1 SAMUEL 11 - KHYINGEI PU'TLOU Bible (BSI)

Saulne Ammonia Rapya Raal Manebi Jabesh Khukarthilya Kalthungkur

¹ Heirouri Ammonia'yei Nahash'ne kabini, heitoubi Jabesh-gilead khukarthilya kulchalbini lukloukur. Heirouri Jabesh'yei thimirap nammani Nahash'nung shunbi: “Kanungei ya'kril tloubom khoupilaklo, heiyanungri kani neidaakra watlhou touweise!” toubine buchakur.

² Heiya Ammonia'yei Nahash'ne yanungei mallangbini loukyun, “Nale ya'kril tloubom khat khouwase toulanungri, tlou thak knaini khouwase, touri Keine Israel rapya rikrai pinanungei, na namyerwaei thyarei mitlung rapya namma kholthutkur yawanungri, keine nakou yarilnei tlou khat kantompirou.”

³ Heirouri Jabesh'yei yama upa rapni anungei loukyun, “Heiyanungri kanungei tlaini eninibilcha ngakpirilak; heirouri kani thimi malhetbini Israellei ram karyouni khulpao chilleise. Heitoubi, kounakpi kheen heiyei rilla thimi hukhatnikhi kaya kalpirou makkanungri, kani neinungei wachangrou.”

⁴ Heirouri paocha thimi rapni Gibe-ah'ra Saul'yei leinara wabini, heitoubi thimirap nammani mayeknungei pao heiwaya washunpikur; heirouri thimirap nammani pao heiya loumayekbi, ya nammani hou chouni ungraobi chapkur.

⁵ Kheen heirouri Saul'ne phailourei halpa rapya yenhulheibini cheemranung hungnarouri, hou chouni ungraokur heiwaya hungmayekbi ani hungkngai, “Thimi rapbei chapkur heiwaya, yanungei koutoukurawo?” Heisi tounarouri yani Jabesh'rei thimi rapbei paoya anungei loushunpikur.

⁶ Heirouri Saul'ne pao heiwaya mayeknarouri, Dunpuei Lhawaini aidoura yongchangurbi mantrangyerkur; heitoubi a heiri kanthi fyouwurbi beimakni malungkhakur.

⁷ Heirouri ani halpa rapya manbini, heitoubi heirapya harhar shatchalkur, heitoubi thimi rapya malhetbini anhar rapya Israellei ram ri karchunna bi karyouni yerchekwurbi: “Thimi huhuni wathukbi, Saul'le, Samuel'yei hilla chanthungmak yaowanungri, aiyei halpa rapyakhi hatdurbi harhar shatchallurou,” toubi paochilkur. Heirouri Umpuei chi'knayei lhou heiwari thimi rapbei doura yongdakur; heitounei thimirap nammani kantlangni ukning khatsi khoini wathukkur.

⁸ Heirouri ani yaya Bazek'ra thimi mshing kansherbi thiyei kheenrouri, Israel'lei thimi mshingri pulni lishing macha-khyum tlung, heirou Judah'yeiri thimi lishing somthum tlung.

⁹ Heirou yaileinara wa'tlungkur pao-ur thimi rapnungei yani loushunkur, “Nane Jabesh-gilead'yei thimi rapnung atoubi hungshunpilak: ‘Ninga-nunghang tlaikallei kheenrou naya kalthutpirou.’ ” Heirouri pao-ur thimi rapni kallengurbi, yani Jabeshyei thimi rapnungei pao heiwaya hungshunpikur, heirouri yari beimakni lounungwaikur.

¹⁰ Heirouri Jabeshyei thimi rapni Ammonia rapnungei washun, “Ningatou tlainirou kani nanungei wachangbini rocharouwa, heirouri nani lhangairoume tou heiya kanungei toupilaka.”

¹¹ Heirouri thangei tlainirouri ningshun manma Saulne raallui rapya rulkhyum thukni khaithutbini, heitoubi ningshun nung katwaarkur heirouri yani Ammonia rapbei rungbom laitamra wachangbini raal dakur, heitoubi Ammonia rapya nunghang tlaikal ramphani shat'hatkur, heitoubi hatnarei kartleithungkur thimi rapri minung-minung trukchekwurbi, thimi hukhatyakhi napung'khni tlungni pulni kartilyermakur.

Saulya Krung Khat Khoini Yapikur

¹² Heirouri thimi rapni Samuel'nung kngai, “Saul'ne kaidoura Krung khat khoini paalrouwa touneiko? toubi yunkhou thimi rapri huhuwo? Hei'urthutlaklo, yayari kani hatrou da.”

¹³ Heiya Saul'ne loumallangbi, “Angturi thimi hukhatyakhi hatnung yamakrou; kouweiyo toulanungri, angturi Umpune Israel rapya lhukthutpinei tlaini.”

¹⁴ Heirouri Samuel'ne thimi rapya shunkur, “Wawalo, kani Gilgal'ra kabini, heitoubi bi heirou kani Krungbom ran khat phunbanglakase.”

¹⁵ Heisitoubine thimirap nammani Gilgal'ra kabini, heitoubi bi heirou yani Saul'ya Gilgal'ra Umpuei maibongra Krung khat khoini khalbaangkur. Bi heirou yani Umpuei maibongra malung damyernei khrumna putkhi makatkur; heitoubi bi heirou Saul'le Israel'lei thimirap nammani langthouni harao-nungwaikur.