1 SAMUEL 20 - KHYINGEI PU'TLOU Bible (BSI)

Jonathan'le David Yakhunta Tlou Kantomkril

¹ Heirouri David'ne Ramah'rei Naioth'rouwei loutrukurbini, heitoubi Jonathan'yei leinara hungbini anungei hungshun, “Keineya kou touwurkhoulawo? Keiyei mralya kouwo? Keine neiyei pawaei maibongra kounaksi borhya touwurkhounei, ani keiya hatnungei raphakurawo?”

² Heirou Jonathan'ne loumallangbi David'nung loukyun, “Heiri kouniroukhi hoimakrou! Nangri kouniroukhi himakrou. Thilak, kai pawani keinungei koukhatkhi yunthutmakni, lhou tangkhi, nimanung mandikhi toumakrou. Heineri kai pawani lhou heiwaya keirouwei yulkhoubi muni tourouko? Keikyun ari chimmakrouko?”

³ Heiya David'ne hanuikhi loumallangkur, “Nangni keiya kringpime touri nai pawani lhangaini kmu; heitounei ngamrou aitamne ningchabi, ‘Awari Jonathan'ya muyermakrou, heisi nimanungri ani shunthutlhengrou.’ Heiya tanghakneri Umpunekhi heirou nangnikhi kmu heiwariya- Keiri hiwurou beichangeiya.”

⁴ Heirouri Jonathan'ne David'nung loushun, “Nangni keiyari koukouya touyerkni heiso keine neinungei toupirou.”

⁵ Heisi tounarouri David'ne Jonathan'ya shun, “Thilak, ningari tangla heideni, heineri keiri Krungle omkanthrinbi lukturng doura chamalnabom thuk; heisiya hoiyanungkhi, keiri chawurbi, ramhangra khyumni tlung tlainiyei rawai phani trukyulbi leiwurmakri yamaklei.

⁶ Heirou kounakpi nai pawani keiya beimak kanrilni karngeibi ngaiphalanungri, nangni anungei asitoubi shunpilaka, ‘David'ne keinungei kalthi shunchabi, aiyei khukarthil Bethlehem'ra shaallura; ngamri kheen ahakrou aiyei bommai nammani bi heirou kum khatdei khoini Umpunungei malanput makatnungei lhou kleime toubine shunkhou.’

⁷ Heirou kounakpi ani, ‘Heiyanungri lhangaiya,’ toubine louyunlanungri, ‘neishok keiri himakrou; heiya ani beimak malungkhani louyunlanungri, ani keiya hatnanungei rangleihuime touri mulaka.’

⁸ Heiyei ngamni neishok keinungei ukning khyingni toupilak; kouweiyo toulanungri, nangni keinungei Umpuei minra tloukhi kantombini mardingpiwurla, heiya kounakpi keinungei mral leiyanungri, neihut hakni keiya hatlaka; kounungei keiyari neiyei pawaei hutra pilhakrouwo?”

⁹ Heirouri Jonathan'ne mallangbi loukyun, “Heihakri kouniroukhi thukmakniyasu! Heirou kounakpi kai pawani neidoura heinaksi lhangaimakya rangbini kleiya keine mulanungri, heiwaya keine koutoubi neinungei yunthutpimakni khourou?”

¹⁰ Heirouri David'ne Jonathan'ya shun, “Kounakpi nai pawani neiya malungkhabi thuithini louyunlanungri, huni keinungei heiwaya shunthutpirou?”

¹¹ Heirou Jonathan'ne David'nung loushun, “So, wawalo, kakhunta ramhangra chawase!” Heisitoubi yakhuntani wathukbi ramhangranung chakur.

¹² Heirouri Jonathan'ne David'ya shun, “Israellei Dunpu, Umpune mulaksu! Heitoubi ninga tlainirou, nimanung phitniya asilumnung keine kai pawaei maibongra wachangbi ani kouya ningchaleiyo toubi raphathutdeise, heitoubi aiyei loukyun hilthungni keine neinungei yunpirou. Heirou kounakpi ani neiya thuithini toupinungei ningchamakanungri beimakni lhangaiya, heiyei pao heiwaya keine neinungei shunpirou.

¹³ Heirou kounakpi ani neiya yanimakni hatnanungei rangbi, heirou keine heiyei paoya neinungei shunpimakanungri, Umpune Jonathan keiyakhi heisi hatlakasu; heirou heiwaya duinikhi toupilaksu. Heiya kounakpi kaiyei pawani neiya lhangaimak tounanungei marshikbi leiyanungri, heiwaya keine neinungei pao shunpirou; heitoubi neiya hilmartleiwurou; heiyanungri nangni shuikngam makni shalthutrou. Heirou Umpune kai pawaya kalhonpikur heinaksini Ane neiyakhi kalhonpilaksu.

