1 JOHN 1 - KHYINGEI PU'TLOU Bible (BSI)

Khring Chaanyei Tloulhang

¹ Kyou'rouwei louklei khring chaanyei tloulhang ngamrou kane nanungei mayepiwurla. Tloulhang heiwaya kane mayekkurla, heirou kaimitne heiwaya muwurla; moi, kane heiwaya muwurla heirou kaihutni heiwaya palphawurla.

² Heirou khring chaan heine mitne mumane hoiyei kaalnung, kane heiwaya muwurla, heingammei kane yunpilei, heirou kanungei muyerkur Pawale kalhonbi klei klui naimak khring chaan heiyei ngamrou kane nanungei yunpilei.

³ Heirou kaiyei mukurle mayekkur heirapya kane nanungeikhi yunthutpilei, heisitoubi kane Pawale Aiyei Chanapawa Jesu Christakou kalhonbi klei heinakni nanekhi kakou pulni leimalnarou.

⁴ Tloubomrap awaya kaiyei hakraoya rongtlung hoinanungei toubi nanungei mayepilei.

Dunpuri Kwaar

⁵ Asinungri Aiyei Chanapawarei mayekloukur paolaa heiya asitoubi shunthutpilei. Dunpuri kwaar heirou Anungei kmeh touri koukhatkhi mak.

⁶ Heiyanungri, kane Akou kalhonne kleime toubi yunbine kmehra heisi leiyanungri, kari kaiyei tloulhang rapra, heirou kaiyei lhou touthutnarakhi khintamrekra mandal hoilei.

⁷ Heiya Ane kwaarra klei heinakne kanekhi kwaarra leiyanungri, kane khatle khat leimalkna hoirou, heirou Aiyei Chanapawa Jesuei heene kaiyei borh nammaya marthingpi hoirou.

⁸ Kounakpi kari koukhi paap makme toubi kane yunlanungri, kai'msha kaitamya minamkna, heirou kanungei chimmo touri koukhi mak.

⁹ Kounakpi kane kaiyei borhya shunthutlanungri, Ari malungamna kya, heirou tharmu chim; heirou kaiyei borhya kukpibi heirou kaiyei tharmu chimmak namyerouwei kaya marthingpirou.

¹⁰ Heiya kane borh koukhatkhi toumakme toubi yunlanungri, kane Dunpuya mandal hoiyerlei, heirou Aiyei tlou heiri kai ukningra maklei.