yukruilhakpi manirouko?” Heirouri ani loumallangkur, “Nangni keiyari hatpimakroume, nimanung keiyei cheempuwaei hutra hanui silnapimakroume toubine Dunpuei minra tlou kantomlak, heiyanungri keine neiyari raallui rapbei leinara yukruilhakpirou.”

¹⁶ Heisitoubi ani David'ya yaihangra yukruilhakkur, heirouri thilak, yani Philistia rapbei ram'rouwei, heirou Judah'yei ramrei raal manloubi yenlukheikur putcheirap, heirou raalmankur thimirap yenruiheinei ngamrou ram karyouni chekthutdurbi, chamalip-mongmalipbi, langthouni nuibi louklei.

¹⁷ Heirouri David'ne rawai mehlulapbei kheenrou heirouwei waiyoubini ninga tlainiyei rawai phani yaya raal dawurbi hatkur; heisitoubi kartlang douwa macha phalini ut tungbini trukyulkur nimakni thimi deiri hukhatyakhi lakkhoumakni tlengwa hatdurpi.

¹⁸ Heisitoubi David'ne Amalekia rapbei lukloukur putchei lalthumrap nammale, aiyei nurap napung'khniyakhi lungthungbini kalkur.

¹⁹ Heiya yaiyei putchei-lalthum rapri tangkhi-mandikhi khatchatomkhi karkulmakni, heirou raalman khoini ruiloukur yaiyei chanao rapyakhi hukhatchakhi shuikngam yaomakni kalthungbini, namma yenruimallengkur.

²⁰ Heisitoubi David'ne yaorulrap heirou halrulrap nammakhi lukloubini, aiyei thimi rapbei maibongra louhulyerbi shaalkur; heirou thimi rapni, “Arap nammari David'ne lukloubi yenmallengkur lalthumthilme,” toubi yunrilkur.

Lukloukur Lalthum Rapya Yerkhairilkur

²¹ Heirouri David'ne thimi napung macha-khni lawachakurnei aihilla chanthung manimaknei heileithungurna bi Beor yuileina bira yenkallengei kheenrouri yani David'yale heirou aya kalhonkur thimi rapya murilnanungei wathukbini louklei; heirouri David'ne yaipongra wachangbini yaya karyemnei tlou wabekur.

²² Heirouri David'le kalhonbi chakur khril lhangaimak heirou karsukmak thimi rapni kyun, “Thimirap heiri kakou kalhonbi raal chamaknei ngamrou, yaiyei nu-cha rapya ruilouyerbi shalyerkur nimakneri, kani lungbi yenmallengkur putchei-lalthumrap heiri yanungei koukhatkhi khaipimakrou!”

²³ Heitounei David'ne kyun, “Keitei-keinaorap, Umpune kanungeiyame toubine pikur putchei-lalthum rapya kani heisi toubom thukmakrou. Ane kaya koukhatkhi shuikngam thukyermakni kalpiwurla; heitoubi kaidoura raal dabi lukloukur yeekna raallui rapyakhi kaihutra pilhakwurla.

²⁴ Heisi toulanungri, nai kyunya huni ninglhaknirou? Heiwari hunikhi yanimakrou! Kouweiyo toulanungri, raalbomra chakur raallui rapbei phabomthuk siruk heinakrim, raallei chak-an marpeikhouna bira heileithungkur thimi rapnekhi heisibil siruk chepmalknani phabom thukrou.”

²⁵ Heisi toubine heinirouwei waiyoubi David'ne kulyomei youkna lammit heirou ayil sheemthutdurbi, heirapya Israel rapni angtu rampha heiwaya hilthungni chabi leileihui.

²⁶ Asinungri David'ne Ziklag'ra yenkallengbi, heitoubi ani raallei Amalekia raprei yenmarkumkhei putchei-lalthum rapya aiyei palui-teinao Judah'yei yama upa rapnungei hutthulput khoini manthunbini shunthungkur, “Areisuei, Umpuei yeekna thimi raprouwei lukloukur lalthum rapya nanungei hutthul khoini manthunthunglei!”

²⁷ Heirou David'ne Bethel'ra klei thimi rapnungeikhi, heirou khate lhangrei touri Negeb'rei Ramoth'ra klei thimi rapnungeikhi; heirou Jattir'ra klei thimirap'nungeikhi;

²⁸ heirou Aroer'ra klei thimirap'nungeikhi, heirou Siphmoth'ra klei thimirap'nungeikhi; heirou Eshtemoa'ra klei thimi rapnungeikhi;

²⁹ heirou Racal'ra klei thimi rapnungeikhi, heirou Jerahmeelia rapbei khukarthil rapra klei thimi rapnungeikhi, heirou Kenia rapbei khukarthil rapra klei thimi rapnungeikhi;

³⁰ heirou Hormah'ra klei thimi rapnungeikhi; heirou Bor-Ashan'ra, heirou Athach'rakhi;

³¹ heirou Hebron'ra klei thimi rapnungeikhi; heirou David'le aiyei thimi rapni yenchangkhouna rambi kantangrakhi hutthul khoini heirapya manthunpikur.