1 SAMUEL 2 - KHYINGEI PU'TLOU Bible (BSI)

Hannah'yei Kanyernei Laa

¹ Heirouri Hannah'ne Dunpunung shunchabini kyun, “Umpura keine kounakei nungkngai; Umpura keiyei mantrang katduilei. Keiyei yeekna thimi rapya keimurni laonakur manewura. Ngamri Neiyei kalpinara keiyei solung nungkngai!

² “Umpunaksi khyingri hukhatkhi mak; heitoubi Nang nimakni deiri hukhatkhi mak; Kaiyei Dunpu'naksiri Thlungtang dei mak.

³ Napal toubine tangchane tlou yunmakalo. Thuithiyei tloulhang rapya neiyei murrouwei yunthutmakalo; kouweiyo toulanungri, Umpuri yertlengwa kmu Dunpu; heirou Ari lhou touna kantangrou khrit holthikur mane.

⁴ Hutmantrangkur lhouwa rapbei malaakhi toudeekkur manelei; Heiya hutmanthir rapya mantrangyerpikur manilei.

⁵ Chaan khatdei dun thimi rapya nungkhatnuiyei chara langchayerlei; heiya chanungei makne msul doukhou thimi rapyari thoyerwurlei. Nao puk'khoumak thimi rapyakhi chanapawa napung'eni pukyerwurlei. Heiya chanao chungni pomkhou thimiyari tekkhi hormakni louthutpikurkhi yaolei.

⁶ Umpune hiyerkurkhi manelei, heirou ringyerkurkhi manelei; heirou Ane khiya ramra yensundakhi manilei, heitoubi ringbaangyerkurkhi manelei.

⁷ Umpune kanringyer'kurkhi mani, heirou dunyerkhi manilei; Ane namsundakurkhi mane, heirou Ane mathumbaangpikhi manelei.

⁸ Kanring-kanwai thimiyari rahui hangrouwei Ane khangthutpilei, tounaram mak thimiya koukhi makna rahui hangrouwei Ane taangthutpibi, Krung chanao rapbei hangra omthungyerlei; heitoubi thang'allei Krungbomra omyerpilei. Kouweiyo toulanungri, tlaipangpallei shutlai rapri Umpueithil; heitoubi heirapbei doura Ane tlaipangpalya dunbaangbine khoupilei.

⁹ “Aya uklum khying thimi rapya Ane ngaaksilpilei; heiya khril lhangaimak thimi rapri mehna daakra mulleiyerwurlei; Ngamri, tlaipang thimine aitamtomei mantrangni palchangmakrou.

¹⁰ Umpuya yanimakni yeekna thimi rapyari harhar mangyerrou; Ane yaidoura nungthourei nungkhungnakni yukrangkur; Umpune tlaipangpal wadongna phani pichar touheirouhui. Heitoubi Aiyei Krung rapya Ane mantrangyerpirou; heirou Aiyei shirek teipikur thimi rapya Ane mathumbaangpirou.”

¹¹ Heirouri Elkanah'ne aiyei cheem yultlai Ramah'ranung shaalkur. Heiya chanapawa heiri Suipipu Eli'yei pongra Umpuei watlhou toubine leithungkur.

Eli'yei Chanapawa Rapbei Lhangaimak Lhou

¹² Eli'yei chanapawa rapri koukhi karshukmak Belial'yei thimithil; yani Umpuya shakmumak;

¹³ heirou Suipipu rapbei thimi rapnung toubomthuk youkna lammitkhi mumak. Heirou thimi huhuni khrumna put makatdei kheenrou, anchum thungminbi leiyei kheenrou Suipipuei shok khatni aihutra bak khyumtam krung anthlei khat shinbini wachangrou.

¹⁴ Heitoubi anthlei heiwaya anphu'ra nimanung khangra, nimanung kulpakra, nimanung lhingra ani khotlhakrou; heitoubi anthlei khodthutnarei yaokur anchumrap namma heiri Suipipu heini aiyei khoini loukhei. Heisi toubine Shiloh'ra khrumna put makatnungei kachangkur Israellei thimirap nammanungei yani heisithil loutoukur.