¹⁴ Heitoubi keine ringleiyenri, nangni keinungei Umpuei kringpikhei heiwaya mutpilaklo, heiyanungri kei himakrou.

¹⁵ Heiya neiyei klui naimakei kringpirilnei mri heiwari keiyei bom'rouwei nangni tatrilyermakrou da; heiwari Umpune David'yei yeekna thimi rapya tlaipangpal thleimai'rouwei louthutdurbikhi malungshirilnei mri heiwari tatrilyernungei yamakrou.”

¹⁶ Heisitoubi Jonathan'ne David'yei cheemmaile tlou kantom khat mardingrilbi, “David'yei yeekna thimi rapyari Umpune khlang lhaklaksu,” toubi yunbini mardingrilkur.

¹⁷ Heirouri Jonathan'ne hanuikhi David'nung tlou kantomkur, ngamri ani aitam ai'mshaya malungshi naksini David'ya malungshikur.

¹⁸ Heirouri Jonathan'ne anungei shun, “Ningari tangla heideni, heineri neiya muphamakarou, ngamri omna heiwari haangbini leirouwa.

¹⁹ Heirou nangri khyumni tlung tlainirouri tanghakpani muphamarou, heitoubi neiyei haallei lhou thukniyei yulbi leikhouna Ezel thlungpung kallera yulbini louleithulak.

²⁰ Heitoubi keine bi heiyei pongra kounaksi khat tinkarsabini malaa'chei khyumtam heikaprou.

²¹ Heirouri thilak, keine kartlang douwa khatya atoubi shunbini, ‘Heichanlak, heitoubi malaa'chei rapya waraphalak,’ toubi shunmatubini heimalhetrou. Kounakpi keine kartlang douwa heinungei, ‘Thilak, malaa'chei heiri neipongra dalei, yenkhulheilaklo,’ toubine heishunlanungri, heiyanung, nangri hungthuk yarou, ngamri neinungei lhangai hoirou; heirou Umpune ringleiyenri neinungei koukhi shuikngam khi-kna thukmakrou.

²² Heiya kounakpi keine kartlang douwa heiwaya, ‘Thilak, malaa'chei heiri neiya heiduinara daleime,’ toubi heishunlanungri, nangni loutruklaka. Kouweiyo toulanungri, Umpune neiyari tlatnara hilchutkura.

²³ Heirou nangle, keile yarilbini kantomrilkur tloubom heiyei ngamrou, Umpune kakhuntayei tlakra klui naimakni tlou mayungpi hoipibi kleime toubi ningthutlak.”

²⁴ Heisitoubi David'ne ramhangra yulbini leikur, heirou tangla ran heideninungri, Krungni chak-an chamainanungei omkarbilkur.

²⁵ Heirouri Krungni hallei nakrimni chak-an chamainungei, raapthang pongrei omnara omkarbilkur; heirou Jonathan'ne akou mai kallukrilni omkur, heitoubi Abner'ne Saul'yei mnak khatra omkur, heiya David'yei omna heiwari haangbini leikur.

²⁶ Heisiya hoiyanungkhi, heininungri Saulri koukhi yunmakni mulleikur, kouweiyo toulanungri, aitamne ukningra ningchabi, “David'nungri koukhatdikri thukkarou, heitounei ngamrou a heiri shuimakni marmokarou.”

²⁷ Heiya heithangei tlaini heiwari tangla heideniyei thang, khnini tlung tlainiroukhi David'yei omnabi heiwari haangbini leiwurthuwa; heitounei ngamrou Saulne aiyei chanapawa Jonathan'ya shun, “Jesse'yei chanapawa David'ne anginungkhi heirou angtukhi chak khangnara yaomakurya koutouneiyo?”

²⁸ Heirou Jonathan'ne Saul'nung loumallangbi kyun, “David'ne Bethlehemra shalriyeise toubi keinungei kalthi buchakurme.

²⁹ Kouweiyo toulanungri, ani kyun, ‘Kai cheemmaini khukarthilla Umpunungei malanput makatnungei leinei ngamrou, keiyei teinaowa rapnikhi keiyari lhouthuk heirouri yaomak yamakme toubi chaytlou shunthungkurme, heineri kringpibi keiyari shaalyerpilaklo. Heirou asinungri nangni keiya kringpilanungri, keine shalbi keiyei teinao rapya hungmurillou.’ Heitounei ngamrou ari Krungei lukturngra chak charou wachangmakurame.”

