1 SAMUEL 12 - KHYINGEI PU'TLOU Bible (BSI)

Samuel'ne Israel Rapnung Karkhainei Tlou Yunkhou

¹ Heirouri Samuel'ne Israelrap nammaya shun, “Thilak, nani keinungei shunchakhou tlourap namyerwa heiya keine ninglhakpiwurla; heitoubi keine nanungei Krung khatkhi khalbangpiwurla.

² Heirou asinungri, naimaibongra Krung heiwari mayungbi leiyurame; heiya keiri tarwura, heirou trukkhi pukkura, heirou thilak, keiyei chanapawa rapri nakou kalhonbini leilei. Heirou keine kartlangei waiyoubini angtu tlaini ramphani naimaibongra chawurkhoula.

³ Keiri bi arouwei mayungbi leiyurame, Umpuei maibongra, heirou Aiyei khalthutpikur Krungei maibongra, keidoura yunthutnungei leiyanungri yunthutpilak; keine thimi hukounak khatdei halpa, nimanung gadhaya louheikur leiyurako? Heirou thimi hukounakya mandalpikur, nimanung marhotpikur leiyurako? Nimanung thimi hukounakrei muni loulhakbi keimit deoyerbi tuychanei lhouya touwurkhou leiyurako? Heinaksi touwurkhou leiyuranungri keine namma mallengkhouweise, keinungei yunthutpilaklo.”

⁴ Heirou yani loumallangkur, “Nangni heinaksi mandalnei lhou, nimanung kaidoura marhotnei lhouya, nimanung thimi huikhatdei hutrouwei tuycha-lalchanei lhou touwurkhouri koukhatkhi makme.”

⁵ Heirou ani yanungei kyun, “Naidoura Umpune tloumayung hoipilaksu, heirou nani keihutra koukhatkhi mral phamakura touri Aiyei khalthutpikur Krung heiwanikhi shakhi hoipilaksu.” Heirouri yani loumallangbi kyun, “Umpune shakhi hoipilei.”

⁶ Heirouri Samuel'ne thimi rapnung shun, “Moses'le Aaronya khalthutpikur heiwari Umpu Ahoume, heitoubi ya rapni naiyei patar rapya Egypt ram'rouwei ruithutpikurme.

⁷ Ngam heineri asinungri, nani chutmakni mayunglaklo, kouweiyo toulanungri, keine nanungei Umpuei maibongra Ane naiyei patar rapnungei heirou nanungeikhi toupiwurkhou tharmu chimmei tlou rapya yunpinungei leiyurame.

⁸ Jacob'ne Egyptra yuchangbi paalyei kheenrou, heirou naiyei patar rapni chapni ungraochabi Umpuya trungpina'nungei shunchakur kheen heirouri Umpune Moses'le Aaron yakhuntaya yenyilbini, heitoubi yani naiyei patar rapya Egyptrei ruithutpikur heitoubi yaya bi atamrou paalyerkur.

⁹ Heiya yaneri yaiyei Dunpu, Umpuya malumwurthu; heingammei Ane yayari Hazor'yei Krung Jabin'yei raallui upawa Sisera'yei hutrale, Philistia rapbei hutra, heirou Moab Krungei hutra pilhakkur; heitoubi ya rapni yaidoura raal dakur.

¹⁰ Heirouri yani Umpunung chapni ungraochabi kyun, ‘Kane borh touwurkhoula, ngamri kani Umpuya horbini lakkurkhoula; heitoubi Baal thraile Ashtaroth thraiya khrumwurkhoulame; heiya asinungri, kaya kaiyei yeekna thimi rapbei hutrouwei kalthutpilaklo, heitoubi kani Neiyei watlhou tourouwame.’

¹¹ Heirouri Umpune Jerubbaal'le, Barak, heirou Jephthah heirou Samuel'ya yenmalhetpibi, heitoubi nayari karhillei klei naiyei yeekna thimi rapbei hutrouwei kalthutpiwurbi, nani kyingni paallura.”

