1 SAMUEL 26 - KHYINGEI PU'TLOU Bible (BSI)

David'ne Saul'ya Hanuikhi Hatmakni Lakkurkhou

¹ Heirouri Ziph'rei thimi rapni Saul'yei leinabi Gibe-ah'ra wabini wakyun, “David'ri Jeshimon'yei maishuk lhangra Hachilah lhungdoura yulbini leilei, mumako?”

² Heisitoubi Saul'ne kanthoubi marshikkur, heitoubi Israelyei shireikhei raallui lishing khyum khalthutloubi, yale kalhonni Ziph'yei ramthingra David'ya raphanungei yuchumkur.

³ Heitoubi Saul'ne Jeshimon'yei maishuk lhangra klei Hachilah Lhungdoura, lampalla rungbom sheembini leikur; heiya David'ri ramthingra louklei. Heirouri Saulne ramthingra aihilla chanthungurame touri ani loumuwurla.

⁴ Heitounei David'ne raalmucha thimirap heimalhetkur, ngamri Saul'ri tanghakpani waleime touri ani loumuwurla.

⁵ Heirouri David'ne kanthoubi marshikbini, Saulne rungbom sheembi louleina bira wachangkur; heirouri David'ne, Saul'le aiyei raallui upa, Neryei chanapawa Abner'ne yulbi louleina bi heiwaya mulhakwurla. Heisitoubi Saul'ne rungbom kuikoolna rilla leibi, heitoubi thimi rapni aya karhilni kuiphopbi louklei heiwaya wamukur.

⁶ Heirouri David'ne yunbi, Hittia Ahimelech'le Zeruiah'yei chanapawa Joabei naowa Abishai'nungei heikngai, “Huhuni keikou kalhonni rungbomra Saulyei leinara yurou?” Heirouri Abishai'ne loumallangkur, “Nangle kalhonni kei yurou.”

⁷ Heisitoubi David'le Abishai'ne masanung thimi rapbei leinara yuchangkur; kheen heirouri thilak, Saul'ne rungbomei kuikoolna tlailamra, aiyei raalchei heiwaya lukhangna pongra shunkhoubi ipbini louklei; heitoubi raallui upawa Abner'le raalluirap deineri aya karhilni kuiphopbini louklei.

⁸ Heirouri Abishai'ne David'nung shun, “Angturi Umpune neiyei yeekna thimiya neihutra pilhakurlame; ngam heineri asinungri, nangni yapiyanungri, keine ayari cheipakni khnui tlungni thunmarnulmakni thleira thunmanthanbi hatdureise.”

⁹ Heiya David'ne Abishai'ya loushun, “Tourimakhui, aya hatrimakhui; kouweiyo toulanungri, Umpune khalthutbi shirek teipikur thimiyari huni hatchangrou, aya hat thimi heinungeiri mral hoinamakrouwa?”

¹⁰ David'ne atoubikhi kyun, “Umpune ringleiyenri, ayari Umpune hatrouleiya, nimanungkhi, aiyei hinanungei tlainiri hungeirouhui; nimanung ani raalbomra yuchangbini aitam mangeirouhui.

¹¹ Umpune shirek teipikur Krung heiyari keihut lhangthutbi hatkurtou heiwari Umpune yamakrou; heiya asinungri aiyei lu pongra shunkhoubi klei cheipakle, yuibon heiri heilouheilak, heitoubi kani shallakase.”

¹² Heisitoubi David'ne Saul'yei lu pongra shunkhou cheipakle, yuibon heiwaya louheibi yani shalkur; heiya yani heirapya louheibini shalkur heiwari thimi hukhatnikhi loumuthungmak, heirou mayekkhi loumayekthungmak; heirou ya hukhatkhi mitrak kathukbi louleimak; kouweiyo toulanungri, ya nammani iplhakbi leiwurchi; ngamri Umpune yaya mitchulni iplhakyerkur.

¹³ Heirouri David'ne khatlhang mnakra heiralthutkur, heitoubi yairouwei tlatni pochutdurbi, lhungbung chounara kamayungkur.

