1 SAMUEL 10 - KHYINGEI PU'TLOU Bible (BSI)

Samuel'ne Saulya Krung Hoinanungei Shirek Teipikur

¹ Heirouri Samuel'ne Olive shirek kok khat loubini, heitoubi Saulyei lura shungphaangpikur, heitoubi aya machupbi kyun, “Awari Umpune neiya Aiyei thimi Israel rapbei doura Krung hoinanungei mu'kna hutlha khoini shungphaangpikurme.

² Heitoubi angtu tlainirou nangni keirouwei shaalkur hillouri, Benjamin'yei ram Zelzah'ra Rachel'yei lhan pongra nangni napawa napung'khni rorilheirou, heirou yani neinungei pao loushunpirou: ‘Neiyei rapharou chakur kanwaimaangkur gadharap heiri mulame. Heirou asinungri neiyei pawari gadha rapyari ningchamakni, neiyatom ningkardonbi, “Keiyei chanapawa heinung'tlim keiri koutouserousanu!” toubi yunbini leiyura.’

³ Heitoubi nangni bi heiwaya tladuibini, Tabor phaikarrei bok'heengtrung tangwa hungphayeinung, bi heitamrou Bethel'ra Dunpuya khrumnungei kakur napawa napung khyumni neiya lourorillou. Heirou napawa khatni tlanglshun khyumtam urbini, heirou khatpani mumtol tumkhyum urrou, heitoubi napung khatneri darkha yui khang khat urbini louleirou.

⁴ Heirou yani neiya hakraoni lourorilbini karyempirou, heitoubi neinungei mumtol tumkhni loumalanpirou, heirapya nangni yaiyei hutrei loulhakrou da.

⁵ Heihillouri nangni Philistia rapbei raalpal leireh leina'bi Gibeath-Elohim'ra kakarou da. Heitoubi nangni bi heirouwei khukarthilla wachangkurle tallengni, palshungra thimkhuirap rulkhat, taari'le, toutli'le, paasi, heirou sengshek shinbini, Pukhrumna birouwei yongchum heiwaya nangni karthangrou. Heitoubi ya rapni hillei hungthukrou kyou tlou rapya shunthutpirou.

⁶ Heirouri Umpuei Lhawaini neidoura yongchangbini mantrangyerrou, heitoubi nangkhi yakou kalhonni tlou shunthutrou, heirou thimi ran khat khoini hollurouwa.

⁷ Heitoubi heinaksi hutlharap heine neinungei chimni hungthukanungri, neihutni churkarthangkur lhou rapya heisi toulaka, ngamri Umpune neiya kalhonpilei.

⁸ Heitoubi nangni Gilgal'ranung keiyei maibongra louchawalo; heirouri thilak, keine meira pumni hongbini makatnungei, heirou malung damna khrumna put rapya makatnungei neileinara shuimakni yurou. Keine neileinara yubongnung, tlaini eninibil loungaklak, heitoubi nangni kouya tourouwo touri keine yushunpirou.”

⁹ Heirouri Saul'ne Samuel'ya lakkhoubi shaalnanungei heikallekthutyei kheenrouri, Dunpuni aiyei solungya touholkur; heitoubi heiyei hutlharap namyerwa heiri heiyei tlainirou namma hungthukur.

¹⁰ Heirouri yani Gibe-ah Lhungdoura kakayei kheenrouri, bi heirou thimkhuirap rulkhatni aya murilnanungei louklei; heirouri Dunpuei Lhawaini aidoura yongchangpikur, heitoubi akhi yaihangra kalhonbi Pu'tlou shunthutnara yaothungkur.

¹¹ Heirouri asitoubi hungthukkura, touri hallei waiyoubi aya kmu thimi rapni, ani thimkhui rapbei hangra kar'anbine Pu'tlou shunthutbi klei heiwaya munarouri, yani khatle-khat yunkril, “Kish'yei chanapawa Saulnungei thukkur heiwari kouwo? Saul'khi thimkhui khat hoikurako?”

¹² Heirouri bi heirouwei louklei napawa khatni mallangbi loukyun, “Heiya thimkhui rapbei pawa touri huwo?” Heitounei ngamrou heiwani, “Saul'khi thimkhuiya hoikurako?” toubine yailim tlou hoinakur.

¹³ Heisitoubi yani kar'anbi Pu'tlou shunthutya luilhakur hillouri, Pukhrumna bi Lhungdoura kakakur.

