1 SAMUEL 25 - KHYINGEI PU'TLOU Bible (BSI)

Samuel Hikur

¹ Heirouri Samuel hiyura, heirou Israel nammani pulni kartilwurbi, Samuel'ya khi-kanrilkur; heitoubi yani Samuel'ya aiyei ram Ramah'ra khi-ruiwurkhou. Heirouri David'ne kanthoubi heirou Paran Ramthing'ranung yuchumkur.

Nabal'le Abigail'ne David'ya Lhouhoipimakur

² Kheen heirouri Maon'rei napawa khatni, Carmel'ra paalbini lal beimak dunni leikhou; aiyei yaori lishing khyum, heirou tlangri lishing khat leikhou. Kheen heirouri ani Carmel'ra yaokhmul ngoubini louklei.

³ Napawa heiwaei minri Nabal toubi ungkhou, heirou aiyei nuwiyei minri Abigail toubi ung. Heirou napuiya heiwiri shingkhei thimi, heirou shakrungkhi lhangai; heiya napawa heiwari beimakni khril thuithi thimi, heirou chorit naimak napawa khat; heirou a heiri Caleb cheemkhurrei thimi.

⁴ David'ne ramthingra shitnrui ramra leiyei kalnung, Nabal'ne yaokhmul ngoubini leileime toubi pao mayeklhakurla.

⁵ Heisi tounarouri David'ne kartlanga napungchip khalthutbini, heitoubi yaya shunmatubi heimalhetkur, “Nane Carmel'ra wabini, heitoubi Nabal'ya yeelthilaka, heitoubi keiyei minra anungei karyemnei tlouya wabepilak.

⁶ Heirou nani, ‘Neiyei rongchan pulchi hoiniyasu, heirou neinungeikhi, neiyei bommainungkhi heirou neiyei dunbi klei putcheirap namanungeikhi kying hoiniyasu.

⁷ Heirou asinungri nangni yaokhmul ngoubini leileime touri keine mayekurla. Neiyei yaosilpi rapni kakou kalhonni leiyei kaalnungri, kani yayari koukhi thuithini toukhoumak, heirou yanikhi Carmel'ra leikhouyeinung yairouwei shuiwurbi maangkur toukhi kouchakhatkhi leikhoumak.

⁸ Neiyei kartlang douwa rapnungei ngaithilak, heirapya yani louyunpirou. Ngam heineri, neiyei kartlang douwa rapni neiyei mit'thrilnara kringpikheiya phalaksu; kouweiyo toulanungri, kani neiyei knei markhulnirou wakurrame; heineri kringpibi neiyei shok rapnungei heirou neiyei chanapawa shakbi klei David'nungei neihutra koukouya leiyanungkhi bei loumalanthutpilaklo,’ toubine washunlaklo.”

⁹ Heisitoubi David'yei shok kartlang douwa rapni wawurbini, heitoubi Davidyei shunmatupikur hilthungni tloulhangrap nammaya, yani Nabal'ya wabini shunpikur; heitoubi yani mayungakkur.

¹⁰ Heiya Nabal'ne loumallangbi David'yei shok rapya loushun, “David touri huwo? Heirou Jesse'yei chanapawa touri huwo? Angtuei chaan arouri ram aei rillari cheempu raprouwei trukthutkur shokri chungwani leiyura.

¹¹ Heiyanungri, keine angtu tlainirou keiyei yaokhmul ngou thimi rapnungei hatbini marshikthutpikur chak-an, yuiding rapya koulhangrei thimi rapbo toukhi mumak thimi rapnungei keine khaipiwurouko?”

¹² Heisi tounarouri David'yei kartlang douwa rapni yaiyei wana lamtlunthungni hanui yenkallengbini hungkur, heitoubi Nabal'ne louyunkur tloulhangrap nammaya anungei hungshunpikur.

¹³ Heirouri David'ne aiyei raallui rapya kyun, “Thimi napung kantangni ai'aiyei raal-shonya shintlakra suimarshiklaka.” Heisi toubine raallui napung kantangni ai'aiyei raal-shonya suimarshikkur. Heitoubi David'nekhi aiyei raal-shonya suimarshikkur, heitoubi raallui napung macha-phlimal David'yei hilla chanthungkur, heirou raallui macha-khnine yaiyei rungbomra chak-an marpeibi khounara chakngakthungkur.

¹⁴ Heiya kartlang douwa rapbei hangrouwei napung khatpani Nabal'yei nu, Abigail'ya shun, “Thilak, David'ne kaiyei cheempu upawanungei lhangai paoya karyemnungei toubi ramthingrei paocha thimirap heimalhetkur, heiya kaiyei upawani yaya loutamlhakkur.

