1 SAMUEL 13 - KHYINGEI PU'TLOU Bible (BSI)

Philistia Raple Raal Kardoukril

¹ Saulne Krung khoini palyouei kheenrouri ai'mshaei kum somthum tlungura, heirou ani Israel rapbei doura kum somli'bil Krung khoini thrungkhou.

² Asinungri Saulne Israel rapbei hangrei thimi lishing-khyum khalthutkur, heitoubi Saulne thimi lishing khniya Bethel'lei Lhungdou ram Michmashra akou kalhonni leiyerbini, heitoubi thimi lishing-khatyari Benjaminyei ram Gibe-ahra Jonathan'le kalhonni leiyerkur. Heiya thimirap deiyari ai'aiyei cheemra ani hilmallengkur.

³ Heirou Jonathan'ne Geba'ra rungbom sheembi klei Philistia rapya nangbaiwurbini hatdurpi; heiyei pao heiwari Philistia dei rapnikhi mayekurla. Heisi tounarouri Saulne pengkul khungbini paochilbi kyun, “Hebrewrap nammani louningbi mayeklaksu!”

⁴ Heisitoubi Saul'ne Philistia rapbei rungbomya nangbaiwurnei pao heiwaya Israelrap nammani mayekurla; heirouri Israel rapri Philistia rapnungeiri thikmathuibi tapankna thimirap hoiyurame toubine ningmuwurla. Heirouri Israelrap namyerwaya Saulyei leinabi Gilgalra ungkartilkur.

⁵ Asinungri Philistia raple raal kardourilnanungei kartillura, heitoubi sapuk kaari lishing somthumle, heirou sapuktung raallui rapkhi lishing'thruk khalthutdurbi marshikkurla; heitoubi hoei raallui rapkhi kungruirei shitnruinak chungwani marshikbi, heitoubi kathukbini Beth-Aven kulkung lhangra, Michmash'ra rungbom sheembini leiyura.

⁶ Heirou yani Israel rapbei lhangra raal kalni heitonlhakur heiwaya Israel rapni loumuwurnarouri, yanungei tounaram makkurame toubi ningmuwurla; heirouri yani trukchekkurbi thleipurra, ramhang chetnara, thlungkhan hangra, khur yuknara heirou yui'rkung-kungkhrong hangra truklhakurbini yulwurchiya.

⁷ Heirou Hebrewa'rap thaneri Jordanyei raalpal kralni trukkurbi Gad'le Gileadei ramra yulkurkhi kyao. Heiya Saul'ri Gilgal'ra trukmakni heisi louklei, heirouri aihilla chanthungbi klei thimirap namyerwa heikhi chiwurbini kanchunwurchiya.

⁸ Asinungri ani bi heitamrou Samuel'ne shunbi kartinrilkur hilthungni tlaini eninibil karngeibini leikur; heiya Samuel'ri shunrilkur tlaini hilthungni Gilgal'ra wathukmakura, heisi tounarouri thimi rapni Saulya lakkurkhoubi chekthutdurchiya.

⁹ Heitounei ngamrou Saul'ne kyun, “Meira pumni hongnungei makat putle, malung damyerna makat putrap heiri keinungei yenpilaklo.” Heisitoubi Saul'ne makatput rapya meira pumni hongbini makatkur.

¹⁰ Heirouri asitoubine thukkura touri, Saulne makatput rapya meira hongchikurle tallengni, thilak, Samuel'khi bi heirou wachangura, heirouri Saul'ne Samuel'ya loumurilnungei wathukbi louchanrobini aya loukaryemkur.

Saulne Suipi Puei Rungkhlangra Puwatlhou Toubini Malanput Makatkur

¹¹ Heiya Samuel'ne wakngai, “Nangni kou touwurla?” Heirou Saul'ne loumallang, “Thimi rapni keiya lakkurkhoubi chekkurya keine muwurnarou, heirou nangnikhi kartinrilkur tlainirouri wathukmakura, heitoubi Philistia rapnikhi Michmash'ra rungbom sheembini raal dananungei marshikbini leiyura.

¹² Heitounei ngamrou keine kyun, ‘Asinungri Philistia rapni Gilgal'ra yuchumbini kaidoura raal darou marshikkura, heiya keineri Umpuei kningri kou kleiyo touri ngaithimakhui.’ Heitounei ngamrou keitam keithukni nambi meira khrumna putya hongbini makatkurame.”

¹³ Heirouri Samuel'ne Saul'ya shunkur, “Nangri yuntlungmakei lhouya touwurlame; heirou neinungei piwurkhou, neiyei Dunpu, Umpuei chaylam rapya nangni ngakmakni lhou touwurla; heiya kounakpi nangni Aiyei chaylamya baimakni chanthunglanungri, neiyei Krungbomya Israel rapbei doura Ane klui naimakni phunbangyerrou.

¹⁴ Heiya asinungri neiyei Krungbom heiwari tlani thrungyermakrou. Umpune Aiyei solungra karyakril thimi khatya raphathutrouwa; heitoubi ayari Aithimi rapbei doura Krung khoini thrungyerrouwa; ngamri nangniri Aiyei chaylam rapya ngaakmakura.”

¹⁵ Heirouri Samuel'ne kanthouwurbi Gilgal'rouwei shaalkur, heitoubi Benjamin ramrei Gibe-ah'ra kakur. Heiyei kheenrou Saul'ne akou kalhonbi klei thimi rapya mshing kansherkur, heirou yarap heiri thimi napung macha'thruk tlung.

¹⁶ Asinungri Saul'le, aiyei chanapawa Jonathan'le, heirou yakou kalhonbi klei thimi rapni Benjamin ramrei Geba toubikhi ung Gibe-ah'ra leiyei kheenrouri, Philistiaei raallui rapneri Michmash'ra rungbom sheembini leikur.

¹⁷ Heitoubi Philistia rapbei raallui rapni raal dananungei, raallui rapya rulkhyum thukni yerkhaibini: rul khatni Shual'yei ram Ophrah lhangra raal dananungei heitonlhakbini wachangkur.

¹⁸ Heitoubi rul khatni Beth-Horon lhangra wachangkur, heitoubi raallui rul khatneri Zeboim phaikar heithrilmuna Ramthing lhangra heitonlhakbi wachangkur.

¹⁹ Kheen heirouri Israel rapbei hangra thirsheem lhangsa hukhatkhi yaomak; heitounei ngamrou Philistia rapni heiwaya mubini kyun, “Hebrewa rapbei hangra lhangsa yaowanungri, yani raallei shon-cheipak sheembini leitlengrou.”

²⁰ Heisi tounarouri, Israel rapni Philistira yuchumbini, yaiyei lhangsa rapya ai'aiyei longkhum, louhin, rei, heirou thirmsui rapya sheemyerkur.

²¹ Heitoubi thir sheemyernei, heirou louhintaang, reitaang heirou chamche-taang marchalyernei manri shekel khatdei siruk'khyumyei siruk'khni khaithutbi pirilkur.

²² Heirouri raal kardourilninungri asitoubi thukkura touri, raalbomra Saul'yei raalluirap hukhatnikhi yaihutra raal-shon nimanung raalchei shinkhi mumaklei; heiya Saul'le aiyei chanapawa Jonathan yakhu-pachayei hutratom raal-shonle raalchei loukyao.

²³ Heisitoubi Philistia'yei raallui rapni rul knaini wathukbini Michmash'yei lamtlunthung louringthatkur.