1 SAMUEL 16 - KHYINGEI PU'TLOU Bible (BSI)

Samuel'ne David'ya Bethlehem'ra Krung Hoinanungei Shirek Teipikur

¹ Heirouri Umpune Samuel'ya shun, “Saulne Israel rapbei doura Krung hoinarei Keine yapimakni horthutkurya nangni murerikhi, nangni anungei'tlim kounak tlani lhawai klahni kanrilbi leihuirou touneiyo? Neiyei halchee shirek kokra Olive shirek thacha shunglhakloubini chalaka; Keine neiya Bethlehem'ra Jesse'yei leinara yunanungei watyilkurame; ngamri Keine aiyei chanapawa rapbei hangrei napung khatya Keiyei krung hoinanungei khalthutdurla.”

² Heiya Samuel'ne loukyun, “Keiri koutoubi yurouwo? Kounakpi Saulne mayeklanungri, ani keiya hatroume.” Heitounei Umpune shunthu, “Heiyanungri, nangni halshun khat urbini yulaka, heitoubi ‘Keiri Umpunungei malanput makatrou kyume,’ toubine yunlaka.

³ Heitoubi nangni malanput makatdeinung Jesse'ya unglhaklak, heirou nangni kouya tourouwo touri Keine neinungei shunpirou, heitoubi Keinungei hilmartleikur thimi heiwaya nangni Keinung'tlim shirek teipirou da.”

⁴ Heisitoubi Samuel'ne Umpuei shunmatupikur hilthungni lhou toubine, heitoubi ani Bethlehem'ra yukur. Heirouri khukarthil heirou louklei yama upa rapni aiyei kyu heiwaya loumuwurbi, chi-kanchunle kalhonni aiyei leinara aya murillou wachangkur, heitoubi yani anungei wakngai, “Neiyei kyu heiwaya malung damnanungei hoiko?”

⁵ Heirouri Samuel'ne loumallang, “Moi, keiri malungdamni Umpunungei malanput makatnungei toubi kyume. Naitam marthingthutbini, heitoubi keile kalhonni malanput makatnara wawalo.” Heisitoubi ani Jesse'yakhi heirou aiyei chanao rapyakhi marthingthutpikur, heitoubi yaya malanput makatnara unglhakbini yaoyerkur.

⁶ Heirouri asitoubi thukkura, touri yani wachangei kheenrou, Samuel'ne Eliab'ya thirochabi aiyei ukningra ningchakur, “Tanghakpani Umpuei khalthutkur thimiri Aiyei maibongra mayungkur heiriyarouso!”

⁷ Heiya Umpune Samuel'nung shun, “Aiyei purei shakrung lhangainara, nimanung aiyei tang-choulamra thimak; ngamri ayari Keine yapimakura; kouweiyo toulanungri, Dunpuneri tlaipang thimiyei kmu naksiri nimaklei, ngamri tlaipang thimineri baorei shakrungra thilei, heiya Umpuneri solungra thilei.”

⁸ Heirouri Jesse'ne Abinadab'ya heiunglhakbi, heitoubi aya Samuelyei maibongra yenralyerkur. Heirou ani kyun, “Umpuei khalthutkurri awakhi nimakhui.”

⁹ Heithangrouri Jesse'ne Shammah'ya unglhakbini yenralyerkur. Heirou ani louyunthu, “Umpune ayakhi khalthutmaklei.”

¹⁰ Heisitoubine Jesse'ne aiyei chanapawa napung'eni rekya Samuel'yei maibongra yenralyerkur. Heiya Samuel'ne Jesse'nung shun, “Umpune ya rapyakhi khalthutmaklei.”

¹¹ Heirouri Samuel'ne Jessenung heikngai, “Neiyei chanapawa rapri asitom'ngeiyako?” Heirou Jesse'ne loumallang, “Yerrouwei dongwari leithungleihui, heiya thilak, ari yao silbi leilei.” Heirouri Samuel'ne Jesse'ya shun, “Thimi heiyilbini aya wa'ungyerlaklo; kouweiyo toulanungri, a hungbongyenri ka ommakhuirou.”

