1 SAMUEL 15 - KHYINGEI PU'TLOU Bible (BSI)

Umpu ne Saulya Krung Khoini Yapimakur

¹ Heirouri Samuel'ne Saul'ya shun, “Umpune Aiyei thimi Israel rapbei doura neiya Krung khoini shirek teipinanungei keiya heimalhetpikur, ngam heineri asinungri Umpuei tloulhang rapya louningpilaklo.

² Thangwan-Shimlei'yei Pu Umpune asitoubi yunlei. ‘Keine Amalekia rapya tanti piheirouhui, kouweiyo toulanungri, Israel rapni Egypt'rouwei shalthutdei kheenrou Amalekia rapni yaya lamrakra muni lou'mrimkur.

³ Asinungri chalaka, heitoubi Amalek'ya hatlaka, heitoubi aiyei kleime touwei'mkheikhi maangyerlaka, heitoubi yayari thimi hukhatyakhi lakkhoumakni, napawakhi, napuiyakhi, heirou naoshun-naopar rapyakhi, heirou halkhi, yao rapkhi, heirou utkhi, gadha rapkhi namma hattumwurlak.’ ”

⁴ Heirouri Saul'ne summon malhetbini thimi rapya ungmallongkur, heitoubi Telaim'ra yaya thimi mshing kansherkur; kheen heirouri raallui rapri lishing macha-khni tlung, heirou Judah'yei napawa rapkhi lishingchip kyao.

⁵ Heirouri Saul'ne Amalek khukarthilla wabini, heitoubi phaikara muni mrimbini leikur.

⁶ Heirou Saul'ne Kenia rapya shunbi, “Nari Amalekia rapbei hangrouwei shalwurlaka, heinimanungri keine nayakhi yakou kalhonni hatchokrouwa; kouweiyo toulanungri, nani Israelrap nammanungei yani Egyptrei yenshalthutdei kalnung kringpi kheini lhou toupiwurla.” Heisi tounarouri Kenia rapni Amalekia rapbei hangrouwei shalthutkur.

⁷ Heisitoubi Saul'ne Amalekia rapya raal dabini, Havila rouweini Egyptbei kulkung lhangrei klei Shur waphani raal maniloukur.

⁸ Heirou ani Amalekia'yei Krung Agag'ya khringni manloukur, heitoubi aiyei thimi rapyari raal-shon'ne tumni shat'hatkur.

⁹ Heiya Saul'le aiyei thimi rapni Agag'le, heirou yaorul, halrulrap heirou yaopa, halparap lhangai-marnam rapyari hatmakni khaikhoukur, heirou putchei lhangai-lhangai rapyari theiwurkhoubi, heirou lhangaimak heirou karsukmak putchei rapyari namma tlumni toumangkur.

Samuel'ne Saul'ya Samkur

¹⁰ Heirouri Umpuei tloulhangni Samuel'nung shunbi asitoubi kyun,

¹¹ “Keine Saul'ya Krung hoiyerkurri malung'thram'makura; kouweiyo toulanungri, ani Keihil chanthungnarouwei hil kallengura, heirou Keiyei chaylam hilthungni lhou toumakura.” Heirou Samuel'ri lhawai lahwurbi masantan Umpunung chapni shunchabini leikur.

¹² Heirouri Samuel'ne Saul'ya murilnungei ningshun manma kanthoukur, heirouri Samuelnung pao khat shunbi, “Thilak, Saul'ne Carmel'ra wabini, heitoubi bi heitamrou aitamtom thil-thlung khat bunbangkhoubi, Gilgal lhangra yuchumwurthuame,” toubine yunpikur.

¹³ Heirouri Samuel'ne Saul leinara wayei kheenrou, Saulne anungei loushun, “Umpune neiya phor pilaksu! Umpuei chaylam hilthungni keine lhou touwurlame.”

¹⁴ Heiya Samuel'ne heikngai, “Heiyanungri keiyei khnani mayekkur yaole halpa rapbei rungnei houri koureiyo?”

¹⁵ Heirou Saul'ne loumallang, “Heirapri raallui rapni Amalekia raprei yenmanheikur yaorul-halrul rapme. Ngamri thimi rapni yerrouwei lhangai yao raple halpa rapya hatdurmakni khaithutbini, neiyei Dunpu, Umpunungei malanput khoini makatnungei toubi yenkurme; heiya deideiri kani tumni hatdurbi toumangurkhoula.”

¹⁶ Heirouri Samuel'ne Saulya shun, “Mulleiriya! Angtu masanung Umpune keinungei koutoubi loushunkuro touri keine neinungei yunpiyeise.” Heirou Saul'ne loukyun, “Heiyanungri yunpilaklo!”

¹⁷ Heisi tounarouri Samuel'ne yenkyun, “Nangri neitamei mit'thrilnara koukhi nimaknaksi mandichani ningchakhoubinikhi, asinungri nangri Israellei cheemkhur rapbei lu khoini klei nimaka? Heitoubi neiyari Umpune Israel rapbei Krung khoini shirek teipikur nimaka?

¹⁸ Heitoubi Ane neiyari lhoubom khatnungei watyilbi, ‘Chawalo, heitoubi borh thimi rapya tlumni mangyerlaka, heitoubi Amalekia rapbei doura karhani raal dabini, ya namma himitchi'bongyen hatlaka,’ toubine yunpikur nimaka?