¹⁵ Heirou yani khrumna put anchumrei anyao rapya meira hongbongnung, Suipipuei shokni wachangbi khrumna put makatrou kyou thiminung asitoubikhi washun, “Suipipuei anchum sirukya keinungei khringni pithunglak; ngamri ane neirouwei an'khmin loumakrou, khring khoini louroutuei.”

¹⁶ Heirou napawa heine shok heiwanung, “Anyaorap heiri meira hongriyeise, heitoubi heihillouri neiyei loukniei mkhei klou yarou,” toubine louyunlanungri; heirouri ani, “Heiri yamakrou, heiya asinunghak nangni keinungei pithunglak, hei nimanungri, keine nambini louheirou,” toubine yunrou.

¹⁷ Heisitoubine kartlang douwa rapbei lhangaimak lhourap heiwari Umpuei mit'thrilnara beimakni thuithikur; kouweiyo toulanungri, yani Umpuya khrumna putchei rapya marmokyerwurla.

Samuel Umpu ei Maibongra Douwa Khat Khoini Tangthutkur

¹⁸ Asinungri Samuel'ne douwacha khat khoine phaikhringei shambya kanshambini Umpuei maibongra Puwatlhou toubine leikur.

¹⁹ Heitoubi aiyei puiwine, aiyei shalwale kalhonni kumserrei khoini khrumna put makatrou kaleiserrei Samuel'nungei linglikchul mandicha khat-khat marshikbine kadthulbaangpikur.

²⁰ Heirouri Eli'ne Elkanah'le aiyei nuya phor pibini kyun, “Napuiya heiyei ngamrou Umpune neinungei chanao shunnanungei phor pilaksu, kouweiyo toulanungri, ani nao heinung'tlim shunchawurbi, heitoubi Umpunungei makatpiwurthula.” Heisitoubi yane yaicheemra shaalkur.

²¹ Heirouri Umpune Hannah'ya yeelthibi, heihilouri ane nao urthubini chanapawa napung-khyumle, heirou chanapuiya napung'khnikhi pukthu. Heisitoubi napawa douwa Samuel'ri Umpuei maibongra kadtangbaangkur.

Eli'ne Aiyei Chanapawa Rapya Samkur

²² Asinungri Eli beimakni tarwura, heirou aiyei chanapawa rapni Israelrap nammanungei toupiwurkhou lhangaimak lhou rapya, heirou khulbung kartilna cheemtangei shumtrumra watlhoutou napuiya rapya koutoubi chorit naimakni ibpikuro tounei paokhi namma mayekkurla.

²³ Heitounei ngamrou ani yaya shunkur, “Koutounei nani heinaksi chorit naimakei lhouya toukurawo? Kouweiyo toulanungri, nani chorit naimakei lhou toukur heiri thimirap nammani yunrilkurya keine mayekurla.

²⁴ Nari heinaksi tounungei nimakme, keiyei chanaorap; kouweiyo toulanungri, Umpuei thimi rapbei yunrilnarei keiyei mayekkur pao heiwari lhangaiyei tlou nimakme.”

²⁵ Kounakpi thimi napung khatni thimi napung khatya karhani klal toulanungri, anungei'tlim Dunpuni khlangsilbi rochapikur kya, heiya thimi hukounak khatni Umpuya karhani klal lhou toulanungri, huni anungei'tlim rochapi manirou? Heiya Eli'yei chanao rapniri yai pawaei shunmatupinei houya ninglhakmak, ngamri Umpu'neri yaya hatniyura.

²⁶ Asinungri napawa douwa Samuelri, sharungrakhi kadtangbangura, heirou Umpu'nekhi heirou tlaipang thiminikhi karyuikna hoiyura.