Davidya Shirek Teipikur

¹² Heisitoubi Jesse'ne thimi malhetdurbi Davidya wa'ungyerbi yenruiheikur. A heiri mairungkhi thiyeinung karyuikna, heirou shakrungkhi shapaalkhi tang-lamchou, heirou mit-mai parthimi khatkhi khoi. Heirou Umpune shun, “Kanthoubi aya shirek teipilakalo, kouweiyo toulanungri, khalthutkur thimiri awariya.”

¹³ Heirouri Samuel'ne shirek kok loubini, heitoubi aiyei teinao rapbei maibongra aya shirek teipikur; heirouri Umpuei Lhawaini aidoura yongchangpibi heiyei tlainirouwei David'ya mantrangyerkur. Heirouri Samuel'ne kanthoubi Ramahra shalkur.

David'ne Saul'ya Watlhou Toupikur

¹⁴ Asinungri Umpuei Lhawaini Saul'rouwei thukkura, heitoubi Umpurei lhangaimak lhawai khatni aya marhotbi lahyerwurla.

¹⁵ Heirouri Saul'yei shok rapni anungei shun, “Thilak, asinungri Dunpurei lhangaimak lhawai khatni neiya marhotbi leiyurame.

¹⁶ Heineri asinung kaiyei Krungni neimaibongra klei neiyei shokrap kanungei chay pilanungri, kani chawurbi, taari khungkhei thimi khatya raphabi ungeise, heiyanungri ani wala toubi, Dunpurei lhangaimak lhawaini neidoura marhotyei kheenrou, ani taari tangkhungla'nungri, neiyei klah mathrilna hoiyerroume.”

¹⁷ Heisi tounarouri Saul'ne aiyei shok rapnung chay pibi, “Taari lhangaini tangkhung khei thimi khatya raphathutlaka, heitoubi aya keipongra yenruilhaklak” toubi shunkur.

¹⁸ Heirouri shok rapbei hangrei kartlang douwa khatni loumallangbi kyun, “Thilak, keine Bethlehem'rei Jesse'yei chanapawa khat mulhakwurkhoula, a heiwari taari tangkhungkhi beimakni khei, heirou raallakhi krak-sireikhei lhouwa khatkhi khoi; heirou tlouyun-tlouyaikhi khei, heirou shakrungkhi lhangai-karyuikna, heirou ari Umpune kalhonpi thimi khatkhi khoi.”

¹⁹ Heitounarouri Saul'ne paocha thimi rapya malhetbi Jesse'nung washunkyer, “Neiyei chanapawa, yaosilbi klei David'ya keinungei heiyillaklo.”

²⁰ Heisi tounarouri Jesse'ne gadha khat manbini, mumtolle darkha yui an'unkao khatle toubi put sheembangpibi, heirou tlangshun khatle toubi marshikbini, heitoubi heiraple kalhonni David'ya Saul'yei leinara heiyilkur.

²¹ Heisitoubi David'ne Saul'yei bira wabini aya watlhou toupikur. Heirou Saul'ne David'ya beimakni malungshini kringpikur; heitounei ngamrou Saul'ne David'ya aiyei raal-shamb'le hutshu urkna putrui khat hoiyerkur.

²² Heirouri Saul'ne Jesse'nung pao heimalhetbi shun, “Asinungri David'ne keipongra watlhou toubine leilaksu; kouweiyo toulanungri, keiyei mit'thrilnara ayari beimakni malung khrahwurame.”

²³ Heisi toubine Dunpurei lhangaimak lhawaini Saul'nung changbi marhotyei kheenrou, David'ne taari loubini heitoubi aihutne tangkhungkur; heiyanungri lhangaimak lhawai heine Saul'rouwei thukkuranungri, Saul'ri kyingni mathrilkur.