1 SAMUEL 17 - KHYINGEI PU'TLOU Bible (BSI)

Goliath'ne Israel Rapya Shingkna

¹ Asinungri Philistia rapni yaiyei raallui rapya khumtilbi, Judah'yei ram Shochoh'ra yani kartilbi raal marshikbini leiyura; heitoubi yani Shochoh'le Azekah'yei tlakra, Ephes-Dammim'ra rungbom sheembini leiyura.

² Heirouri Saul'le Israellei raallui rapni kartilbi, heitoubi Ela'yei phaikarra rungbom sheembini leiyura; heitoubi yani Philistia rapya raal kardouril'nungei lingshang ringbini raal marshikkura.

³ Heirouri yaitlakra phaikar khatni loukhaibini, Philistia rapni Lhungdou khatlhangra mayungura, heitoubi Israel rapni khatlhangra mayungbini leiwurchiya.

⁴ Heirouri Philistiaei raallui rapbei hangrei lhouwa khat heichunthutkur, aiyei minri Goliath toubine ung, a heiri Gath'rei thimi, heirou aiyei lamchouri thong'thrukle kapkhatbil chou.

⁵ Heitoubi aiyei lura thir lukhup khatkhi makhup, heirou aiyei sharungrani thir-linglik khatkhi kna, heirou linglik heiwari lapathir shekel lishing-phanga khrit changni sheemkur.

⁶ Heitoubi aiyei ho'rngalra thirrei honamkhang rapkhi makhupkhal; heitoubi aiyei khlabangra thirchei khatkhi chungbini klei.

⁷ Heirou aiyei cheitaang heiwari napuiyaei yalhang-heengnak tang; heitoubi aiyei raal'cheiphu heiri thir shekel macha'thrukbil khrit; heitoubi aiyei chung urpi putrui heiwani aiyei maibongra louchabi klei.

⁸ Heirouri ani wamayungbini, ungraobi Israel rapbei raallui upa rapnung heikyun, “Koutounei nani raal kardounungei lingshaang sheembini mayungkurawo? Keiri Philistia nimaka? Heirou nari Saul'yei shokrap nimaka? Heiyanungri naihangrei lhouwa khat khalthutbini heitoubi keinungei heiyilthutlak.

⁹ Heirou kounakpi ani keikou raal kardourilbini keiya hatchanganungri, kani nanungei shok hoirouwa; heiya kounakpi keine aya maniwurbi hatlanungri, nani kaiyei shok hoibini, kaya watlhou tourou da.”

¹⁰ Heirou Philistia rapni hanuikhi heiyunthu, “Angtu tlainihak Israellei raallui rapya shingnalei, keile raal parillou thimi khat heiyilthutlak, keile ale raal karshulthiyase!”

¹¹ Heirouri Saul'le, Israellei raalluirap nammani Philistia rapbei heikyun tlou rapya loumayeknarouri beimakni chirilwurchiya.

¹² Kheen heirou Judah'yei Bethlehem'ra klei Ephrathia cheemkhurrei Jesse toubi ung napawa khatdei chanapawa napungchot leikhou, yaihangrei David toubi ung cha dongwa khat klei. (Heirou Saul'ne Krung khoini thrungei kheenrouri Jesse'ri beimak tarwura.)

¹³ Kheen heirouri Jesse'yei chanapawa upa napung-khyumrek Saul'yei hilla chanthungbi raalla chawura. Heirou raalbomra chakur aiyei chanapawa napung-khyumei min rapri, samranri Eliab, heithangei naowani Abinadab, heirou khyumtam tlung naowari Shammah toubine ung.

¹⁴ Heirou Jesse'yei chanapawa upa napung-khyumni Saul'lei hil chanthungnara, naodongwa Davidkhi chanthungkur.

¹⁵ Heiya Davidri Saul'lei hil chanthungnarei hanui kallengurbi, Bethlehem'ra yai pawaei yaorul silnungei shaalkur.

¹⁶ Heisitoubine Philistia'yei Goliath'ne tlaini somlinibil ningshunkhi, rawaikhi Israel rapbei maibongra wathukbini yaya raal shingnabini mayungkur.

¹⁷ Heirouri Jesse'ne aiyei chanapawa David'ya shun, “Nangni asinunghak mumtol taar Ephah khatle mumtol tumchipya urlouheibini, rungbomra wabini neiyei 'teiya rapnungei bei heithulpilak.

