1 SAMUEL 18 - KHYINGEI PU'TLOU Bible (BSI)

Jonathan'le David Palui Khoi

¹ Asinungri David'ne Saul'kou tlou kallangrilkur hillouri asitoubi hungthukkura touri Jonathan'yei solungle David'yei solungri beimakni karyarillura; heitounei ngamrou Jonathan'ne David'ya ai'mshaya malungshi naksini malungshikur.

² Heisitoubi heiyei tlainirouei waiyoubi Saul'ne David'ya ruilhakloubi, ayari aiyei pawaei cheemra shaalyermakni khamthungbi leiyerkur.

³ Heirouri Jonathan'ne David'kou tlou kantom khat mardingrilkur; ngamri ani David'ya ai'mshaya malungshi naksini malungshikur.

⁴ Heisitoubi Jonathan'ne ai'msharei naabi klei linglik chulya lhukthutbini David'nung nabangpikur, heirou aiyei raal shamb'le, raal shonkhi kyaoni, heirou aiyei mala taakle, aiyei sintlak ruikhi kyaoni David'nung nabangpibi mansambangpikur.

⁵ Heisitoubi David'ne Saul'yei watyilchana bi kantangra chabini mukheini lhou toubi tangbaang-choubaangyerkur; heisi tounarouri Saul'ne ayari raalluirap nammaei doura raallui upayei bom lhakpikur; heisitoubi ayari thimirap namyerrei mit'thrilnara malung pilyerkur, heirou Saul'yei lhou'urpu rapnikhi ayari malung khrahkur.

⁶ Heirouri asitoubi hungthukkura touri, David'ne Philistia'yei raallui Goliath'ya hatdurbi cheemra yenkallengei kheenrouri, napuiya rapni yaihutra sengshek'le tonsi shinbini, heirou phung'le dar'le marhukbini, laa sha'le nuy'le kalhonni Saul'ya murilnanungei toubi Israel rapbei khukarthil raprouwei wathukkur.

⁷ Heitoubi yani phung'le daar'le, tonsi-sengshek rapya marhukbini laa shabini kanyerkur: “Saul'ne raallui lishing-lishing hatkhou, Heirou David'neri raallui lishing chip-chip raal manwurla.”

⁸ Heirouri Saul'ri beimakni malungkhawura, kouweiyo toulanungri, yani heinaksi laaya shanarou anungei karhalkna hoiyabi ninglhaknimakur; heitounei ngamrou ani kyun, “Yane Davidyari raallui lishing chip-chip raal manwurla toubine mathangurla, heiya keiyari raallui lishing-lishing mankhoume toubi yani mathanglei. Heiya asinungri aiyei tourou kyouri heiyakhi duini keiyei Krungbomya lungloukur nimakneri deiri kouhoirouwo?”

⁹ Heisitoubine heini'rouwei waiyoubini Saulne Davidyari khalcha'knaei mit'thrilni thiyoukur.

Saul'ne David'ya Horthikur

¹⁰ Heisitoubi thangei tlainirouri asitoubi hungthukkura, touri Dunpu'rouwei lhangaimak lhawaini Saul'yei doura yongchangurbi beimakni marhotkur; heitoubi aiyei cheemwaira David'ne hallei naksini taari tangkhungbi leiyei kheenrou Saul'ne yuntlungmak thimi naksini chamma tlouchuiya pangei yunbini leikur. Kheen heirouri Saul'ne aihutra yaachei khatkhi shinbini klei.

¹¹ Heirouri Saul'ne aihutrei yaachei heiwani David'ya ‘Raapthangra thunkalleiwureise’ toubi ningchabini David'ya cheini heithunkur. Heiya David'yari cheini thunshamakurbi, airouwei khnuirek truk-kartleikur.

¹² Heihillouri Saul'ri David'ya beimakni chiwura, kouweiyo toulanungri, Umpuri Saulya lakurkhoubi David'ya kalhonpikur.

¹³ Heitounei ngamrou Saul'ne David'yari aiyei pongrei louthutdurbi, heitoubi aiyei raallui lishing khatdei raalluipu khoini aya bom lhakpikur; heisitoubi ani thimi rapbei ruipipu khoini wathuk-hungchang toubi ranchakur.

¹⁴ Heisitoubi David'ne lhoulam kantangrou mukheini watlhou toubi karsukyerkur, ngamri Umpune aya kalhonpikur.

¹⁵ Heirou Saul'ne David'yei mukheini lhoutoukur heiwaya munarouri, ani David'yari duiduini chiwura.

