1 PETER 5 - KHYINGEI PU'TLOU Bible (BSI)

Dunpuei Yaorul

¹ Keine upa khat khoine, naihangrei Churchyei upa rapnung buchalei. Keiri Christa'yei klah-knang heinung'tlim tlou mayungpi thimi hoilei, heirou hillou muyerrou kyou thang'al heiroukhi keine siruk dongmalnaeirou.

² Keine naya Dunpune nanungei shilnakur yaorulya shilpi purap hoinanungei buchalei, heirou Dunpune naya hoiyerkni heinakni nane yra thimakni, krakni thikulpina'nungei buchalei. Nane churnei klah-manyatom ningchabi tounimakmama lhou toumakni ukningra krakni ningchabi watlhou toulak.

³ Nanungei thikulpina'nungei pilhakur shul thimi rapbei doura pu hoinanungei wairangmak, heiya yaorullei mulounanungei khoine leiyalo.

⁴ Heitoubi Yaoshilpu Upane yongei kaalnungri, yenmehkur naimak thang'allei lukhupya nane phaeirou.

⁵ Heinakrimne naihangra douwa hoibi klei nanekhi, naithakrei upa rapnung pilhakrou da. Na namyerwane khatle khat watlhou toupirilnanungei ukning khnimya shintlak ruinak raaklak; ngamri Khyingei Lailikne yunlei, “Dunpune tangcha thimi rapyari yapimaklei, heiya ukning marnim thimi rapya Ane yapilei.”

⁶ Heineri naitamni Dunpuei mantrang banrei daakra khnimni leiyalo, heiyanungri Dunpune Aiyei kning kheen heirou naya khangbangpirou.

⁷ Heitoubi naiyei put kharit namyerwaya Anungei khinglhaklak, ngamri ane naya thikulpirou.

⁸ Nane ukning rdamni heirou mukheine karngeibi leiyalo! Ngamri naya karhoubi klei Satan'ne ungraochabi humme'nakne thimi hukhatya madulnanungei karwaichabi leilei.

⁹ Naiyei uklum heiya chetne khoubi heirou satanya maneyermakna'nungei toulak, ngamri tlaipangpal karyouwei klei nai Christen paluirap nammanekhi heinaksi klah-knangya doubi kleime touri nanekhi kmu.

¹⁰ Heiya nane kheen lepcharou klah-knang doukur hillouri, Christara klui naimak thang'alya siruk dongrilna'nungei naya ungthutpikur kringpikhei Dunpune nakou kalhonbi Ahakne naya rongtlungyerbi heirou mantrangyerbi chut naimakrou cheemmun khat thulbangpirou.

¹¹ Ane klui naimak thang'allei mantrangne thrungbi leiniyasu! Amen.

Luilhakna Karyemnei Tlourap

¹² Keine malungamkna Christen khat khoine rikrai khrumpibi klei Silvanus'ne trungpinei ngamrou nanungei chethi thumchane mayelei. Keine Dunpuei chimmei kringpikhei heinung'tlim mayungpi thimi khat khoine naya ukning thoubangpilei. Heine nane tlou heiyei doura chetne mayungbi leiyalo.

¹³ Babylon'rei klei, Dunpune nakou kalhonne ungthutpikur Church'rei thimi rapnekhi nanungei karyemnei tlou bethunglei, heirou keiyei chanapawa Mark'nekhi karyemnei tlouya bethunglei.

¹⁴ Nane khatle khat Christen rapbei malungshirilnei machupkrille kalhonne karyemnei tlouya berillak. Christaei hoibi klei thimirap na nammanungei kying hoiniyasu.