1 SAMUEL 14 - KHYINGEI PU'TLOU Bible (BSI)

Jonathan'ne Raal Manekur

¹ Nungkhatnuiri asitoubine thukkura touri, Saul'yei chanapawa Jonathan'ne aiyei raal-shamb putrui khoi kartlang douwa heiwaya shun, “Ara wawalo, kakhuntani Philistia rapbei rungbom khatlhang mnakra heirallase.” Heiya Jonathan'neri aiyei pawanung tloubom heiwaya shunthutmakur.

² Heirou Saul'ne Gibe-ah khukarthillei pura, Migron lhangra klei boheitrung holira ombini louklei. Bi heirou akou kalhonni raalluirap napung macha'thrukei mal louklei.

³ Heitoubi Shiloh'ra Umpuei Suipipu khoini klei Eliyei chanapawa Phinehas'yei chanapawa Ichabodei 'tei Ahitubei chanapawa Ahijah'khi Ephod linglik nabini bi heitamrou louklei. Heirou Jonathan'ne wathukbi chakur heiwari thimirap hukhatnikhi muthungmak.

⁴ Heirou Jonathan'ne Philistia rapbei rungbom lhangra heiralna lamra lhungso khintamra thlungsor thyoi-thya klei; thlungsor khatdei minri ‘Bozez’ toubine ung, heirou khatdeiri ‘Seneh’ toubi ung.

⁵ Heirou thlungsor khatpari khalu lhangra Michmash'le mai kallukrilni katsorthutlei, heirou khatpari khate lhangra Geba'le mai kallukrilni katsorthutlei.

⁶ Heirouri Jonathan'ne aiyei raal-shamb hutsu-ur putrui kartlang douwa heiwanung shun, “Wawalo, kani murdanmak thimi rapbei rungbomra heirallhakase; Umpune kanung'tlim shuimakni lhou toupirou, kouweiyo toulanungri, Umpune kalpinanungei lhou tounara thimi chung-chungmaknei tlouri koukhi mak.”

⁷ Heirouri aiyei putrui heiwani anungei loushun, “Neiyei ukningra lhangairoume toubi ningchakur heiwaya heisi toulaka, heitoubi thilak, keikhi neiyei ukningrei klei heihakya tounanungei nangkou kalhonbi mayunglei.”

⁸ Heirouri Jonathan'ne kyun, “Heiyanungri lhangaiya, kakhuntani thimi rapbei leinara heiraallhakase, heitoubi yanungei kaiyei shakrungya mutpiyase.

⁹ Heirou kounakpi yani, ‘Kane nai leinara wa'tlungbongyen bi heitamrou loumayunglak,’ toubi louyunlanungri, kakhuntani yai leinara wachangmakni bi heitamrou heisi mayungbini leirou da.

¹⁰ Heiya kounakpi yani, ‘Kai leinara wachangalo,’ toubine louyunlanungri, heirou kakhuntani yaileinara kachangrou; ngamri, Umpune yayari kaihutra pilhakurla; heisitoubi heiwani mu'kna hutlha hoirouwa.”

¹¹ Heirou yakhuntani Philistia rapbei rungbomra wachangbi yaimshaya muyerkur heirouri, Philistia rapni loukyun, “Thilak, Hebrewa rapri yai trukyulna khur raprouwei wathukkurame.”

¹² Heisi tounarouri Philistia rapni rungbom'rouwei ungraobi Jonathan'le aiyei putruiwanung heishunkur, “Kaileinara kawalo, heirou kani nanungei kouweikhat mutpiyeise.” Heirouri Jonathan'ne aiyei putrui heiwanung shun, “Kawalo, keihilla chanthunglaklo; kouweiyo toulanungri, yayari Umpune Israel rapbei hutra pilhakurlame.”

¹³ Heirouri Jonathan'ne khuklu kanthrunchabi hutponi kakakur, heitoubi aihilla aiyei putruiwakhi katchanthungkur; heirouri Philistia rapni Jonathan'yei maibongra loukanelhakur; heirouri aiyei putrui heiwanikhi aihilla chanthungbi ya thimi thaya shat'hatkur.