¹⁶ Heiya Israel nammale Judah'yei thimirap nammaniri David'ya beimakni malungshiyura, ngamri ani yai maibongra wathuk-hungchang toubi lhangaini ruipiwurkhou.

David'ne Saul'yei Chawiya Nu Khoini Klou

¹⁷ Heirouri Saul'ne David'ya shun, “Thilak, keiyei chanapuiya samranwi Merab'ri arime, keine aya neinungei nu khoini piroume. Keinungei lhangaini watlhou toupilak, heitoubi Umpuei raalbomya krak-ningnaini kardourillak.” Kouweiyo toulanungri, Saulne aiyei ukningra, “Ayari keihut'hakneri hutlhabi hatmakrou, heiya Philistia rapni aya hatlaksu,” toubine ningchakur.

¹⁸ Heiya David'ne Saul'nung loukyun, “Keinak thimi awiya huwo touneiyo? Heirou kai pawaei bommai awane Israel rapbei cheemkhurra koukhoi tounei keinakya Krungei kmak hoiyerrou touneiyo?”

¹⁹ Heisitoubi Saul'yei chanapuiya Merab'ya David'nung nu khoini louyernungei kheen hungtlungkur heirouri, Meholathia'yei Adriel'nungei lehni piwurbini louyerkur.

David'ne Saul'yei Chanapuiya Khatpiya Nu Khoini Klou

²⁰ Asinungri Saul'yei cha nangaka khatpi, touri Michal'ne David'yari beimakni malungshikhou. Tlou heiwari Saul'nung yunpinarouri, Saul'ne yapiwurla.

²¹ Heirouri Saul'ne ningchakur, “Keine David'nungei keiyei chawiya pirou, heiyanungri a heiwiri anungei chang hoinarou; heiyanungri Philistia rapni aidoura karhani lhou tourouwa.” Heitounei ngamrou Saul'ne David'ya hanuikhi shunthu, “Asinungri nangri angtu waiyoubi keiyei kmak hoirou dawa.”

²² Heirouri Saul'ne chay pibini aiyei shok rapya shun, “David'ya muni ungloubi, ‘Thilak, Krungni neiyari beimakni kringpilei, heitoubi aiyei shokrap nammanikhi neiyari malungshilei, ngam heineri, asinung nangri aiyei kmak hoilaka,’ toubine shunpilak.”

²³ Heisi tounarouri Saul'yei shok rapni tloulhangrap heiwaya David'nung yunpikur. Heiya David'ne loukyun, “Naiyei khalnarari Krungei kmak khat khoiyo touri klaiyei tloume touneiko? Keiri kanring thimi khatme, heirou keiyari hunikhi shak mupimaklei!”

²⁴ Heirouri Saul'yei shok rapni David'yei loumallangkur tloulhangrap hilthungni hanuikhi anungei hungshunpithu.

²⁵ Heirouri Saul'ne loushun, “Nane David'nung asitoubi shunpithulak, ‘Krungneri nu-manri dei koukhatkhi madumakme toulei, heiya aiyei yeekna thimi Philistia rapya khlanglhak khoini thimi macha khatdei sermur unya nu-man khoini yenpikurya madulei,’ toubine yunpilak.” Heiya Saul'neri David'ya Philistia rapbei hutra hiyernanungei ningchabini manrangkur.

²⁶ Heisitoubi aiyei shok rapni tloulhangrap heiwaya David'nung shunpikur heirouri, Krungei kmak khat hoirouwame toubi ningchanarou anungei beimakni malung khrahwura. Heisitoubi nu ruinei tlaini kartinbongnung;

²⁷ David'ne kanthoubi, ani aiyei raallui rapkou chawurbi, Philistia rapya thimi macha-khni hatkur. Heitoubi David'ne yaiyei sermur-un rapya yenheibini Krungei shunkur mshing tlungni yenpikur. Heitounei Saul'ne Michal'ya David'nungei nu khoini pikur. Heisitoubi David'ne Krungei kmak khat hoikur.

²⁸ Heiya Umpune Davidya heirou Israel thimirap nammayakhi kalhonpilei, heitounei ngamrou Israel thimirap nammani David'ya beimakni malungshikur.

²⁹ Heingamei Saul'ne David'yari duiduini chiwura. Heisitoubi Saul'yei chaan khatrek David'ya yeekna thimi khat khoini leiwurkhou.

³⁰ Heirouri Philistia'yei raallui upa rapni Israel raple raal kardourilnung wathukur; heirou yani raal kardourilleiyen, David'ne raalbom kantangrou Saul'yei raalluirap deideiyakhi duini sirei kheini kardourilbi raal maniwurnei ngamrou aiyei min chakur.