Saulne Jonathan'ya Beimakni Malungkhakur

³⁰ Heirouri Saul'yei malungkha heiwari Jonathan'yei doura meithukkura, heitounei ani Jonathan'ya shun, “Nangri rikraimakpi heirou chorit naimakpi napuiyaei chanapawa! Nei'msha neitamyakhi heirou neiya yukpukpi neipuiyaphani rikrai phayernanungei nangni Jesse'yei chanapawa David'ya kalhopkurme touri keine kmu nimaka?

³¹ Kouweiyo toulanungri, Jesse'yei chanapawane tlaipangpalla ringleiyenri, nangri kouniroukhi Krung hoikhouchangmakrou; heirou neiyei Krungbomkhi kouniroukhi phunbang manikhoumakrou. Ngam heineri, asinungri thimi heimalhetbi David'ya wa'ungyerlak, heitoubi bi arou yenlhakyerlak, ngamri ayari shuimakni hatrou da.”

³² Heiya Jonathan'ne aiyei pawa Saul'nung loumallangbi kyun, “Koutounei aya hatrouwo? Aneya kou klal lhou touwurlawo?”

³³ Heisi tounarouri Saul'ne aiyei raalchei heiwani Jonathan'ya hatnanungei heithunkur; heisi toubi aiyei pawa Saul'ne David'ya hatnanungei manrangbi leileihuime touri Jonathan'ne mulhakur.

³⁴ Heirouri Jonathan'ne beimakni malungkhawurbi chak chana lukturng'rouwei kanthoubini wathukkur; heirou tangla heideni thangei tlainirouri chak chanara yaothungmakni leikur; kouweiyo toulanungri, ani David'nungtlim ukningra nungwaimakura, ngamri aiyei pawani David'ya rikrai piwurla.

³⁵ Heitoubi thangei tlaini ningshunrou Jonathan'ne David yakhuntani shunrilkur hilthungni ramhangra David'ya murilnanungei toubi kartlang douwa khatle kalhonni wathukur.

³⁶ Heirouri Jonathan'ne aiyei kartlang douwanung shun, “Asinungri nangni holhangra heichanbini keiyei heikapkur malaa'chei rapya waraphawa.” Heisitoubi kartlang douwa heiwani heichanyeinung, ani malaa'chei khat aya heiduini heikapkur.

³⁷ Heisitoubi kartlang douwa heini Jonathanyei heikapkur malaa'chei wadana bira wa'tlungei kheenrouri, Jonathan'ne kartlang douwaya ungbini heikyun, “Mala'chei heiri neiya heiduina bira dawura nimako?”

³⁸ Heirouri Jonathan'ne kartlang douwa heiwaya haokalni ungraobi heishun, “Khrangni toulaklo, heitoubi khnotni karyimmakni heiraphalaklo!” Heisi tounarouri Jonathan'yei kartlang douwa heiwani khnotni malaa'chei rapya khulmarkumbini aiyei upawa heinungei yenpikur.

³⁹ Heiya kartlang douwa heineri heiyei ngam heiwari koukhatkhi muphamak, heiya Jonathan'le David yakhunta tomni ngam heiwaya kmu.

⁴⁰ Heirouri Jonathan'ne aiyei hutsurap heiwaya aiyei putrui kartlang douwa heiwanungei silnawurbi aya shun, “Hunglaka, heitoubi hutsurap heiwaya khukarthilra yenkhoulak.”

⁴¹ Heisitoubi kartlang douwa heiwani shaalkurle tallengni David'ne thlungkhan kallerei kanthoubini hungthukur, heitoubi Jonathanyei maibongra thleira aiyei mai shikhuplhakbi khyumbuirek khrumkur. Heitoubi heihillou yasini khatle-khatle rkolphoprilbi machuprilbini, David'ne malung'pilbongyen malungdouni chapkur.

⁴² Heirouri Jonathan'ne David'ya shun, “Malungdamni shaallaka; ngamri asinungri kakhuntani Umpuei minra, ‘Umpuei kalui naimakei tlou mayungpi heiso kakhuntayei tlakrakhi, heirou keiyei yu-cha raple, neiyei yu-cha rapbei tlakrakhi leipilaksu,’ toubine tlou kantomrilwurla.” Heirouri David'ne kanthoubi shalkur, heitoubi Jonathankhi khukarthilra yenkallengkur.