¹⁴ Heisitoubi heiniyei lamkriyei raalbomra Joanathan'le aiyei putruiwani phailou sangam khatdeimal rilla thimi somniyeimal hatdurbi lakurkhou.

¹⁵ Heirouri rungbom rillakhi heirou ram karyounikhi thimi rapbei hangrakhi chirilwurbi kanchunwurchiya. Heitoubi raallui rapbei tengkonrul hangrakhi beimakni chirilwurchiya; heirou tlaipangpal nammanikhi chirilwurchiya.

Philistia Rapya Raal Manekur

¹⁶ Asinungri Saul'yei raal-kngaak thimi rapni Benjamin ramrei Gibe-ah'ra leiyeinung, thilak, Philistiaei raallui rapni chekthutdurbi, biso-bibalkhi naimakni anung-anung trukchekkur heiwaya mulhakurla.

¹⁷ Heirouri Saul'ne akou kalhonbi klei thimi rapnung shun, “Thimi mshing kansherlaka, heitoubi kai hangrouwei huhuni pothutdurbi chakurro touri thilaka.” Heisitoubi yani thimi mshing kansherbini thinarouri, thilak, Jonathan'le aiyei putruiwa heiri yaihangra louleimakura.

¹⁸ Heirouri Saulne, “Dunpuei Mardingpina Theengkung heiwari ara yenlhaklak,” toubi Ahijahnung shunkur. (Kouweiyo toulanungri, kheen heirouri Mardingpina Theengkung heiwari Israel douwa rapbei hangra khoubini klei.)

¹⁹ Heirouri Saulne Suipipule tlou kallangrilbi leiyei kheenrou Philistia rapbei rungbomra ungraochanei hou heiwari duiduini katkallhakura; heitounei ngammei Saul'ne Suipipu heiwaya, “Neihut katlousundarilak, Pu'tlou ngaithinei kheen makkura,” toubi shun.

²⁰ Heirouri Saul'le, akou kalhonbi klei raalluirap nammani kantlangni hutdangbini, heitoubi raalbomra wachangkur; heirouri thilak, Philistiaei raallui rapni yadikdik hollhakrilbini, biso-bibalkhi naimakni beimak tamungrillurbi anung-anung shat'hatrilkur.

²¹ Asinungri hallei waiyoubi Philistia raple leimalnabi rungbomra louklei Hebrewa rapnekhi, Saul'le Jonathan yakhuntakou kalhonbi klei Israel rapnungei kalhopburbi Philistia rapya raal kardourilkur.

²² Heirou Ephraim Lhungdou ramra minung-minung trukyulbi leikur Israellei thimi rapni Philistia rapni trukchekkurnei paoya mayeknarouri, yanikhi wathukbi raal kardourilnara yaothungurbi Philistia rapya kalni raal chanbi hulthungkur.

²³ Heisitoubi heiyei tlainirou Umpune Israel rapya kalpikur; heitoubi raal kardourilkur heiwari Beth-Aven'ra heirallhakur.

Saulne Yuntlungmakni Tlou Yunkur

²⁴ Heiyei tlainirouri Israellei thimi rapri ukning nungwaimakura, ngamri Saul'ne tloubom khat kantombini, “Angturi Keine yeekna thimi rapya raal manibongyenri, rawai hungphabongnung huhuni chak-an chamailanungri manchokur hoiniyasu.” toubi thimi rapnung kyun. Heitounei ngamrou thimi hukhatnikhi koukhi chamaimakni chara yilbini doukur.

²⁵ Heirouri raalluirap nammani heengyao hangra wachangei kheenrouri, ramhang heirouri thleira khuining louklei karthangkur.

²⁶ Heirouri thimi rapni heengyao hangra khuining louklei heiwaya mulhakbinikhi, thimi huchakhatnikhi ai'aiyei murra hut pallhakkhoumak, ngamri thimi rapni kantomkur tlou heiwaya beimakni chirilkur.

