1 PETER 4 - KHYINGEI PU'TLOU Bible (BSI)

Borhya Lakurkhoubi Holkur Rongchan

¹ Christane sharungra klah-knang douwurkhou nakni, nanekhi heinaksi ukningya khalbine naitam mantrangyerlak; ngamri huhuni sharungra klah-mrim doukur thimirap heiri borhyei lhouya toumakrou.

² Heiyanungri, asinung waiyoubi nane tlaipangpalla ringleiyenri sharungei maduni naya kul chalphopyermak, heiya Dunpuei kningni kul chalphopyerlak.

³ Nane youkur kheenrou Gentile rapbei madu lhou rapya touwurkhou heiri rowura. Ngamri nai chaanrou miyei yunkna, chorit naimakne, sharungei kningyadik toubi, chamalip-maimalipbi, chatek-maitekbi heirou Dunpuei machinkna thrailha rapya khrumkhou.

⁴ Heiya asinungri nane yakou kalhonbi heinaksi lamduiyei lhouya toukhounarei dongurnei ngamrou yane ngakurbi, heirou naya thuithini yunkur.

⁵ Heiya khringle khi thimi rapyakhi pichar tounanungei marshikbi klei Dunpuei maibongra yai touwurkhounei ngam namyerwa pibaangeirou.

⁶ Heitounei ngammei Lhangaiyei paolaa heiya hikur thimi rapnungkhi, heirou thimi kantangyakhi pichar toupikur heinakni, yai sharungni ringei kaallei pichar toupikur thimi rapnungeikhi shunthutpikur; Pao-laa heiri Dunpuei ringbi kleinakne yanekhi lhawaira khring chaanya phananungei shunthutpikur.

Dunpuei Hutthul Rapya Lhangaini Yreng Thimirap

⁷ Put namyerei hungdongna'nungei kheenri nakkura. Heini nane shunchabi klei manenanung naimshane kulchalbi mukheine leirou da.

⁸ Lhouram nammaei doura lilkhoiri, nane khatle-khat lhawai kyaoni malungshirillak, ngamri malungshiril heine borh namyerwaya makhubphopkur manerou.

⁹ Heitoubi nane khatle-khat yorcharilmakni picha-pimainei lhouya tourillak.

¹⁰ Heitoubi thimi kantangni Dunpuei lailini pikur hutthul rapya lhangaini yrengcha thimirap khoine, ane Dunpurei phaloukur lhangaiyei hutthulrap heiya thimi deinungeikhi lhangaina'nungei yrengcharou da.

¹¹ Huhuni paolaa shunthutpi hoiyanungri, ane Dunpuei paolaa rapya shunthutpirou da; heitoubi huhuni watlhou toupiya hoiyanungri, Dunpune aya mantrangyerkur heiyei hilthungne ane watlhou toupilaksu, heiyanungri lhou kantangrou Jesu Christa'yei minra Dunpuya mathangkur hoirou, ngamri anungei thang'alkhi heirou mane-mantrangkhi klui naimakne hoibi leilei. Amen.

Christen Khat Khoine Klah-Knang Dou

¹² Keiyei paluirap, bongei louyouna'khoumak lhouthuk khoine nanungei ukningya marshakthinei klah-knang hungei kaalnung nane ngakurmak.

¹³ Heinung'chumri, Christaei klah-knangra nanekhi siruk dongmalkname toubi nane nungkngai hoilak, heiyanungri aiyei thang'alya muyerrei kaalnungri naiyei nungkngai heiri hakraone thimrou.

¹⁴ Heitoubi naya rikrai phayerkur hoiyanungri nungkngai hoilei; ngamri nari Christaei hilthung thimi rapme; ngam heine thang'allei Lhawai touri Dunpuei Lhawaine naidoura yongchumpilei.

¹⁵ Heitoubi naihangra thimi hukhatne klah-knang doukur hoiyanungri, aiyei klah-knang doukur heiri thimi hatnei, nimanung mucha-mumainei, nimanung klallei lhou tounei, nimanung miya karhourilna'nungei lhou tounei klah doukur hoimakniyasu.

¹⁶ Heinung tlimri naiyei klah-knang doukur heiri Christen khat hoinei ngammei hoiniyasu, heirouwei nane rikrainung bomri kou khatkhi makrou, heiya nane Christaei minnung'tlim douwurnei Dunpuya mathangkur hoiniyasu.

¹⁷ Pichar touyouna'nungei kheenri yennakura, heirou Dunpuei thimi rapya lamkrini pichar tourou. Heitoubi pichar heiri kanungei touyoukur hoiyanungri, Dunpuei lhangai paolaaya uklummak thimi rapnungei koutoubi hungdongleiyo?

¹⁸ Khyingei Lailikrei kyunnakni, “Tharmu klei thimi rapyakhi klahni kalpikur hoiyanungri, Dunpuya shak mumakne heirou borh thimi rapnungri kouthukrou?”

¹⁹ Heineri, Dunpuei kning hilthungne klah-knang doubi klei thimi rapne, chimmei lhouya toubi, heirou yaitamni sheempipu Dunpu'nung pilhakbine kheenserrou uklumle kalhonne lhou toubi leilei.