1 SAMUEL 23 - KHYINGEI PU'TLOU Bible (BSI)

David'ne Keilayei Thimi Rapya Kalpikur

¹ Heirouri yaihangrei thimi hukounak khatni David'nung, “Thilak, Philistia rapne Keilah'yei thimi rapya raal dabi kardourillura, heitoubi yaiyei trunwaiyei lung lukmallongkhou nammakhi yani mulouheila” pao shunpikur.

² Heisi tounarouri David'ne Umpunung tlou loubini ngaithikur, “Keine chabini, Philistia rapya raal kardouserouko?” Heirouri Umpune David'nung loushunkur, “Chawalo, heitoubi Philistia rapbei doura raal dabini, Keilaya kalpilak.”

³ Heiya David'yei raallui rapni David'ya shun, “Thilak, kani Judah'ra klei awayakhi beimakni chi'kna, heiya kani Keilara Philistia'yei raallui rapbei leinara wachangbi raal kardourillou heiwanidui chinamakrouko?”

⁴ Heirouri David'ne hanui kallengni Umpunung tlou loubini ngaithikur, heirouri Umpune anungei loushunpithu, “Kanthoubini Keila'ra yuwalo; kouweiyo toulanungri, Keine Philistia rapya neihutra pilhakrou.”

⁵ Heisitoubi David'le aiyei raallui rapni Keila'ra yubini, Philistia raple raal kardourilkur; heitoubi ani yaiyei halrul-yaorulrap nammaya markumloubini, heitoubi Philistia rapya chungwani hatdurpi. Heisitoubi David'ne Keilayei thimi rapya kalpikur.

⁶ Asinungri asitoubine thukkura touri, Ahimelech'yei chanapawa Abiathar'ne Keila'ra Davidyei leinara yukrukyei kheenrou, aiyei hutra ephod linglik khatkhi yukshinheikur.

Saul'ne David'ya Hulbini Chanthungkur

⁷ Asinungri David heiri Keilara yuchangurame tounei pao heiwari Saulnungei shunpiwurla; heirouri Saul'ne kyun, “Dunpuni Davidyari keihutra pilhakurla; kouweiyo toulanungri, a heiri palshung shumtrum lhangaina heirou raalpal lhangaini kuikoolkur khukarthillei rilla wachangbini leiyura.”

⁸ Heirouri Saul'ne raalluirap nammaya ungmarkumbini, heitoubi raal younanungei marshikkura; heirou Keilara yubini David'le aiyei thimi rapya yumannanungei chay piwurla.

⁹ Kheen heirouri David'ri Saul'ne aya hatnanungei rangurame touri ani muwurla; heitounei ngamrou ani Suipipu Abiathar'nung shun, “Puwatlhouwei linglik ephod heiwari keinungei yenlhaklak.”

¹⁰ Heirouri David'ne shun, “O Umpu, Israellei Dunpu! Saulne keiyei ngamrou yukraphabi Keilayei khukarthilla yuchangbini toumangrouwame touri Neiyei shok keine mayekurla.

¹¹ Keilayei thimi rapni keiyari aihutra pilhakrou waiyouleiko? Neiyei shok keiyei mayekkur heinakni, Saul'ne keilara yurou youleiko? O Umpu, Israellei Dunpu; kringpibi Neiyei shok keinungei shunpilaklo.” Heirouri Umpune loushunpikur, “Ari shuimakni yurou leiyurame.”

¹² Heirouri David'ne kyun, “Heiyanungri Keilayei thimi rapni keiyale keiyei raallui rapyari Saulyei hutra pilhakrouko?” Heirouri Umpune loushunkur, “Yane neiyari shuimakni aihutra silnarouwa.”

¹³ Heirouri Davidle aiyei thimirap macha thrukeimal heiri, kanthouwurbi heirou yani Keila'rouwei shalthutkur, heitoubi yani chachangeimkhei ram tlatnara loutrukur. Heirou David'ri Keila'rouwei trukyullurame tounei pao heiwari Saulnungei shunpikur heirouri, ani chanthungmakni dongthungkur.

¹⁴ Heisitoubi David'ne Ziphbei Lhungdou ram Ramthingra rungbom raalpal sheembini heiyei rilla leikur. Heiya Saul'ne tlainiserrou aya rapha-holphakur, heiya Dunpuni David'yari aiyei hutra dayermakur.

