1 SAMUEL 1 - KHYINGEI PU'TLOU Bible (BSI)

Elkanah Heirou Aiyei Nurap

¹ Bongnung Ephraimei Lhungdou ramrei Ramathaim-zophim'yei yultlaira napawa khat leikhou, heirou aiyei minri Elkanah toubi ung, a heiri Ephraim cheemkhurei Zuphbei chanapawa Tohu, Tohu'yei chanapawa Elihu, Elihu'yei chanapawa Jeroham'ne pukkhou chanapawa khat.

² Heirou Elkanah'yei nukhi napung'khni leikhou; aiyei nutirwiyei minri Hannah toubi ung, heitoubi nukhuwiyei minri Peninnah toubine ungkhou; heirou Peninnah'ri chanao klei, heiya Hannah'ri chanao puk'khoumak.

³ Kheen heirouri napawa heiwani aiyei khukarthil heirouweini Shiloh'ra kumser kabini Umpu'nungei khrumna putrap makatbi khrumchakur. Heitoubi heiyei kheenrouri Eli'yei chanapawa napung'khni- Hophni'le Phinehas'ne bi heirou Umpuei Suipi purap khoini Puwatlhou toubine louklei.

⁴ Heirou Elkanah'ne khrumna put makatleiser, ani ansiruk yenbini aiyei nu Peninnah'nungle, aiyei chanapawa rapnungeikhi heirou chanapuiya rapnungeikhi yerkhaipikur;

⁵ heiya Hanah'nungeiri ane an siruk'khni duine yenpikur, ngamri ane Hanah'yari beimakni malungshikhou; heiya Umpune ayari naokao shullam tipburpi.

⁶ Heirou Umpune aiyei shulkao toutipburnei ngamrou, aiyei naowi Peninnah'ne ayari tekchakhi thimi khoini manthapimakne malung'khanungeidik daimarekpikur.

⁷ Heisitoubi kumserrou Hannah'ne Umpuei Pucheem'ra khrumna put makatnungei kachangliserrou Peninnah'ne aya heisidik thuithini toubine malungkhayerkur, heitounei ngammei ane chapbine, chaamak-maimaknedik leikur.

⁸ Heirouri aiyei shal Elkanah'ne anungei tlou'kngai, “Hannah, nangya koungammei chapkurrawo? Heirou koutounei chaamak-maimakne leikurrawo? Heirou koungammei neiyei lhawai heinak lahkurrawo? Kei awaya neinungeiri chanapawa napung-chipyakhi duine malungshi nimakko?”

Hannah'yei Tlou Kantom

⁹ Heirouri yane nungkhatnuiri Shiloh'ra chaak-an chamaibi luilhakkur hillouri, Hannah kanthoukur. Kheen heirouri suipipu Eli'ne Umpuei Pucheem shumtrumlira omna doura ombine louklei.

¹⁰ Heirouri Hannah'ne aiyei lhawai klahni Umpunung shunchayeinang beimak malung doune chapkur.

¹¹ Heitoubi ane tloubom khat kantombine atoubi kyun, “O Thangwan-Shimlei khintamrekei Pu Umpu, kounakpi Nangne Neiyei shokpuiya keiyei klah-mrimkurya yukmupibi, keiya malumpimakni ningthutpilanungri, Neiyei shok-napuiya keinungei chanapawa khatcha pukyerpilaklo; heiyanungri keine ayari aiyei chaan khatrek khoine Umpunungei makatrou, heitoubi aiyei lurei sham tekkhi ngoupimakne khourou.”

¹² Heirouri asitoubi thukkura, touri ane Umpunung dongnaimakni shunchanarouri, Eli'ne aiyei murpaalya heisi heithibine mayungkur.

¹³ Heirou Hannah'nungeiri aiyei solungra heisi shunchabine, heirou aiyei murpaltom yaapbine leikur, heiya aiyei houri mayekphamak. Heisi tounarouri Eli'ne aya tul malipsame toubine ningchakur.

¹⁴ Heirouri Eli'ne aya heishun, “Nangya kounak tlani tul malipbine leiheirouwo? Neiyei tul kmong heiri dongalo.”

