1 SAMUEL 19 - KHYINGEI PU'TLOU Bible (BSI)

Saulne Davidya Hatnanungei Raangkur

¹ Asinungri Saulne aiyei chanapawa Jonathan'le, aiyei shok rapya David'ya hatnanungei chay pikur. Heiya Saul'yei chanapawa, Jonathan'neri David'ya beimakni malungshibi karyarilkur.

² Heitounei ngamrou Jonathan'ne David'ya muni shunpikur, “Kai pawa Saul'ne neiyari hatnanungei rangbi tlakcha thiphabini leiyura. Ngam heineri asinungri nangni mukheini kartleiwurbi, heitoubi ninga-ningshunri bi khatra muni yulbini leilaka!

³ Heitoubi keine neiyei louyulna bi ramhangra wathukbi kai pawaei pongra mayungbi keine neiyei ngamrou anungei wari yunpirou, heirou keine kai pawa'rouwei raphathutkur tloubom rapya hillou neinungei keine shunpirou.”

⁴ Heirouri Jonathan'ne David'yei ngamrou aiyei pawa Saulnungei lhangaini yunthutpikur; heirou ani atoubi kyun, “Pawani neiyei shok David'ya hatbi klallei lhouri toumakni lhangairou; ngamri ani neiya karhani koukhi klallei lhou toukhoumakhui; heinung'tlimri aiyei toupikur lhourapni neinungei duini lhangaiyerlei.

⁵ Kouweiyo toulanungri, ani aiyei lhawaiya aiyei hutmaira lhakloubi Philistia rapya raal kardourilkur; heirou Umpune Israel rapya tangni kalthutyerpikur heiwaya nangnikhi mubini, hakraoni langthoukur nimaka? Heiyanungri nangni koukhi ngam naimakni, koumralkhi mak David'ya hatbini koutoubi borhlhou tourouwo?”

⁶ Heisi tounarouri Saul'ne Jonathan'yei kyun tlouya ninglhakur, heirouri Saul'ne tlou kantombini kyun, “Heiyanungri Umpune mulaksu, ayari hatmakarou.”

⁷ Heirouri Jonathan'ne David'ya ungloubini, heiyei tlourap namma heiya anungei shunpikur. Heisitoubi Jonathan'ne David'ya Saul'yei maibongra yenruilhakpikur, heitoubi David'ne Saul'yei maibongra haallei naksini watlhou toubi leiwurthu.

⁸ Kheen heirouri hanuikhi raal thukrilwurthua; heirou David'ne raal chabini Philistia raple raal kardourilkur, heitoubi thimi chungwani hatdurbi yaya raal manikur, heirouri Philistia rapni aiyei maibongrouei trukurchi.

⁹ Asinungri hanuikhi Saul'ne raalchei shinbini aiyei cheemwaira ombi leiyei kheenrou, Umpurei kyong lhangaimak lhawaini aidoura yongchangbini marhot youwurthu; kheen heirouri David'ne aihutra taari shinbini tangkhungbi louklei.

¹⁰ Heirouri Saul'ne David'ya heitinbi cheipakni raapthangra manthannungei heithunkur, heiya David'ne loukartleinarouri thunshamakura, heitoubi ani Saul'yei maibongrouwei trukthutkur; heisi tounarouri ani cheipak heiri raapthangra thunbi kalleikur. Heirouri heiniyei masanung David'ne trukthutdurbi muni yulkur.

¹¹ Heirouri Saul'ne thimi malhetbi, Davidyei cheemra chakngakyerkur, heitoubi ningshun nung katwaaryei kaalnung aya hatnanungei raangyerkur. Heiya David'yei nu Michal'ne aya shunbi atoubi kyun, “Nangni angtu masahak neichaanya kalthungmanungri, ninga ningshunri neiyari hatrouleiya.”

¹² Heisitoubi Michal'ne David'ya khamput shumtrumra raanthutyerbini muni trukyulyerkur.

¹³ Heitoubi Michal'ne cheem thraiyei lha khat loubini, heirou ipna rkhum doura fneibini, heitoubi aiyei lukhaangrani tlang'khmul hupbaangbini, heitoubi heiwaya punni hupkhalbi khoukur.

¹⁴ Heirouri Saul'ne thimi heimalhetbi David'ya mannanungei heiyilyei kheenrouri Michal'ne loukyun, “Ari kname.”

¹⁵ Heirouri Saulne hanuikhi thimi rapya chay pibini, “Ayari ipna rkhum kyaoni yenmanheilak, heiyanungri keine aya hatdeise,” toubine shunmatubi heimalhetkur.

¹⁶ Heisitoubi thimi rapni wachangei kheenrouri, thilak, cheem-thrailha khatya ipna rkhum doura fneibini, lu khaangnara tlang'khmul hupbangbini, punni hupkhalbi loukhoukur heiwaya wamulhakur.

¹⁷ Heisi tounarouri Saulne Michalya shun, “Kounungei nangni keinungei anaksi mandalbini keiyei yeekna thimiya kartleiyerkurro?” Heirouri Michal'ne Saul'nung loukyun, “Ane keinungei, ‘Keiri trukrouwa, koutoubi keine neiya hatrouwo?’ toubi shunkhoume.”

¹⁸ Heisitoubi David'ne kartleiwurbi trukkur, heitoubi Ramah'ra Samuel'yei leinara wa'tlungkur, heitoubi Saul'ne anungei toupikur lhourap nammaya Samuelnung wayunpikur. Heirou ale Samuel'ne Naiothra wawurbi bi heirou leikur.

¹⁹ Heirouri pao heiwari Saul'nung shunpibi, “Thilak, David'ri Ramah'yei Naiothra wabini leiyurame,” toubi mayekyerwurla.

²⁰ Heirouri Saul'ne thimi malhetbi David'ya mannanungei heiyilkur; heiya yari thimkhuirap rul khatni Samuel'kou mayungbi, heirou Samuel'ne yaihangra ruibini Pu'tlou shunthutbini louklei heiwaya wamulhakur; heirouri Dunpuei Lhawaini yai dourakhi yongchangkur, heirouri yanikhi Pu'tlou shunthutyoukur.

²¹ Heitounei pao heiwaya Saul'nungei hungshunpikur heirouri, ani hanuikhi thimi rulkhat heimalhetthu; heiya yanikhi Pu'tlou shunthutnara yaothungurthu. Heitounei Saul'ne hanuikhi khyumbui tlungni thimi heimalhetthu; heiya yanekhi Pu'tlou shunthutbini leikur.

²² Heirou hilluirouri ani ai'mshani Ramah'ra wabini, heitoubi Secu'ra klei yuishotang leinabil wa'tlungkur, heitoubi Saul'ne tlou wakngai, “Samuel'le David yakhuntari koura leilei?” Heirouri thimi napung khatni loumallangbi kyun, “Thilak, yariso Ramah'yei Naioth'ra klei.”

²³ Heisi tounarouri Saul'ne Ramah'yei Naioth'ra wa'tlungkur; heirouri Dunpuei Lhawaini aidourakhi yongchangurbi, heirou anikhi Naioth wa'tlungphani Pu'tlouya kalleng-kallengni shunthutbi wakur.

²⁴ Heirouri Saul'nekhi aiyei shamb rapya lhukthutdurbi, heitoubi Samuel'yei maibongra Pu'tlou shunthutbini, heiyei tlainirou nunghangfchip, heirou masantan punkhi yaomakni hakthilni neilhakbini leikur. Heisi tounarouri yani, “Saul'khi Pu'tlou shunthut thimi rapbei hangra thimkhui khat hoikuraeiko?” toubine ngairilkur.