Saul'ne David'ya Hulchakur

¹⁵ Kheen heirouri Saul'ne aya hatnanungei karyomni raphawurame touri David'ne mulhakurla. Kheen heirouri David'ri Ziphbei Ramthingei Horesh heengyao hangra yulbini leikur.

¹⁶ Heirou Saul'yei chanapawa Jonathan'ne kanthoubi heirou Horesh heengyao hangra David'yei leinara wakur, heitoubi Dunpuei minra aiyei ukning thoubangpikur.

¹⁷ Heirou ani David'nung asitoubi shun, “Nangri chimaklo, kouweiyo toulanungri, kai pawa Saulne neiya hatchangmakrou. Nangni Israel rapbei doura Krung hoiheirou, heitoubi keine neithangra pu khoini leirou; heirou tloubom awari kai pawa Saul'nekhi kmu.”

¹⁸ Heisitoubi yakhuntani Umpuei maibongra tloukhat kantomrilbi mardingrilkur; heitoubi Jonathan'ne aicheemra shaalkurle, David'ri Horesh'yei heengyao hangra heileithungkur.

¹⁹ Heirouri Ziphbei thimi rapni Gibe-ah'ra kabini Saul'nung asitoubi shunpikur, “David'ri kakou kalhonni, Hachilah Lhungdouwei, Jeshimon'rei khate lhangra klei Horesh heengyao hangei raalpal lhangaina rilla yulbi kleime touri mumakko?

²⁰ Heineri asinungri, O Krung, neiyei kning hilthungni yuchumlaklo, heitoubi kanikhi kaiyei manicha hilthungni aya neihutra pilhaknanungei loutrungpiroume.”

²¹ Heirou Saul'ne loushun, “Nane keinungei pao shunpiwurnei ngamrou, Umpune naya kringpilaksu.

²² Heineri nari hunglaka, heitoubi nani khminni thiphabini, aiyei leinabi hochunhil heiwaya kanre-kandangni raphathutlaka, heitoubi huni aya mulhakuro toukhi mulaka; kouweiyo toulanungri, a heiri beimakni sireikheime touri keine mayeklei.

²³ Heineri, aiyei louleina bi rapya raphathutlaka; heitoubi keinungei bi knaini pao shunpithulak, heiyanungri keine nakou kalhonni wabi rapharou; heirou kounakpi ani bi heitamrou louleithanganungri, Judah'yei thimi rapbei hangra karyouni raphabi keine aya manrou.”

²⁴ Heirouri yani kanthouwurbi Saul'ne wa'tlung'bongnung louchawurbi Ziph'ra wakur. Heiya kheen heinungri David'le aiyei thimi rapri Maon'yei Ramthingra, Jeshimon'yei khate lhangei Arabah'ra louleiyura.

²⁵ Saul'ne aiyei raallui raple kalhonni David'ya rapharou wayeinungri, yani David'ya pao loushunpikur; heitounei ngamrou David'ne Maon'yei Ramthingra yuchumwurbi, heitoubi thlungkhan hangra yulbini leikur. Heirou Saul'ne heiyei paoya mayekkurbi, ani David'ya Maon'yei Ramthingra hulbini chanthungkur.

²⁶ Heirouri Saul'ne Lhungdou khatlhang mnakra wayeinung, heirou David'le aiyei raallui rapni lhungdou khatlhang mnakra louchakur; heisitoubi David'ne khnotni toubi Saulyei hutrouwei truk-kartleikur. Ngamri Saul'le aiyei raallui rapni David'le aiyei raallui rapya hulmannanungei kuikoolbi leikur.

²⁷ Heiya pao-ur thimi napung-khatni Saul'nung wabini atoubi washunpikur, “Khrangtoubi hungalo! Ngamri Philistia rapni kaiyei ramra raal dawurame.”

²⁸ Heisi tounarouri Saul'ne David'ya hulbini chanthungnarei kallengurbini, Philistia rapya raal kardourilnungei hungkur; heitounei ngamrou rambi heiwaya yani “Kartleiwurna Thlungkhan” toubine thulkur.

²⁹ Heirouri David'ne thlungkhan heirouwei kathukwurbini, heitoubi En-gedi'yei raalpal rilla leikur.