Krungbomya Umpu ne Yapikur

¹² “Ammonia rapbei Krung Nahash'ne naya karhani raal kyouya nani loumuyei kheenrou, naiyei Dunpu, Umpune naidoura Krung khoini leipiyabikhi, nani Keinungei, ‘Nimakme, kanungei Krung khat pilaklo,’ toubi shunbini buchakur.

¹³ Ngam heineri, asinungri nani paamni buchakur naiyei khalthutkur Krung heiwari bi arou leiyurame; heirou thilak, Umpune naidoura Krung khat khalthutbini khoupiwurla.

¹⁴ Kounakpi nani Umpuya chi-rikraini aya watlhou toulanungri, heitoubi Aiyei houya ninglhakbi, heirou Umpuei chaylam rapya karhani lhou toumakanungri, nale, heirou naidoura Pu khoini thrungrou kyou Krungnikhi naiyei Dunpu, Umpuya hil-chanthungrou da.

¹⁵ Heiya kounakpi nani Umpuei houya ninglhakmakni, Aiyei chaylam rapya karhani lhou toulanungri, Umpuei hutni nai doura'le naiyei krungei doura karhani touwurkhou heinaksini Aihut heiwari naidourakhi karhani khoupirou.

¹⁶ Ngam heineri asinungri, nani chutmakni mayungbini leilaka; heitoubi Umpune naiyei mit'thrilna maibongra kngakei lhou tourou'kyou heiwaya thilaka.

¹⁷ Angtuei kheen awari gehu trun luklum nimaka? Keine Umpunungei shunchabi heirou Ane lhimnung-martheetang katfyoubini nung royerrouwa. Heirouri nani nanungei Krung khat khalthutpinanungei buchakur heiwari Umpuei mit'thrilna maibongrari kounak tangni lalkurro touri nani ningmurouwa.”

¹⁸ Heisitoubi Samuel'ne Umpuya ungbini shunchakur, heirouri Umpune lhimnung-martheetang katfyouwurbi, heiyei tlainirou nung royerkur; heitounarouri thimirap nammani Umpuyale Samuelyari beimakni chirilkur.

¹⁹ Heirouri thimirap nammani Samuel'nung kyun, “Neiyei shokrap kanungei'tlim neiyei Dunpu, Umpunung shunchapilaklo; heiyanungri kari himakroume; kouweiyo toulanungri, kani kaiyei Krung khat pilaklo toubi shunchawurnarou, kanungei borh duilhakyerwurla.”

²⁰ Heirou Samuel'ne thimi rapya shunkur, “Nari chimaklo, nani heinakei lhangaimak lhouya toukurya hoiyanungkhi, Umpuya hil chanthungnarei mai khreithutdurmak, heiya nai ukning, nai lhawai kyaoni Umpuya watlhou toulaklo.

²¹ Heirou nani lehni kallekthutnung yamakrou; heisi nimanungri, nayakhi kalthutpi manimak, koukhatkhi karsukmak thrailha rapya nani hil chanthungkurkhi kya; ngamri yarap heiri koukhi karsukmak thrairap.

²² Kouweiyo toulanungri, Umpune Aiyei thimi rapyari Aiyei thang-lhangai min heinung'tlim hukhatyakhi khingurkhoumakrou; ngamri Umpune nayari Aiyei thimirap hoiyernanungei beimakni malung pilkhou.

²³ Heiyakhi duinara, keinungeiri, nanung'tlim shunchapimakni leiyuranungri Umpuei bomra keine klal lhou toukurnakura; heiya keine nayari lhangaiya heirou chimya shunmatupirou.

²⁴ Heiya Umpuyatom chi-rikraiyalo, heitoubi naiyei ukning, naiyei lhawai kyaoni Aya tharmu chimni watlhou toulak; kouweiyo toulanungri, Ane nanungei toupikur kngakei lhoutang rapya ningthutlak.

²⁵ Heiya nani thuithiyei lhangaimak lhou rapya heisi toubine leiyanungri, nayakhi heirou naiyei Krungyakhi tlumni maangyerrou.”