Jonathan'ne Khuining Mtuploukur

²⁷ Heiya Jonathan'neri aiyei pawani thimi rapya tlou kantombi khoukur heiwari mayekkhoumak; heitounei ani aiyei hutni shinbi klei shungkrok masurya ronthutbini, heitoubi khuithral rilla thundumbini aihutne murra manchirlhakbini shumbi mongloukur; heirouri aiyei mitmai kar'alkur.

²⁸ Heirouri raallui rapbei hangrei napung khatni mallangbini loukyun, “Neiyei pawani thimi rapya manchonei tloule kalhonni, ‘Angtu tlainirou chak-an chamaikur thimi heiri manchokur hoiniyasu,’ toubi kantomkurme. Heingammei raallui rapri msulni kanelhakurchiya.”

²⁹ Heirouri Jonathan'ne kyun, “Keiyei pawani kairamrei thimi rapya lahyerwurlame. Thilak, asinungri keine khuining thacha martamlounei ngamrou, keiyei sharungri kounak nungkngaini mantrangkur!

³⁰ Heirou kounakpi raallui rapni angtu yaiyei yeekna thimi raprouwei lukloukur putchei rapya yaithukni chamailoulanungri kounak duini lhangairou! Heiyanungri Philistia rapya thimi mshing heiyakhi duini hatkur manimakrouwa?”

³¹ Heiyei tlainirou Israel rapni Philistia rapya Michmash'rouweini Aijalon wa'tlungni hatkur, heitounei ngamrou yari latekkurchiya.

³² Heirouri Israel rapbei raallui rapni chanlhakbi Philistia rapbei deekhromkur putchei-lalthum rapya markumloukur; heitoubi yani yao raple, halparap, heirou halshun rapkhi markumloubini, heirapya yani hatmaikur; heirou thimi rapni heirapya hee kyaoni mailoukur.

³³ Heirouri thimirap hukounak khatni Saulnung shunlhakpikur, “Thilak, thimi rapni anchumya hee kyaoni mailoubi Umpuya karhani borh touwurlame.” Heirouri ani loukyun, “Nane minamnei borh lhouya touwurla, bi atamrou nani keidoura thlungtang khatni nanbangbini hatlakalo.”

³⁴ Heirouri Saul'ne shun, “Nane wathukbi thimi rapnung, ‘Na thimi napung-kantangni ai'aiyei halpa raple yaopa rapya loubini keinungei heipilaksu; heitoubi bi atamrou hatmailaksu; heiya anhee maiphopbini Umpuya karhayernung yamakrou.’ toubine shunpilak.” Heisi toubine thimi rapni heiniyei masanung ai'aiyei halpale yaopa rapya heilhakbini heitoubi heirapya bi heitamrou hatmailoukur.

³⁵ Heirou Saulne Umpunungei khrahpal khat sabangkur; Saulne Umpunungei khrahpal sabangnara awane lamkri khrahpalkhi khoi.

³⁶ Heirouri Saul'ne kyun, “Kane masanung Philistia rapbei leinara yuwase, heitoubi ningshun nung warbongyen yaya konmangurase; heitoubi yayari thimi hukhatchakhi khringni lakkhoumakase.” Heisi tounarouri thimi rapni loukyun, “Nangni lhangairoume touya heisi toulaka.” Heitounei Suipipuni kyun “Heiyanungri kani Dunpunung wachangriyase.”

³⁷ Heisitoubi Saul'ne Dunpu'nungei tlou loubini, “Keine Philistia rapbei leinara yuchumserouko? Heitoubi Nangni yayari Israel rapbei hutra pilhakrouko?” toubine ngaithikur. Heiya heininungri Ane Saul'nungri koutlou khatkhi mallangpimakur.

³⁸ Heitounei ngamrou Saul'ne kyun, “Raallui uparap, na nammani bi arou heikarnaklhaklak, heirou koutoubi anaksi borhya toukurro toubi munanungei angtu tlainirou kani raphathutdase.

³⁹ Kouweiyo toulanungri, Israel rapya kalthutpikur Pu Umpune ringleiyenri, Keiyei chanapawa Jonathanya louhoiyanungkhi, a heiri shuimakni hirou da.” Heiya bi heitamrou klei thimirap nam'rouwei hukhatnikhi anungei loumallangmakkur.