¹⁵ Heisiya hoiyanungkhi yarap heiri kanungei beimakni lhangai thimithil, kayari koukhatkhi thuithini deekbai thukyernungei lhou toukhoumak; kani yakou kalhonni ramthingra leikhouliyenri, kaiyei putchei rapkhi kouchakhatkhi kmang toukhi leikhoumak.

¹⁶ Kheenserrou kani yakou yao silbini leiyeinungkhi, yani kaya masa-nunghang naimakni raalpal naksini lousoupi.

¹⁷ Ngam heineri, asinungri yanungei kousi toupikurni lhangairouwo toubi khalthilaka; kouweiyo toulanungri, kaiyei upawaei doura, heirou aiyei cheemkhur-bommaiyei doura karhani klah'knang dayerna'nungei raangbine leiyurame; ngamri a heiri koukhi karshukmak Belialyei chanapawa naksine thimi hukhatnekhi akou tlou kallangril yamakkura!”

Abigail'ne Chanphabini Rochakur

¹⁸ Heirouri Abigail'ne khnotni marshikbini, mumtol tum macha-khni loubi, heirou darkha yuikhi khang khintamkhi, heitoubi yaoshun phangatamkhi hatbini thungmarshikkur, heitoubi gehu-chimpuk krungkok phangatam, heirou darkhahei bom macha-khatkhi, heirou khyudheiyei mumtol tum macha'khnile toubi marshikbini gadha doura khangbaangpikur.

¹⁹ Heitoubi Abigail'ne aiyei shok douwa khatya shun, “Keiyei maibongra louchalaka, thilak, keine neihilla katchanthungrou.” Heiya napuiya heiwini aiyei shalwanungri koukhi shunthutkhoumak.

²⁰ Heirouri asitoubine thukkura touri, Abigail'ne aiyei gadha tungbini lhungdou kallimra heengya hangra yuchumyeinung, David'khi aiyei raallui rapkou kalhonni aiyei leinara yuchumkur, heisitoubi ani yaya rorilkur.

²¹ Kheen heirouri David'ne loukyun, “Tanghakpani, neishalwa heiyei klei putchei rapya ramhangra kouchakhatkhi mangyermakni ngaksilpikur heiwari koukhatkhi karshukmakkura. Heirou keine anungei lhangaini toupiwurbikhi, aneri keinungei thuithini mallangpiwurla.

²² Heineri, ningshun kulkayei kheenrou Nabal'yei thimi touwei'mkhei napawa napung khatchakhi horkhoumakni hatchangmanungri, Dunpuni David'ya heiyakhi duini thuithini toupiwurlaksu.”

²³ Heirouri Abigail'ne David'ya loumukurle tallengni, aiyei gadha dourei yongchumbini, heitoubi David'yei maibongra thleira mai sikhuplhakbi khrumchakur.

²⁴ Heitoubi ani David'yei hora churphopbini kyun, “Keiyei upawa, keishalwaei lalwurnei mral heiwari keidoura dalakasu. Kringpibi neishok puiyawi keiya neinungei tloulhang khat'khnicha yunyerpilaklo; heirou neishok keiyei tloulhang rapya bei louningpilaklo!

²⁵ Kringpibi keiyei upawani heinaksi karsukmak thimi, Nabalyei tlouya tloukhoini loupimaklo; kouweiyo toulanungri, aiyei minthul heiwale aiyei touthutkur lhou heiwakhi khatnakthilme. Aiyei minri Nabal toubi ung, heiya aiyei touthutkur lhoukhi yuntlungmakei lhouthilme. Heiya upawaei heimalhetkur douwarap heiri keine loumuthungmakurnei toukurame.

²⁶ Ngam heineri, asinungri, keiyei upawani ringleiyenri Umpune tloumayungpi Pu hoiniyasu, touri Umpune neiyari thimi hatrou waiyounarei, heirou neihut hakpani khlang lhakrou waiyounarei khampikur hoinaksini, neiya yeekna thimi rapni heirou keiyei upawaya hatnungei rapha thimi rapkhi, Nabal naksini hoilakasu.

²⁷ Heirou asinungri neiyei shok puiyawi keiyei marshikbi heilhakkur hutthul putcheirap awaya keiyei upawakou kalhonkur kartlang douwa rapnungei bei malanpiyeise, yapibi loulhakpilaklo.

²⁸ Kringpibi neiyei shok puiyawi keiyei klalya bei kukpilaklo; kouweiyo toulanungri, Umpune keiyei upawaei Krungbom heiri pulchini thrungyerpirou; ngamri upawani Umpunung'tlim raalbomya kardourillei; heineri neiyei chaan khatrekrou lhangaimakri neidoura muphamakrou.

²⁹ Thimi hukounak khatni neiya hatnanungei hulchabikhi, keiyei upawaei rongchanri neiyei Dunpu, Umpuei hutra khringni koukhatkhi shuikngam leiyermakni lhangaini khoupirou. Heiya neiyei yeekna thimi rapyari putnarei chiyailung shaithutkur heinakni ani khingthutdurou.

