1 PETER 1 - KHYINGEI PU'TLOU Bible (BSI)

¹ Jesu Christaei Paocha thimi Peter airouwei- Pontus, Galatia, Capadocia, Asia heirou Bithynia'yei khokulrap karyoune trukchekurbi, heirou ramtaangbi klei Dunpuei ungthutkur thimi rapnungei chethi aya mayepilei.

² Nari Pawa Dunpuei kning hilthungne khalthutpikur, heitoubi Aiyei Lhawai Khyingni naya Jesu Christa'ya hilthung thimirap hoiyernanungei, heirou Aiyei heeni marthingpiwurbi khying thimirap hoiyerwurla. Kringpi kheile kyingni naidoura thimni leipiniyasu.

Khringei Malungam

³ Dunpu heirou kaiyei Pu Jesu Christaei Pawaya kane mathangase! Ngamri Ane Jesu Christa'ya khirouwei ringthutyerbi Aiyei kringpikhei heine kanungei ran chaanya piwurla. Heineri kanungei khringei malungam leiyerlei,

⁴ heitounei ngamrou Dunpune Aiyei thimi rapnungei marshikbi khoupikur kwat naimak phorya phananungei kane mit'thrilbine leilei. Ane phor heiwaya maangkur, chulkur naimakna, heirou trimkurkhi naimakna bi thangmunra khoupilei.

⁵ Heinaksi phor heiri uklumnei ngamrou Dunpuei mantrangne hungrou kyou tlainirou phayernungei marshikbi khoukur Ralthutpina bom heiwari.

⁶ Heirou nane asinung klah-knang limlim dounei ngamrou lepcharou naya lhawai lahyerbikhi, heinung'tlim nane haraolak.

⁷ Heinaksi klah-knang heine naiyei uklumya rong tlungyerou. Maangkur kya sina heiyakhi meine marshakthi; heirou sinayakhi duine manklu neiyei uklum heiya marshakbi thiheirou, heiyanungri nane kanthrambi doueirouhui. Heirou Jesu Christa'ya muyernei Tlainirou naya mathangpi, thang alkyer heirou rikrai-khrumpi heiya nane phaeirou.

⁸ Nane muthungmanungkhi, Ayari nane malungshilei; heirou asinung nane Aya mumaka'nungkhi, nane Aya uklumlei. Heingammei nane murnikhi yunchangmakei hakraoya thang'alle kalhonne haraolei,

⁹ heirou nane Aya uklumnei ngammei phabomthuk nai lhawaiya Ralthutpina bom heiya nane phawurla.

¹⁰ Heirou anaksi Ralthutpina bom heiyei ngamrou thimkhui rapne mukheine ngaiphabi heirou raphathutbine, heitoubi Dunpune naidoura kantompikhou hutthul heiyei ngamrou yane shunthutkhoupi.

¹¹ Yane kheen heiri koukaalnung hoirouwo, heirou koutoubi hungrouwo toubi raphathutnanungei toukhou. Heitoubi Christaei klah-knang dourou kyou, heirou heiyei hillouri thang'alya phaeirou toubi Christaei Lhawaine yai ukningra tlou mayungpi khoine kheen heihakrou shunthutkhoupi.

¹² Dunpune thimkhui rapnung muyerpikhou touri yai touwurkhou lhou heiri yaitamyei tungchananungei nimak, heiya nanungei, heirou yai shunthutpikur tloubomrap heiri thangmunrei yenmalhetkur Lhawai Khyingei mantrangne Lhangaiyei Pao-laaya shunthutpikur thimi raprei nane asinung mayekurla. Heitoubi tloubomrap heiyei ngamrou Thangring rapnekhi mulhaknine leilei.

Khyingei Chaanra Ringnanungei Ungthutpikur

¹³ Heiyanungri, nai ukningra lhou khoine touthutna'nungei ningmarshikbi leiyalo. Heirou nane mukheine leibi Christa'ya muyerninung nanungei phayerrou kyou phoryei doura nai malungam heiya phunkhoulak.

¹⁴ Dunpuei shunya kning thimirap hoiyalo, heitoubi naiyei chaanrap heiri nane muheibongei nai sharungei madukhou lhou rapne maneyermak.

¹⁵ Heinung tlimri naya ungthutpikur Dunpune khying nakni, naiyei toubi klei lhourap nammarou khying hoiyerlak.

¹⁶ Ngamri Khyingei Lailikni yunlei, “Nane khying hoiyalo ngamri Keiri khying.”

¹⁷ Thimi namyerya ai'aiyei toukur lhou rapbei hilthungne lingkhat khoine pichar toupibi klei Dunpuya nane shunchayei kaalnung Pawa toubine unglei; heiyanungri tlaipangdou arou nai chaanni ringliyenri Aya chi-rikraini leiyalo.

¹⁸ Kouweiyo toulanungri, nai nutar-patar rapbei yenkanlunkur koukhi karsuknamak rongchanyei lhourap'rouwei naya kalpinanungei kounaksi klah-manya piwurkhouwo touri nane kmu. Heiyei klah-man heiri maangkur kya lapa nimanung sina naksiri nimak,

¹⁹ heiya klah-man heiri koukhatkhi msei naimak heirou myek koukhatkhi mak yaoshun heinakne, man kluei makatpikur Christaei hee heirime.

²⁰ Ayari tlaipangpal sheemthutbongei waiyoubi Dunpune khalthutdurkhou, heiroubi angtu kluiyei tlaini raprou Ayari nanungei'tlim muyerwurla.

²¹ Nane Aiyei ngamrou Aya khirouwei ringyerpikur heirou Anungei thang'al phayerkur Dunpuya uklumlei; heitounei ngammei nai uklum, heirou malungam heiri Dunpunung tinbine khouwurla.

²² Asinungri nane chimya hilthungnei ngamrou naimsha naitamya marthingyernala, heirou naiyei uklum palui rapya ukning khyingei malungshirilnei bomra hungchangura, heineri nane toukarsa toumakne khatle-khat naiyei ukning nammane malungshirillak.

²³ Ngamri nari maangkur kya pui-pa rapbei pukpikur'naksi nimakne, kmaang naimak pui-payei chanao naksi, Dunpuei khring heirou klui naimak Tloulhangra naya pukpiwurla.

²⁴ Khyingei Lailikrei kyunnakni, “Tlaipang thimi namyerwari heengna-rona naksi, heirou yai thang namyerwa heiri heengpar-rampar naksi. Ngamri heengna-rona rapne trulleirou, heirou parne kimmeirou,

²⁵ heiya Puei tloulhangri klui naimakne leithungeirou.” Tlou ari nanungei shunthutpikur Lhangaiyei Pao-laa.