¹⁴ Heirouri Saul'yei patulni ayale, aiyei shoknung loukngai, “Nari kouranung chakurro?” Heirou ani loumallangkur, “Kari gadha rap kanwaimangkurya rapharou chakurme. Kane heirapya raphabi muchangmaknarou, Samuelyei leinara wachangkurme.”

¹⁵ Heirou Saulyei patulwani loushun, “Samuel'ne neinungei kou loushunpiyo, keinung bei yunpilaklo.”

¹⁶ Heisi tounarouri, Saulne aiyei patulnungei yunpikur, “Samuel'neri, ‘gadharap heiri phawurlame’ toubine kanungei chimbilni louyunthutpikur.” Heiya Samuel'ne ayari Krung hoinyerwurnei ngamri Saul'ne aiyei patulnungri yunthutpimakur.

Saulya Kulyomei Maibongra Krung Hoiyerkur

¹⁷ Heihillouri Samuel'ne kulyom rapya Mizpah'ra Umpuei maibongra pulni ungkartilkur.

¹⁸ Heitoubi ani Israelyei thimi rapya shun, “Israel rapbei Dunpu, Umpune asitoubi yunleime, ‘Israel rapya Keine Egypt'rouwei ruithutpikurme, heitoubi nayari Keine Egyptbei thimi rapbei hutrouwei, naya thuithini marhotpikur Krungbom raprouwei Keine naya kalthutpikura.’

¹⁹ Heiya angturi, naya thuithini marhotbi klah-mrimnarei kalthutpikur Pu, naiyei Dunpuya nani yapimakni horthutdurla, heiya hoiyanungkhi naneri, ‘Nimakme, kanungei Krung khat khalthutpilaklo’ toubine Anung buchathulei! Ngam heineri asinungri, nani nainai mshani, heirou nainaiyei cheemkhur-bommai hilthungni Umpuei maibongra wachangalo.”

²⁰ Heisitoubi Samuel'ne Israellei cheemkhurrap namyerwaya pulni ungkartilkur; heitoubi meirui khingthibini yaihangrei Benjamin cheemkhurya khalthutloukur.

²¹ Heirouri ani Benjamin'yei cheemkhurya cheemmai kantangya ungkartilbini, Matria'yei bommai'ya khalthutloukur. Heithangrou Kishyei chanapawa Saul'ya khalthutkur; heiya yani aya thiphayei kheenrouri, bi heirouri aya raphamumakura.

²² Heitounei ngamrou, yani Umpunung tlou loubini ngaithikur, “Napawa heiri bi arou wachanglako?” Heirouri Umpune loushunkur, “Thilak, a heiri putyum hangra aitam muni yulbini leileime.”

²³ Heisi tounarouri yani chanlhakbi bi heirouwei aya yenruithutkur; heirouri ani thimi rapbei tlakra hungmayungei kheenrouri, thimi namyeryari ani tlengwa chouduiwurbi, ya deiri aiyei khlabangbilngei.

²⁴ Heirouri Samuel'ne thimirap nammanungei kyun, “Umpune khalthutpikur napawa heiwaya nani muchilako? Tanghakpani thimirap namyerwaei hangrari anaksi thang lhangairi dei hukhatkhi yaomakleino!” Heisi tounarouri thimirap nammani hou chouni ungraobi, “Kaiyei Krungri pulchi hoiniyasu!” toubi paokur.

²⁵ Heirouri Samuel'ne thimi rapnungei Krung khatdei chabomthuk lammit rapya khminni shunmtupikur, heitoubi heirapya lailik thora mayelhakbini, heitoubi heiwaya Umpuei maibongra malanlhakbini khoukur. Heihillouri Samuel'ne thimi rapya hilwurbi ai'aiyei cheemra shalyerkur.

²⁶ Heirou Saul'khi Gibe-ah'ra aicheemra shalkur; heirou yaiyei solungra Umpune thoulhakpikur lhouwarap thakhi Saul'kou kalhonni shaalkur.

²⁷ Heiya karsukmak khril lhangaimak thimirap thaneri, “Heinakpi thimine kayari koutoubi kalpichangrouwo?” toubine kyun. Heisitoubi yani aya manthapimakur, heirou anungei kou hutthulput khatkhi heimalanpimakur. Heiya Saul'neri koukhi tlou hoipimakni mul leipikur.