1 SAMUEL 21 - KHYINGEI PU'TLOU Bible (BSI)

David'ne Nob'ra Ahimelech'ya Wamuril

¹ Heirouri David'ne Nob'ra wabini Suipipu Ahimelech'ya murilkur; heirou Ahimelech'ne David'ya loumunarouri beimakni chiwura, heitounei ani loukngai, “Koutounei thimi dei hukhatkhi yaomakni neitamtom wakurawo?”

² Heirouri David'ne Suipipu Ahimelech'nung loukyun, “Krungni keiya lhoubom khatnungei watyilbini atoubi shun, ‘Keine neiya watyilnei lhoubom awaei ngamrou thimidei hukhatyakhi muyernungei yamak, heirou keiyei chay pikur awakhi thimi deiya mayekyernungei yamak,’ toubi shunthungme. Heitounei ngamrou keine kartlang douwa rapya shunmatubi, bi khatra keiya murilnanungei marshikbi wakurame.

³ Heineri, asinungri neihutra koukou leileiyo? Keinungei mumtol tumphanga pilak, nimanung koukou leiyanungkhi pilaka!”

⁴ Heirou Suipipuni loumallangbi David'nung shun, “Keihutra mumtol chamri maklei, heiya Puwatlhoura changnungei marthingthutkur khying mumtol thari leilei, awari neiyei thimi rapni napuiyakou rkhum tilrilmanungri yanikhi shai yarou.”

⁵ Heirouri David'ne Suipipunung loumallangbi anungei kyun, “Tanghakpani keine watlhou chaleiserrou napuiyakou rkhum tilrilkhoumak, heinaksini kartlang douwa rapkhi watlhou tounanungei marthingthutbi, marmokmak daarkok'naksini hoileihui; heineri angturi yai ukningei daarkok heiwari kounakbil marthing hoimakrouko?”

⁶ Heisi tounarouri Suipipuni Puwatlhoura yrengnungei marthingthutbi khaithutkur mumtol rapya anungei loumalanpikur; kouweiyo toulanungri, kheen heirouri Umpuei maibongrei mumtol klumya khoulhakbi khlang silnungei toubi louthutdurkhou mumtolrap nimakni mumtol deiri koukhatkhi mak.

⁷ Heitoubi heiyei tlainirou, Saul'yei shok rapbei hangrei, aiyei yaosilpu upa, minri Doeg toubi ung, Edomrei napawa khatkhi, Pucheemra Puwatlhouei lhoubom khatnungei bi'heirou Umpuei maibongra kan-nganbini louklei.

⁸ Heirou David'ne Ahimelech'nung kngai, “Asinung neihutra raal-shon nimanung raalchei leileiko? Kouweiyo toulanungri, krungei watyilkur lhou heiwani khnotdachaknei ngamrou, keiri keiyei raal-shonle, keiyei raalcheikhi louheilapmakura.”

⁹ Heirouri Suipipuni loukyun, “Ela'yei phaikara nangni hatdurkhou, Philistia'yei lhouwa Goliath'yei raal-shon heiwari keine bi arou khouleime. Shon heiwari punshelni lhomphopbi Ephod kallera tungkhoubini leirou. Yukthilak, kounakpi nangni heiwaya pammanungri louheilaka; kouweiyo toulanungri, keinungeiri shon heiwa nimakni deiri koukhi maklei.” Heirouri David'ne kyun, “Heiwaya duiri dei koushon leiheirou; keinungei pilaka, heiwaya urlouheirouwa.”

David'ne Gath'ra Wakur

¹⁰ Heirouri David'ne kanthoubi heiyei tlainirou Saul'yei birouwei trukthutkur, heitoubi Gathyei Krung Achish'yei leinara wakur.

¹¹ Heiya Achish'yei shok rapni anungei shun, “Awari ram heiyei Krung David nimako? Yane nuybini, shei shaknabi, ‘Saul'ne aiyei yeekna thimi lishing-lishingya hatdurla; heirou David'neri yeekna thimi lishing chip-chipya hatdurlame,’ toubine kanyerpikuri aya nimako?”

¹² Heirouri David'ne yaiyei loukyun tlou rapya mayeklhakbini Gath'yei Krung Achish'ya beimakni ningchikur.

¹³ Heisi tounarouri ani yai maibongra wachangei kheenrou yuntlungmak thimi'naksini toukarsabini, heitoubi shumtrumra koukouya baimarekbini, heitoubi makha khmulra chilkaikhi yenkungsundayerbi wachangkur.

¹⁴ Heirouri Achish'ne aiyei shok rapya shunkur, “Thilak, napawa heiri yuntlungmak thimime touri nani mumako? Heinaksi thimiya kounungei nani keinungei heiruilhako?

¹⁵ Keiyei Krungkulla yuntlungmak thimi makme tounei, napawa heiwaya keipongra yuntlungmak thimi kansayernanungei nani aya heiruilhakurako? Anaksi thimini keicheemra wachangbom thukko?”