¹⁸ Heitoubi raallui lishing khatdei upawa heinungeikhi nushungyui kankhan yum-chipkhi urlouheilaka; heitoubi neiyei teiya rapkhi koutoubi leileiyo toubine thikulkhoulak, heitoubi yaiyei paokhi yenmallenglak.

¹⁹ Kouweiyo toulanungri, yarap heiri Israellei raalluirap nammale kalhonni Saul'le pulni Ela'yei phaikara Philistia rapkou raal kardourilbini leiyura.”

David'ne Goliath'yei Raal Shingknaya Mairung Yaloukur

²⁰ Heisitoubi David'ne ningshun manma kanthoubi, heirou yaorul rapya yaosil thimi khatnungei silnabi lakkurkhou, heitoubi chaktham yum heiwaya shinloubi, Jesse'ne anungei chay pikur hilthungni chakur. Heitoubi ani rungbomkul pongra wa'tlungei kheenrouri, raallui rapni raalbom lhangranungei toubi lingshang khoini raalsobi wathukbini louleiyura.

²¹ Kouweiyo toulanungri, Israel raple Philistia rapbei raallui rapni khatle-khatle maikroni lingshaang riengbini raal kardourilnungei marshikbi leiwurchiya.

²² Heirouri David'ne aiyei chakthamyum heiwaya thikulpi thimi khatdei hutra pilhakurkhoubini, raalbomra wachangbi aiyei teiya rapya wamurilkur heitoubi karyemnei tlou wabekur.

²³ Heirou ani yakou tlou kallangrilbini leiyei kheenrouri, thilak, Philistiayei lhouwa, Gath'rei thimi Goliath'ne, Philistia raallui rapbei hangrouwei maibong lhangra wathukbini, hallei naksini Israel rapya raal shingknani ungraochakur heiwaya David'ne mayeklhakkur.

²⁴ Heirouri Israel rapbei raallui rapni aya mulhakurbi, ya nammani aya chitekwurbi trukchekwurchiya.

²⁵ Heirouri Israellei thimi rapni kyun, “Wathukbi klei thimi heiwari nani loumulako? Tanghakpani a heine Israel rapya raal shingnanungei wathukkura. Heirou huhuni aya hatkur maniyanungri, Krungni anungei klah-man tangni piroume, heitoubi aiyei chawiyakhi nu khoini louyerbi, heitoubi aiyei bommaiya Israel rapbei Krungruikhi kaipirou.”

²⁶ Heirouri David'ne aiyei pongra mayungbi heiklei thimi rapnung shunbi kyun, “Heinaksi Philistia napawaya hatdurbini, Israel rapbei rikrairou kyouya kukyerpikur thimi heinungeiri kou toupirouwo? Heinaksi murdanmak Philistia thimi heiri huwo? Heirou Khring Dunpuei raallui rapya raal shingkna napawa heiri kounaksi lhouwawo?”

²⁷ Heirouri thimi rapni thring malknani loumallangbi kyun, “Heitounei ngamrou Goliath'ya hatmane thiminungei klah-man tangni pirou touneime.”

²⁸ Asinungri David'yei tei upa Eliab'ne, David'ne raallui dei rapkou tlou kallangrilkur heiwaya mayeklhakurbi, ani David'ya meithukni malungkhapikur. Heitounei ani shun, “Nangri bi arou kouya tourou kyuwo? Neiyei yaorulrap heiri ramthingra huinungei horkhoupikuro? Neiyei ukningra tangchani, heirou neikhril khani ningchabini, raalbomya thinungei toubi nangni kyume touri keine loumulei.”

²⁹ Heiya David'ne loumallangkur, “Asinungri keineya kou touwurla touneiyo? Awari kou tloukhi ngaithikur yamakko?”

³⁰ Heirouri David'ne airouwei kallekthutdurbi, thimi deinungei hollhakbini tloubom heiwaya ngaithikur heirouri yanikhi hallei tloubom heinakrimni anungei hanui louyunpithu.

David'ne Goliath'ya Hatkur

³¹ Asinungri David'yei kyun tloulhang rapya mayeklhakurbi, heirou yani heirapya Saulnung paotambi yunpikur, heitounei Saulne thimi malhetbi Davidya wa'ungyerkur.