³⁰ Heirouri asitoubi hungthukeirou touri Umpune keiyei upawaei ngamrou shunthutdurkhou hilthungni, Ane neinungei lhangaiya toupiwurbi, heitoubi neiyari Israel rapbei doura Krung khoini khalthutpirou.

³¹ Heiyanungri heiwani keiyei upawaei solungra nungwaimakni malungkhabi leibom thukmakrou, heirou heiwani mralmak thimi rapya hatbini, heiyei khlang lhaknungei bomkhi thukmakrou. Umpune keiyei upawaya kalpiyei kheenrou, neiyei shok puiyawi keiyakhi bei ningthutpilaklo.”

³² Heirouri David'ne Abigail'nung shun, “Keiya murilnanungei neiya heimalhetpikur Israel rapbei Dunpu, Umpuri likarsui lhangai hoiniyasu;

³³ heirou neiyei yu-cha rapkhi likarsui lhangai hoilaksu; heirou angtu tlainirou keine thimi hatbini khlang lhakrou younarei khampikur neiyakhi Dunpuni phorpi hoiniyasu.

³⁴ Heisiyanungkhi, keine neiya hatnungei marshiknarei keihutya khampikur Israellei Dunpu, Umpune tloumayungpi Pu hoiniyasu; kouweiyo toulanungri, tanghakpa nangni keiyei leinara khnotni wabi murilmanungri, nungwaar'bongnung Nabal'yei cheemra napawa khatchatomkhi horkhoumakni hatdurpilarou.”

³⁵ Heisitoubi David'ne Abigail'yei hutrouwei aiyei heimarshikpikur hutthulput rapya louloulhakur, heitoubi ani Abigail'nung loukyun, “Neicheemra malungdamni hunglaka. Thilak, neiyei shunchakurya keine ninglhakbi, heirapya neinungei keine yapiwurla.”

Nabal Hikur

³⁶ Heisitoubi Abigail'ne Nabal'yei leinara hungkur, heirouri thilak, Nabal'ri aiyei cheemra krungnakni knei markhulbini louklei. Heirouri Nabal'yei solungri langthoubi nungkngaini leiyura, kouweiyo toulanungri, ari tul malipbura; heitounei ngamrou Abigailne anungei ningshun nungwarbongyenri koutlou khatkhi yunpimakura.

³⁷ Heiya ningshunei kheenrouri asitoubine hungthukkura, Nabalni tul malipnarei katsingkur heirouri aiyei nu Abigail'ne anungei tlourap nammaya shunthutpikur. Heirouri aiyei ukningra chitekwurbi thlungtumnakni shakchachangmakni leikur.

³⁸ Heitoubi tlaini chipniyeimal hillouri, Umpune Nabal'ya umtluiwurbi Nabal hikur.

David'ne Abigail'ya Nu Khoini Klou

³⁹ Heirouri David'ne Nabal hiyurame toubi pao mayeknarouri, ani kyun, “Nabal'yei maibongra rikrai phawurnei laltulya shingpikur Umpuya chouni mathangkur hoiniyasu; kouweiyo toulanungri, Aiyei shok keine lhangaimak lhou tourou younarei Ane keiya khampiwurla. Heirou Umpune Nabalyakhi aiyei lhangaimak lhou touwurkhounei klah'man heiwari aiyei lura yongdayerwurla.” Heirouri David'ne thimi heimalhetbini Abigailya aiyei nu hoinanungei wangaithiyerkur.

⁴⁰ Heisitoubi David'yei shok rapni Abigail'yei leina bi Carmel'ra wa'tlungbi, heitoubi yani anungei, “David'ne kaya neiyei leinaranung heiyilkurme, ngamri neiyari aiyei nu khoini ruirou toubi wakurame,” toubine wakyun.

⁴¹ Heirouri Abigail'ne loukanthoubi, heitoubi aiyei mairung thleira sikhuplhakbini khrumkur; heitoubi ani loukyun, “Thilak, naiyei shok-napuiyawi keiri keiyei upawaei shok rapbei hoya choumthaipinungei marshikkurame.”

⁴² Heirouri Abigail'ne gadha tungbaangbini, aya wattoupi shok-napuiya napung phangale kalhonbini, David'yei nulampu rapya chanthungbi wabini aiyei nu hoikur.

⁴³ David'ne Jezreel ramrei Abino-am'yakhi nu khoini loukur, heisitoubi ya napung'khnirekpa aiyei nu hoikur.

⁴⁴ Kheen heirouri Saul'ne David'yei nu hoikhou aiyei chanapuiya Michal'ya Gallim ramrei Laish'yei chanapawa Palti'nungei nu khoini pikur.