1 JOHN 3 - KHYINGEI PU'TLOU Bible (BSI)

Dunpuei Chanaorap

¹ Thilak, Pawane kaya kounakbil malungshipilei! Ane kaya kalthi malungshipi touri kayari Dunpuei chanao rapme toubine ungpilei-heirou kari heihakya hoilei. Heirou tlaipangpalni Dunpuya shak mupimaknei ngamrou, kayakhi shak mupimakura.

² Keiyei malungshi'kna paluirap, asinung kari Dunpuei chanaorap hoiyura, heiya kaiyei tanghakpaei hoirou kyou heihakri asinunghakri kanremakhui. Heiya kane mulei touri Christa'ne yongei kaalnungri kakhi Anakrim hoiheirouhui, ngamri Upawaei hoibi klei shakrung heihakya kane muphaheirou.

³ Christara anaksi malungam klei thimi kantangni, ai'msha-aitamni Christaei khying heinakni khyingne leirou.

⁴ Huhuni borhyei lhouya toulanungri Dunpuei chaylamya toubai thimi, ngamri borh heiri chaylamya baikyer.

⁵ Nane kmu touri Christa'ne paapya urpinanungei yongpikur, heineri Anungei koukhi paap mak.

⁶ Heineri Christakou kalhonbi klei thimi kantangni kallengni paap toumakrou; heiya paapbei lhoura kallengni toubi klei thimi kantang heiri kouniroukhi Aya mumakhui, nimanung uklummakhui.

⁷ Keiyei chanaorap, thimi hukhatnekhi naya minamyermak! Chimyei lhoutou thimi heiri Christaei chimnakne, akhi chim thimi.

⁸ Paapbei lhouya heisi toubi klei thimi heiri Satanyei hoileihui, ngamri Satanri kyou'rouweine paap toubi klei. Ngam heinung'tlim Satanyei touwurkhou lhouya maangyernanungei Dunpuei Chanapawane yongpikur.

⁹ Dunpura pukkur thimi rapne paapbei lhouya kallengni toumaklei, ngamri Dunpuei Lhawaine aiyei rilla karyom leinei ngammei ane paapbei lhou touchangmak, ngamri Dunpuri aiyei Pa hoibi klei.

¹⁰ Asitoubi Dunpuei chanao raple Satanyei chanao rapbei tlakra kartlikril klei. thimi hukhatne chimmei lhouya toumakanungri, nimanung aiyei teinao rapya malungshimak thimi heiri Dunpuei chanao nimaklei.

Khatle Khat Malungshiril

¹¹ Ngamri kyou'rouwei nai mayekloukhei paolaa heiri ariya, touri. kane khatle khat malungshirillou da.

¹² Kari Cain'naksine hoimakrou da; ari lhangaimak thimi hoinei ngamrou aiyei pukmalkna naowa Abelya hatkur. Koutounei Cain'ne aya hatkuro? toulanungri, ai'mshaei touwurkhou lhou heiwari chimmak, heiya aiyei naowaei touwurkhou lhourap heiri chimlhou hoinei ngammei.

¹³ Heineri keiyei teinaorap, tlaipangpalni naya machinlanungri nane ngakkurmak.

¹⁴ Kouweiyo toulanungri, kane mulei touri kane khiya lakurkhoubi heirou khring chaanra wachangura; kane heiya kmu ngamri kane kaiyei teinao rapya malungshi. Huhuni aiyei teinao rapya malungshimak thimi heiri khiyei mantrang daakra leileihui.

¹⁵ Heitoubi aiyei teinao rapya machin thimirap heiri thimihat thimi, heirou nane kmu touri thimihat thimiyei rilla kouniroukhi klui naimakei chaanri makrou.

¹⁶ Asitoubi malungshiyo touri kouweiyo toubi kane kmu. Christane Aiyei chaanya kanungei piwurla. Heiyanungri, kanekhi kai teinao rapnung'tlim kaiyei rongchanya pibom thuklei!

¹⁷ Heitoubi tlaipangpallei dun thimi khatne aiyei teinao rapbei klah-knangya mubine heirou aiyei ukningra teinaowaya karhalne ningchalanungri, anungei Dunpuei malungshi kleime touri koutoubi ane yunchangrou?

¹⁸ Keiyei chanaorap, kaiyei malungshi awari maleitomne heirou murrei yunthut tloulhangratom hoiyermakase; heiya lhouni mutmane chimmei malungshi heiya hoiyerrase.

Dunpuei Maibongra Krakni Lhoutou

¹⁹ Heiyanungri, asitoubi kane mueirouhui touri kari chim thimi; asitoubi kane Dunpuei maibongra kaiyei malungam hoiheirou.

²⁰ Heirou kai ukningrei shingkheine kaya klal dayerlanungri, kane mulei touri Dunpuri kai ukningyakhi duini tanglei heirou Ane put namyerwaya muchilei.

²¹ Heineri, keiyei malungshi'kna paluirap, kaiyei ukningni kaya klal dayermakanungri, kane Dunpuei maibongra krakni lhoutou manerou.

²² Heirou kane Anungei buchakur namyerwa heiya kane phachilei, ngamri kane Aiyei chaylam rapya chanthunglei, heirou Aya pilyernanungei lhouya toulei.

²³ Heirou Aiyei chaylamri ariya touri Christane kanungei chay piwurkhounakni, kane Aiyei Chanapawa Jesu Christaei minra uklumbi heirou khatle-khatle malungshirillou da.

²⁴ Huhuni Dunpuei chaylamya hilthung thimine Dunpu'le kalhonne leirou, heiyanungri Dunpune akou kalhonbi leirou. Heirou Dunpune kanungei pikur Lhawai Khyingei ngamni kane kmu touri Dunpune kakou kalhonbi leilei.