³² Heirouri David'ne Saulnung shun, “Thimi heiwayei ngamrou raallui hukhatnikhi ukningra ningchiwurbi ukning kanthritmakasu; neiyei shok keine chabi heinaksi Philistia'yei lhouwa heiwaya raal kardourilleise.”

³³ Heirou Saul'ne David'ya shun, “Nangni Philistia'yei lhouwa heiwaya raal pabini kardoukril manimakrou; kouweiyo toulanungri, nangri kartlang douwahui, heiya ari kartlangei waiyoubini raal beimakni shireikhei raallui khat kathoikhei.”

³⁴ Heiya David'ne Saul'nung loukyun, “Neiyei shok keiri pawaei yaorulya silbini leikhou thimi; heirou yaorul hangra yangkong nimanung yekthrum wathukbini, yaoshun chunglouheibi trukyeinung;

³⁵ keine aihilla chanthungbi, yaoshunya aiyei takarei khralthungkur, heirou kounakpi yaa heiwani keiya karhani hollhakbi louchiklanungri, keine aiyei tuktru-khmulra waimanwurbi umhatkur.

³⁶ Heisitoubi neishok keine yangkongkhi heirou yekthrumkhi khintamrek hatdurkhoula; heiyanungri, heinaksi murdanmakpa Philistia lhouwa heikhi yaa raprei khatnaksini hoirou; kouweiyo toulanungri, ani Khring Dunpuei raallui rapya manthapimakni raal shingknani yunwurla.”

³⁷ Heirou David'ne hanuikhi yenkyun, “Keiya yangkongei hutmathinrei, heirou yekthrum hutmathinrei kalpikur Umpune keiyari heinaksi Philistia'yei hutrouwei kalpiroume.” Heirouri Saulne Davidya shun, “Heiyanungri lhangaiya, chalaka, Umpune neiya kalhonpilaksu!”

³⁸ Heirouri Saul'ne David'ya aiyei raal-shamb nabangpikur; ani lura thir-lukhup makhupbaangpikur, heitoubi sharungra thir-linglikkhi naabaangpikur.

³⁹ Heitoubi David'ne aiyei raal-shambya naabaangna dourakhi aiyei raal-shonya hanui msuibaangpikur, heitoubi ho karchutbi raal marchuthikur; ngamri ani raal-shon shinbini raal tekchakhi marchuthimakhui. Heirouri David'ne Saul'nung kyun, “Shambrap awaya banglanungri keiri chutchangmaklei, ngamri anaksi raal-shamb rapri keinungeiri kanchangnamaklei.” Heisitoubi David'ne raal-shamb rapya namma lhukthutdurkhou.

⁴⁰ Heirouri ani aiyei shungkrokya aihutra shinloubini, heitoubi kungbanrei thlungpum phangatam khulloukur, heitoubi aiyei yaosilnara urcha thongra haallhakloukur; heirou aiyei chiyaikhi(thiyai) aihutra shinloubini, heitoubi ani Philistia raalluiwaei pongra wachangkur.

⁴¹ Heirouri Philistia'yei raallui heiwani wathukbini aiyei raal-shamb urthimi putrui heiwaya aiyei maibongra louchayerbini David'yei leina lhangra heitonlhakur.

⁴² Heirou Philistia'yei raallui heiwani louthinarouri David'ya mulhakurbi aya manthapimakni khremnabi laonapikur; ngamri ari kartlang douwahui, heirou thiyeinung shakrungkhi beimakni karyuikna hoiyabini kringpkna pukkur, heitounei lhou hoipimakur.

⁴³ Heitounei ngamrou Philistia'yei raallui heiwani kyun, “Nangni cheishu khat shinbini wathukur heiwaya, keiri uime toubi khalkurako?” Heisitoubi Philistia heiwani David'ya aiyei thrai rapbei min tlangbini manchokur.

⁴⁴ Heirouri Philistia heiwani Davidy'a shun, “Keinungei wachanga, keine neiyei sharungya nungthourei ramwaa rapnungei heirou ramhangrei ramyaa rapnungei khingpiwureise.”

⁴⁵ Heitounei David'ne Philistia raallui heiwanung loumallangkur, “Nangni keiyei leinara raal-shonle, raalcheile shinbini wachanglei, heiya keineri neinungei Israellei raalluipu, nangni manthapimakni khremnakur Umpuei minra wachanglei.