¹⁴ Heitoubi David'ne ungraobi thimi rapya, heirou Neryei chanapawa Abnerya yukshun, “Abnerwa, nari loumayekleiko?” Heirouri Abner'ne mallangkur, “Krungya yuk'ung napawa nangya huwo?”

¹⁵ Heisitoubi David'ne Abnerya yukshun, “Nangya lhouwa khat nimako? Israelra neiya duirou thimiri hu leileiyo? Heiyanungri, koutounei nangni neiyei Krungya lhangaini ngaksilpimako? Kouweiyo toulanungri, thimi napung-khatni neiyei Krungya hatnungei wachangurame.

¹⁶ Neitoukur lhou heiwari lhangaimakura. Tanghakpani Umpunekhi mulaksu, nangle neiyei raalluirap namyerwa heiri hibom thukme, ngamri Umpune shirek teipikur naiyei Krungya lhangaini ngaksilpimakura. Heirou asinungri thilak, Krungei lupongra shunkhoukur cheipakle heirou heipongra tombi khoukur yuibonri kourangawo?”

¹⁷ Heirouri Saul'ne David'yei houya louyek manrewurbi ani loukyun, “Awari keichawa David, neiyei hou nimakeiko?” Heirouri David'ne loumallangkur, “Awari keiyei houme, keiyei upawa, Krung!”

¹⁸ Heirou ani asitoubikhi loukyun, “Koungammei keiyei upawani aiyei shokya chanthungbi hulchakurawo? Keine kou touwurkhoula touneiyo? Nimanung keinungei kouklal klei touneiyo?

¹⁹ Ngam heineri, asinungri, kringpibi keiyei upawa Krungni aiyei shokpa keiyei tloulhang rapya louningpilaksu. Kounakpi keidoura karhani Umpune neiya thoulhakbi malungkhayerkur hoiyanungri, khrumna put makatya ani loulhakpilaksu, heiya kounakpi thimi rapni thoulhakpikur hoiyanungri, Umpune yaya mancholaksu! Angturi yani keiyari Umpuei piwurkhou ramra leiyermaknanungei hulthutloula; yani keinungei ‘Chalakalo, thrai dei rapya khrumbini watlhou toulaklo,’ toubine shunpiwurla.

²⁰ Heiyanungri asinung keiya Umpuei bom'rouwei tlatni urthutloubini hiyerpilaklo. Kouweiyo toulanungri, yaachan thimi khatni lhungdoura phaimlung waa hulchakur naksini, Israellei Krungni keiya hatnanungei hulcharou wathukkurame.”

²¹ Heirouri Saulne loukyun, “Keiri neinungei lallurame. Yenkallengalo, Keichawa David; kouweiyo toulanungri, keine neiya koukhi klah dayermaroume, ngamri, angturi keiyei rongchan awari neiyei mit thrilnara beimakni manklu hoiyurame. Thilak, keine neimaibongra yuntlungmakei lhouya touwurkhoula, heirou beimak thuithiyei klalya touwurkhoulame.”

²² Heirou David'ne loumallangbi kyun, “Heithilak, Krungei raal cheipakri awasuei! Asinungri kartlang douwa napung khatni wathukbini kaloulaksu.

²³ Heitoubi Umpune thimi kantangya ai'aiyei tharmu chimni lhoutounei heirou malungamkna lhoutounei klahmanya mallengpilaksu; kouweiyo toulanungri, angtutou tlainirou Umpune neiyari keihutra pilhakkur, heiya Umpune khalthutpibi shirek teipikur Krungya keihut aya lhangthutbini hatnimak.

²⁴ Asinungri thilak, angturi neiyei rongchanri keiyei mit'thrilnara beimakni manklu hoiyurari, heinakrimni keiyei rongchankhi Umpuei mit'thrilnara manklu hoilakasu; heitoubi Ane keiyari klah'knangei bomrap nam'rouwei kalthutpilaksu.”

²⁵ Heirouri Saul'ne David'ya shun, “Keichawa David, nangri likarsui lhangai hoiniyasu. Nangni lhoutang chungwani touthutbini, heirapya lhangaini toumanikur hoiniyasu.” Heisitoubi David'ne aiyei lhoura heisi lamtlabi chakur, heirou Saul'ne aiyei leina bira kallengkur.