Umpu ne Eli'yei Bommaiyei Doura Tlousher Pikur

²⁷ Heirouri Dunpuei thimi khatne Eli'yei leinara wabine anungei washun: “Umpune asitoubi shunpilei, ‘Keine naipa Aaron'yei bommaira, yani Egyptra Pharaoh'yei daakra kulchalphopbi leikhouyei kheenrou Kei'mshane muyerpikur.

²⁸ Heirou yayari Keine Israellei cheemkhurrap nam'rouwei, Keiyei Suipipu hoinanungei, Keiyei khrahpal doura khrumna put rapya makatnanungei, mroh iknanungei, heirou Keiyei maibongra Ephod nabi wachangnanungei toubine khalthutpikur nimakko? Heitoubi Israelrap namyerni meira hongbini makatnei khrumna put rapya Keine neipaei cheemkhurnungei khaithutpikur nimaka?

²⁹ Heiyanungri, koutounei nangni Keiyei Pucheemra chay pibini makatkur Keiyei khrumna put anchum rapya heirou Keiyei malan put rapya khramtangei mit'thrilni thikurawo? Heitoubi nangni Keiyei thimi Israel rapni heimakatkur khrumna putchei, anchum rapbei hangra lhangaiyatom khalthutbini neitamya marnamyerbini, heirou Keiyakhi duinara neiyei chanao rapya rikrai khrumnakurya koutouneiyo?’

³⁰ Heitounei ngammei Israel rapbei Dunpu, Umpune atoubi paothutlei, ‘Keine tanghakpani kantombi yunkur touri neiyei cheemmaile, neipaei cheemmaini Keiyei maibongra kalui naimakni Puwatlhou toubine leirou; heiya asinungri Umpune paothutdurla touri heihakri Keirouwei tlatdurasu; kouweiyo toulanungri, Keiya rikrai khrumkna thimi rapyari Keinekhi rikrai khrumpirou; heitoubi Keiya lhou hoimak thimi rapyari Keinekhi lhou hoipimakrou.

³¹ Thilak, Keine neiyei mantrangya heirou neipaei bommai'yei mantrangyakhi danwurnei kheen hungeirou, heiyanungri neiyei bommaira tara upa rapri hukhatkhi pulchini leikhoumarou.

³² Heirouri Israel rapbei doura Keine lhangaiyei phor pibini leiphobpiyei kheenrou nangni horthi tangei mit'thrilni thibini leirouwa. Heirouri neiyei cheemkhur shullamrari thimi hukhatkhi tara kouniroukhi pulchini leikhoumarou.

³³ Heiya Keiyei khrahpallei Puwatlhou heirouwei Keine louthutmakni khourou kyou thimi heiwani aya chapyerbini aiyei mitlung porchipyerheirou, heitoubi aiyei lhawaiya lahyerheirou, ngamri aiyei cheemkhurrei katshunkur thimi rapri kartlang dounung thimi rapbei raal-shonra hichirou.

³⁴ Heitoubi neinungei hutlha khoini neicha napawa napung'khniyei doura hungthukheirou, Hophni'le Phinehas yakhurekpa heiri nungkhatnuirou hirou!

³⁵ Heirouri Keiyei solungrei madu, heirou Keiyei touyerkni watlhouya tourou thimi malungamkna Suipipu khat Keine yuksuiheirou, heitoubi aiyei bommai shullamya Keine kalui naimakni yukranyerrou; heirouri ani Keiyei shirek teipikurwaei maibongra kalui naimakni watlhou toubine leirouwa.’

³⁶ Heirouri asitoubine hungthukheirou, touri neiyei bommairei maleithungkur thimirap nammani wachangbi, heirou aiyei maibongra khuklu kanthrunchabini, lapa khatnung'tlim, nimanung mumtol har khatnungei tlim, ‘Suipipu napung khatdei rungkhlangra keinungei lhoubom lhakpibi, keiya mumtol har khatdanungkhi pishailaklo,’ toubine buchaeirouhui.”