1 SAMUEL 24 - KHYINGEI PU'TLOU Bible (BSI)

David'ne Saul'ya Hatpimakni Lakkurkhou

¹ Kheen heirouri Saul'ne Philistia rapya raal hulthungnarei yenkallengei kaalnung, anungei pao khat, “Thilak, David'ne En-gedi'yei Ramthingra yulbini leiyurame,” toubine loushunpikur.

² Heirouri Saul'ne Israel'rap nam'rouwei raallui lishing khyum khalthutbini, heitoubi David'le, aiyei raallui rapya raphana'nungei ‘Yrao rapbei raanchana thlungkhan’ toubi mu'kna ramhangra wakur.

³ Heirouri ani yaosilna bira wa'tlungkur, heitoubi bi heirou thlungpur khat louklei; heirouri Saulne heiwayei rilla mathrilnanungei wachangkur. Kheen heirouri Davidle aiyei raallui rapkhi thlungpur heiyei rillei bomthora yulbini louklei.

⁴ Heirouri David'yei raallui rapni anungei shun, “Thilak, ‘Keine neiyei yeekna thimiya neihutra pilhakroume,’ toubi Umpune neinungei shunpiwurkhou tlaini heiwari angtu ariyame, heineri neiyei toukni hilthungni nangni anungei toulaka.” Heirouri David'ne kanthoubi Saulyei linglik chulna msurya muni dintatloukur.

⁵ Heirou David'ne Saul'yei linglik chulwa msurya dintatloukur hillouri, aiyei ukningra ningthutbini malung thrammakura.

⁶ Heisi tounarouri ani aiyei thimi rapnung shun, “Keine keiyei Upawanung heinaksi lhouya toukur heiri toubom thukmak, Umpune yanimakei lhou; kouweiyo toulanungri, a heiri Umpuei shirek teipikur thimi khat; heinaksi Umpune shirek teipikur thimi khatya karhani lhou toukur heiri chimmakura.”

⁷ Heisitoubi David'ne heinaksi tloulhang rapya yunbini aiyei thimi rapya shunchakur, heitoubi yaya Saul'lei doura karhani raal damaknanungei shunkhamkur. Heirouri Saul'ne kanthoubi thlungpurya lakkurkhoubini bi deiranungei yani chakur.

⁸ Heirouri David'nekhi thlungpur'rouwei wathukurbi, heitoubi Saul'yei hilla ungraochani, “O Keiyei upa, keiyei Krung!” toubi yunbini hei-ungthungkur. Heirouri Saul'ne aiyei hil-lhangra loukallekbi thinarouri, David'ne thleira aiyei mai sikhuplhakbi, heitoubi Saul'ya loukhrumkur.

⁹ Heitoubi David'ne Saul'nung shun, “Kounungei thimi rapni, ‘David'ne neiya hatnungei raphaleime,’ toubi kyun tlou rapya nangni ninglhakbi malungamkuro?

¹⁰ Thilak, angtuhak neimit rungrungni muwurla, touri Umpune neiyei rongchanya thlungpur rilla hatnanungei keihutra pilhakurla, heirou raalluirap thanikhi keihutni neiyari hatdurlaklo toubikhi shunkur, heiya keiyei mit'thrilnarari neiya kringpikur; heirou keine kyun, ‘Keiyei upawaei doura karhani keihut lhangthutbini hatmakrou; kouweiyo toulanungri, a heiri Umpuei shirek teipikur Krung khatme.’

¹¹ Heiyakhi duinara keiyei pashak Krung, asinungri, keiyei hutrei shinbi klei neiyei linglikchul msurcha awaya heithilaklo! Kouweiyo toulanungri, keine neiyei linglik chulna msurya dintatlouei kheenrou keine neiya hatdurkhou kya, heiya hatpimakni lakurkhoupi; awanekhi mupilak, heirou nangni yukningthutthilak touri keine neiya hatnanungei lhangaimak koukhi toumak, heirou neiya karhani raal kyoukhi toumak; heirou nangni keiya hatnanungei rangbi hulchalanungkhi, keiri neiya karhani koukhi borh lhou toukhoumakme.

¹² Umpune kakhuntayei tlakra pichar toupilaksu, heirou Umpune neidoura keiya khlang lhaklaksu; heiya keihutneri neiya karhani lhangaimakei lhouri koukhi toukhoumakrou.

¹³ Heirou bongei louyoukna yailim tloura kyun heinaksini, ‘Khril-lhangaimak ukningrei lhangaimak lhou kathuk,’ heiya keihutneri neidoura karhani lhou toukhoumakrou.

¹⁴ Israellei Krungni huihilla heichanthungo? Heirou nangri huya hulchakurawo? Khi-ui khatya hulchakurako? Nimanung tranya hulchakurako?

¹⁵ Ngam heineri Umpune Picharpu hoipibi, kakhuntayei tlakra pichar toupilaksu; heitoubi Ane keidoura chim-klal thilhakpilaksu, heirouri keiya neihutrouwei kalthutpirou.”

¹⁶ Heirou David'ne tloulhangrap heiya Saul'nung heiyunchikur hillouri, Saul'ne loukngai, “Awaya keicha David neiyei houko?” Heirouri Saul'ne hou chouni ungraobini chapkur.

¹⁷ Heitoubi ani David'ya kyun, “Nangri keiyakhi duini tharmu chimmurame; kouweiyo toulanungri, keine neiya thuithini mareknabi lhangaimakni toupiwurlanungkhi, nangniri keiya lhangaini toupiwurlame.

¹⁸ Angtu tlainirou ‘Nangni keinungei lhangaiya toupiwurlame,’ toubine shunthutdurla; heirou Umpune keiyari neihutra pilhakwurbikhi, nangniri keiya hatpimakni horkhouwurlame.

¹⁹ Kouweiyo toulanungri, ‘Kounakpi thimi hukounak khatni aiyei yeekna thimiya karthanglanungri, ani heiwaya hangwalni lakkhourouko?’ Ngam heineri, angtu tlainirou nangni keinungei lhangaini toupiwurnei ngam heinung'tlim, Umpune neinungei klah-man tangni mallengpilaksu.

²⁰ Asinungri thilak, keine muwurla, touri nangri Krung hoirouwa, heirou Israellei Krungbom heiwari neihutrouwei phunbangrouwa.

²¹ Heineri, asinung Umpuei minra keinungei kantomlak, touri keine hiwurhillouri keiyei yu-cha rapya nangni toumangpi'makrou, heirou nangni keiyei minya kai pawaei minlam'rouwei louthutdurmakroume toubine yunkhoulaklo.”

²² Heirouri David'ne Saul'nung tlou kantomkur. Heitoubi Saul'ne aicheemra shalkur, heiya David'ne aiyei raallui raple kalhonni raalpal kuikoolna rungbom rilla kallenglhakur.