1 SAMUEL 27 - KHYINGEI PU'TLOU Bible (BSI)

David'ne Philistia Ramra Trukkur

¹ Heirouri David'ne aitam ukningra ningchabini kyun, “Nungkhatnuiri Saul'yei hutni keiya manbini hatdeirouhui, heineri asinungri keine Philistia ramra trukbini yulkurya duiri lhangai koukhi makrou. Heiyanungri Saul'ne keiyari Israellei ram bi kantangra raphamumakni dongrou; heiyanungri keine aiyei hutrouwei kartleithutrou.”

² Heisitoubi David kanthouwurbi, aiyei raalluirap napung macha'thrukle kalhonni chakur, heitoubi Israellei ramya heiralthutdurbi, Gath'yei krung Maoch'yei chanapawa Achish'yei leinara wakur.

³ Heitoubi David'ne aiyei thimi raple kalhonni Gath'ra Achish'le leimalnakur. Thimi kantangni ai'aiyei nu-cha raple leimalnakur; heirou David'khi aiyei nurap napung'khnile touri Jezreel'rei Ahino-am'le Carmel'rei Nabalyei trulmeiwi Abigail'khi akou leimalnakur.

⁴ Heirou Saul'ne David'ri Gath'ra trukkurame tounei paoya mayekurla, heitounei ngamrou ani Davidya hanui kallengni raphamakura.

⁵ Heirouri David'ne Achish'nung shun, “Asinungri, kounakpi neiyei mit'thrilnara keiya yapilanungri, neiram aei rilla klei khukarthil rapbei hangrouwei khat keinungei khaithutpilaksu; heiyanungri keine heiwayei rilla palleise, ngamri kounungei keine nangle kalhonni neiyei Krungkulla leimalnarouwo?”

⁶ Heisi tounarouri heiyei tlainirou Achish'ne David'nungei Ziklag khukarthilya khaipikur; heitounei ngamrou Ziklag khukarthil heiwari angtu rampha Judah'yei khukarthil khoini leileihui.

⁷ Heirou David'ne Philistia ramra palwurkhou heiri kum khatle tangla tlunphalibil tlungkur.

⁸ Asinungri David'ne aiyei thimi raple kabini Geshuria raple, Girzia'rap heirou Amalekia rapya raal kardourilkur. (Limrap heiri bongei youbi yani ram heirouweini Shur'le Egypt wa'tlung phani palbini louklei.)

⁹ Heirou David'ne ram heiwaya raal dabini ram heiyei thimi napawa-napuiya lhuimakni khatchatomkhi horkhoumakni hatdurpi; heitoubi ani yaorul, halrul, gadha, utrap heirou phirul-phishamb rapkhi namma khumlouheikur, heitoubi ani Achishyei leinara yenkallengkur.

¹⁰ Heirouri Achish'ne loukngai, “Angturi nangri koulhangra raal dawurla?” Heirou David'ne loumallang, “Angturi Judah'yei khate lhangrale Jerahmeelia khate lhangrale heirou Kenia'yei khate lhangra raal dawurla.”

¹¹ Heisitoubi David'ne Gath'ra napawa napung khatchatomkhi, nimanung napuiya napung khatchatomkhi yenruiheinungei khaikhoumakni yertlengwa hatdurpi; kouweiyo toulanungri, “Kounakpi yani paotambi, ‘David'ne kanungei heisibil thuithini toupikur,’ toubine yuntlengrou,” toubine ani ningchakur. Asitoubi David'ne Philistia ramra leiliyenri heisithil toukhou.

¹² Heisi toubine Achish'ne David'ya beimakni malungamkur, heitoubi ani aitam ningchakur, “David'ne aiyei thimi rapya machinyerwurla, ngam heineri, asinungri keine ayari klui naimakni keiyei shok khoini leiyerrou dawa.”