⁴⁰ Heirouri Saul'ne Israellei thimirap nammanung shun, “Nane khatlhang manakra mayungrou da, heitoubi keile keiyei chanapawa Jonathan kakhuntani khatlhangra mayungrou.” Heirouri thimi rapni Saulnung loukyun, “Nangni lhangairoume touya heisi toulakalo.”

⁴¹ Heitounei ngamrou Saul'ne Israel rapbei Pu Dunpu, Umpunung shunchakur, “Meirui chimni mutpilaklo.” Heisitoubi Saul'le Jonathan yasinungei meirui hungdawurbi khalthutloukur, heiya thimirap deiri kartleithungkur.

⁴² Heirouri Saul'ne kyun, “Keile keiyei chanapawa Jonathan kasiyei tlakra meirui khingthilaka.” Heisi tounarouri meirui heiwari Jonathan'nungei hungdathangurbi aya khalthutdurla.

⁴³ Heirouri Saul'ne Jonathan'ya shun, “Nangni kouya touwurkhoulawo? Keinungei shunthutpilaklo!” Heisi tounarouri Jonathan'ne louyunthutbini anungei kyun, “Keine tanghakpani keihutrei cheishu ani masurra khuining thunpopbi beicha mtupbi martamthiwurla. Heineri asinung keiri hirou dawura.”

⁴⁴ Heirouri Saul'ne kyun, “Dunpuni keinungei Aiyei kningya toupilaksu, heirou heiwaya duinikhi toupikur hoilaksu; Jonathan, nangri shuimakni hirou dawura.”

⁴⁵ Heiya kulyomni Saul'nung kyun, “Israel rapya kalthutpinei lhouya tangni toupikur Jonathan'yari hiyerrouwa touneiko? Heihakpari yamakroume! Umpune ringleiyenri, Jonathan'yei lurei shampum khatchakhi thleira trulsundayernungei yamakrou; kouweiyo toulanungri, angturi ani Dunpule kalhonni lhou touwurla.” Heisitoubi thimi rapni Jonathan'ya lhukthutkur, heisitoubi ari himakur.

⁴⁶ Heirouri Saul'ne Philistia rapya hulbi chanthungnarei kallengbi hungkakakur, heirou Philistia rapkhi yai ramranung shaalkur.

Saulne Israel Rapbei Yikna Thimi Raple Raal Kardoukril

⁴⁷ Heirou Saul'ne Israel rapbei doura Krung khoini hungpaalyei kheenrouri, ani yaiyei yeekna lim rapya bi kantangrou raal yenkardourilbi; heirou Moab rapya, Ammon'yei chanao rapya, Edom rapya, heirou Zobah'yei Krung rapya raal yenmaniheikur. Heitoubi ani yenchaheina bi kantangrou yaya klah'knangni tanti yenpiheikur.

⁴⁸ Heirou Saul'ne lhouwa thukni krakni raal kardourilbi Amalekia rapyakhi raal manikur; heitoubi Israel rapyakhi, yaya konmangbi klei thimi rapbei hutrouwei kalthutkur.

Saul'yei Bommairei Thimirap

⁴⁹ Asinungri Saul'yei chanao rapri: Jonathan, Ishvi, heirou Malchi-Shua, heirou aiyei chanapuiya napung'khniri: chanapuiya samranwiyei minri Merab, heirou chanapuiya dongwiyei minri Michal toubi ung.

⁵⁰ Heirou Saul'yei nuwiyei minri Ahino-am toubi ung, a heiri Ahima-az'yei chanapuiya. Heirou aiyei raallui upawaei minri Abner toubine ung; a heiwari Saul'yei patul Neryei chanapawa.

⁵¹ Heirou Saul'yei pari Kish toubi ung; heirou Abner'yei pawa Ner'ri Abiel'yei chanapawa.

⁵² Asitoubine Saul'yei chaan khatrekrou Philistia raple thuithini raal kardourilkhou; heirou Saul'ne thimi-lhangai, mantrang-sireikhei thimi rapya mulanungri, heinaksi thimi rapya loubini aiyei raalluirap khoini loulhakkur.