¹⁹ Heiyanungri koutounei nangni Umpuei houya ninglhakbi chanthungmako? Heiya kounungei nangni mangrom putchei lhangai rapbei doura trailhakbini thiphabi Umpuei maibongra lhangaimak borh lhouya toukurrawo?”

²⁰ Heirou Saul'ne Samuel'nung loukyun, “Heiya keineri Umpuei chaylam hilthungni lhou toukhoume, heirou Umpuei watyilkur lhoulamya keine chawurbi, heitoubi Amalekia rapya namma hatbi toumangkur, heitoubi yaiyei krung Agag'yari keine khringni yenmanheikur.

²¹ Heiya raallui rapneri deekhromwurnarei putcheirap thale, yaorul-halpa rapya lhangai tha khalthutbini yenkhumheibi, Gilgal'ra neiyei Dunpu, Umpunungei toubine yenkurme.”

²² Heiya Samuel'ne loukyun, “Umpuya malungpilkyer touri deiri kou hoirouwo? Khrumna putya meira pumni hongbi makatkurya, nimanung malanthutkur put rapya hoirouko? Nimanung Aiyei chaylam rapya baimakni hilchanthung heiwane nimako? Thilak, shunya hilchanthungtou heiri malanput makatya duini lhangai heirou shun kningtou heiri khrumna put marnamya duini lhangai.

²³ Kouweiyo toulanungri, shun ningmaknei lhou heiri thui-urnei lhouyakhi duini lhangaimak; heirou tangchabi napaltou heiri thrai khrumyakhi duini lhangaimak. Ngamri nangni Umpuei tlouya yamakura, heineri Umpunekhi neiyari Krung hoinarei yapimakura.”

²⁴ Heirouri Saulne Samuelnung loukyun, “Keine borh lhou touwurlame; kouweiyo toulanungri, keine Umpuei chaylamya hil chanthungmakni, heirou neiyei kyun tlouya karralbi lhou touwurla, ngamri keine thimi rapya ningchiwurbi, yaiyei kyun tlouya ninglhakbi lhou touwurkhoula.

²⁵ Ngam heine, asinungri, kringpibi keiyei borhya kukpilaklo; heitoubi keikou hanui yenkallengpiyalo, heiyanungri keine Umpuya khrumroume.”

²⁶ Heiya Samuel'ne Saul'ya shun, “Keiri nangle kalhonni kallengmakarou; kouweiyo toulanungri, nangni Umpuei tlouya yapimakni horwurkhoula, heitounei ngamrou Umpunekhi neiyari Israel rapbei doura Krung hoinarouwei yapimakura.”

²⁷ Heirouri Samuel'ne shaalnanungei mai khreithutnarou, Saulne aiyei linglikchul masurra heichurthungkur, heirouri, linglik masur heiwari thikthrelkur.

²⁸ Heisi tounarouri Samuel'ne loukyun, “Angturi Umpune Israel rapbei Krungbomya neirouwei threlchaalwurla; heitoubi neiya duiyei lhangai, neiyei cheemlhunrei thimi hukounak khatnungei Krungbom heiwaya piwurla.

²⁹ Heirou Israel rapbei thang'allei Pu heiwari mandalmakrou, heirou ukningkhi holwurmakrou; kouweiyo toulanungri, A heiri tlaipang thimi naksini Aiyei ukning holkur touri naimakrou.”

³⁰ Heirouri Saulne kyun, “Keine borh touwurlame. Heiya kringpibi keiyei yama upa rapbei maibongra, heirou Israel rapbei maibongrakhi keiyei mraltomya ngakpibi, keiya bei rikrai khrumpilaklo; heitoubi keikou yenkallengpiyalo; heiyanungri keine neiyei Dunpu, Umpuya khrumroume.”

³¹ Heisi tounarouri, Samuel'ne Saulyei hil chanthungbi yenkallengkur; heitoubi Saulne Umpuya khrumkur.

³² Heirouri Samuel'ne shun, “Amalekia rapbei krung Agagya keiyei leinara heiruilhaklak.” Heirou Agagni aiyei leinara malungamni ningchabi wachangkur. Heirou Agag'ne aitam ukningra ningchakur, “Hirou'younei lhawai klah heiri kanchaiyura.”

³³ Heiya Samuel'ne loushun, “Neiyei raal-shon'ne napuiya rapya nao pukbi nu pomkhou lapmakni shat'hatdurpi heinakni, neipuiyakhi napuiya rapbei hangrouwei nao pukmakpi hoiyerrouwa.” Heisitoubi Samuel'ne Agag'ya Gilgal'ra Umpuei maibongra mtum-mtum shaatchaalbi hatkur.

³⁴ Heirouri Samuel'ne Ramah'ranung shaalkur, heiya Saul'ri Gibe-ahyei aiyei cheemranung kakur.

³⁵ Heiyei tlaini'rouwei waiyoubini Samuel'ne hibongyen Saulya murilnungei yilthimakur; heisiya hoiyanungkhi, Samuel'ne Saul'ya beimak uksani kanrilwurkhou. Heirou Umpune Saulya Israel rapbei doura Krung khoini khalthutdurnei ngamrou beimakni malung-thrimmakur.