⁴⁶ Angtutou tlaini arou Umpune neiyari keihutra pilhakrouwa; heirouri keine neiya hatbini heitoubi neiyei luya dintatrouwa. Heitoubi angtutou tlainirou Philistia raallui rapbei khilhung rapya nungthourei ramwaa rapnungei, heirou ramhangrei ramyaa rapnungei khingpirouwa. Heiyanungri tlaipangpal nammani Israellei Dunpu khat leileime toubine murouwa.

⁴⁷ Heitoubi Umpune raal heiwari raal-shon'ne heirou raalcheini maneyer nimakme toubi khulbung kulyom nammanikhi murouwa; kouweiyo toulanungri, raalbom heiwari Umpuei, heineri neiyari ani keihutra pilhakrouwa.”

⁴⁸ Heirouri asitoubine thukkura, touri Philistiaei raallui rapni raal fyoubi, raalsoni David'yei maibongra heitonlhakbi wachangnarouri, David'nekhi khnotni raalbomra Philistia'yei raallui heiwaya kardourilnungei chanlhakkur.

⁴⁹ Heitoubi David'ne aiyei thongra aihut khruplhakbini, heitoubi kaorillei thlungpum khatcha yukhrupthutbi heitoubi chiyaini(thiyai) loushaikur, heirouri Philistia raallui heiwaya machalra saishakur. Heirouri chiyailung(thiyailung) heiwari aiyei machal rilla saiputlhakkur; heisi tounarouri raalluiwa heiri thleira mai shikhupni kanel'lhakkur.

⁵⁰ Heisitoubi David'ne aiyei hutra kou raal-shon khatkhi yaomakni Philistia'yei raalluiwaya thlung khatchatom chiyaini(thiyai) saibi raal manepikur.

⁵¹ Heirouri David'ne chanlhakbi, heitoubi Philistiaei raallui heiwayei doura tatphopbini wamayungkur, heitoubi aiyei raal-shonya shonkhumrei phuithutloubini aya shat'hatkur, heitoubi raal-shon heiwani aiyei lu dankur. Heirou Philistia rapni yaiyei raallui lhouwa heiwari hiyurame toubi munarouri, ya namma trukurchiya.

⁵² Heirouri Israellei raallui raple, Judah'yei raallui rapni kanthoubi, ungraochani raalsobi Philistia rapya hulthungbi Gath'yei phaikar waphani, heirou Ekron'yei palshung waphani chanthungkur. Heisitoubi Philistia raallui rapbei khilhung rapri Sha-araim'yei lamtlunthung, Gath'le Ekron'yei palshungrap waphani dabi leikur.

⁵³ Heitoubi Israellei chanao rapni Philistia rapya hulbi chanthungnarei yenkallengkur, heitoubi yaiyei rungbom rapkhi namma toubaiwurbi konchekur.

⁵⁴ Heirouri David'ne Philistia lhouwa heiwayei luya louheikur, heitoubi heiwaya Jerusalem'ra yenheikur, heiya ani Philistia'yei raal-shonle, raal hutsurap heiri ai'mshaei cheemra yenkhoukur.

Davidya Saul'yei Pongra Yenruilhakkur

⁵⁵ Kheen heirou David'ne Philistia'le raal kardouril'nungei chayeinang Saulne mulhakur heirouri, ani raallui upa Abner'nung, “Kartlang douwa heiri huei chawo?” toubine kngai. Heirouri Abner'ne, “Kousieikhiyo, Krungwa; keikhi mumakleime,” toubi loumallangkur.

⁵⁶ Heirouri Krungni shun, “Heiyanungri, kartlang douwa heiri huei chawo touri nangni khminni raphathutlaka.”

⁵⁷ Heisi tounarouri David'ne Philistia'yei lhouwa heiwayei raallu yendanheibi yenkallengei kheen heirouri, Abner'ne aya lourokur, heitoubi Philistia'yei lhouwaei raallu kyaoni aya Saul'yei maibongra yenruilhakur.

⁵⁸ Heirouri Saul'ne anungei loukngai, “Kartlang douwa, nangya huei chawo?” Heirouri David'ne loumallang, “Keiri, Bethlehem'rei klei neiyei shok Jesse'yei chanapawame.”