¹⁵ Heiya Hannah'ne loumallangbi kyun, “Nimakme, keiyei upawa! Keiri lhawai klahni thimkur napuiya khatme; keiri koutulkhi mongmak, malipkhi malipmakme; heiya Umpuei bomra keiyei lhawai klah awaya namma shungthutpiwurnei tloume.

¹⁶ Neiyei shok-napuiyawi keiri chorit naimak napuiyame toubi ningchapimaklo; heiya keiri keiyei lhawai lah'atchaknei ngamrou, keiyei ukningrei nungwaimakur heiwaya asilumpha yunthutbini leikurame.”

¹⁷ Heirouri Eli'ne mallangbi loushun, “Heiyanungri lhangaiya, kyingni shaallaka, heirou Israellei Dunpune, nangne Airouwei buchakur heiwaya phor pilaksu.”

¹⁸ Heirou Hannah'ne loukyun, “Neiyei shokpuiya keine neiyei mit'thrilnarouwei kringpi-kheiya phayeise.” Heisitoubi napuiya heiwini shaalwurbi, chaak-ankhi chamaikur; heirouri aiyei mairungra lhawai klah muphamakura.

Hannah'ne Samuel Pukkur

¹⁹ Heirouri yani ningshun manma kanthoubi, heirou Umpuei maibongra khrumchakur; heitoubi yani Ramah'rei klei yaiyei cheemra yenkallengkur. Heirou Elkanah'ne aiyei nu'le rkhum iptilkur; heirouri Umpune Hannah'ya ningthutpikur.

²⁰ Heirouri kumchaan heine hungtlungkur heirouri Hannah nao urwura, heirou ani chanapawa khat pukkurla; heitoubi ani aiyei min Samuel toubi thulpikur, ngamri ani kyun, “Keine anungei'tlim Umpunung shunchakur.”

Hannah'ne Samuel'ya Umpu 'nungei Makatkur

²¹ Heirouri napawa, Elkanah'ne aiyei cheemmairei thimirap nammaya ruibini, kumserrei khoine Umpunungei khrumna putya makatnungei, heirou aiyei tloukantomya tlungyernanungei toubine Shiloh'ra kakur.

²² Heiya heikumrouri Hannah'ri kamakni leithungkur, ngamri ani aiyei shalwanung kyun, “Keiri naoshen achani pirbongyenri kamakhuirou; heitoubi naoshen achani tangbi chuchu khaikur hillou keine aya katruiheibini, heitoubi Umpuei maibongra aya makatrou, heitoubi bi'heirou aiyei chaan khatrek khoini Puwatlhouya toubine leiyerrou.”

²³ Heirouri aiyei shal Elkanah'ne anungei loukyun, “Heiyanungri nangni lhangairoume touheiya toulaka. Naoshen heichaya nu-kmong khaibongyen nangri leithunglaka; Umpune yapikur hoiniyasu.” Heisitoubine napuiya heiwini aiyei cha heichaya nu'kmong khairo'bongyen nao pombine leithungkur.

²⁴ Asinungri ani naoshen heichaya toupirkur touri chuchu khaikur hillouri, ane nao heichaya ruibine kum khyumyei halpa doucha khatle, heirou yamkun Ephah khatle, heirou darkhayui krungkok khatle toubi urbini, aya mandihuiya'nungkhi, Shiloh'yei Pucheem'ranung katruiheibi kakur.

²⁵ Heirouri yani halpadou heichaya hatbine, heitoubi nao heichaya Eli'yei hutra malanlhakpikur.

²⁶ Heitoubi Hannah'ne kyun, “Oh keiyei upawa, nangni ringleihui toubine neiyei shok-napuiya keiyari muroume; Keiri bi atamrou, neiyei pongra mayungbi, Umpunung shunchakur napuiya heirime.

²⁷ Ngamri keine keiyei chanapawa heinung'tlim shunchakur, heirou asinungri Airouwei keiyei shunchakur heiwaya Umpune tlungyerpilame.

²⁸ Ngam heineri keine ayari Umpunungei malanlhakbi aiyei chaankhat'rekkeinung khoine makatkur awariya.” Heisitoubi yani bi heirou Umpuya khrumchakur.