Zefaniya 1 - Amazwi Yakwe Leza 2013

¹ Mu manda yakwe Yosiya, umwana wakwe Amoni, umwene waku Yuda, Yawe wapile Zefaniya amazwi. Zefaniya wali umwana wakwe Kusyi, umwana wakwe Gedaliya, umwana wakwe Amaliya, umwana wakwe Hezekiya.

Uwanda wa upinguzi wakwe Yawe

² Yawe wavwanga wati, “Ndonona ivintu vyonsi ivya pano nsi.

³ Ndonona antu ni nyama kwene. Ndonona ivyunyi vyamu lwelele nga ni nswi zyamuli yemba. Antu aipe ndayawisya. Ndonona mitundu ya antu kuti patakasyale umuntu nanti wenga pano nsi. Avino Yawe wavwanga.

⁴ “Ndakonzolola ikasa lyane kuti mvunuke antu amu Yuda na onsi aikala mu Yelusalemu. Ndonona vyasyala vyonsi vyakwe Baali apa ncende ii. Kusi nanti umwi wino aliusya yasimapepo yano yakamutumikila.

⁵ Ndonona yayo akakwela apa mapaala yao nu kupepa ilanzi, umwezi ni ntanda, yayo akati yakapepa Yawe nu kulapa umwi zina lyakwe, lino yene yakulapa mwi zina lyakwe Moleki.

⁶ Ndonona yayo amfutatila yano yata ukundondela, nupya yasiiza kunondi nanti ukunguzya kuti njatungulule.

⁷ Mwikale cele pa manso yakwe Yawe Simwandalali! Pasi pano uwanda wakwe Yawe wati upalama. Yawe wateyanya impolelwa. Wene wapaatula antu yano waama.”

⁸ Yawe akuti, “Pa wanda kwene uo uwa mpolelwa yane indavunuka intunguluzi na ana ya mwene na yayo yonsi akalondela intambi zya inamasi.

⁹ Pa wanda kwene ulya indavunuka yayo yonsi akapepa wa inamasi, yayo akaiya, akakoma auze, kuti yazuzye ivisampwe umu ng'anda ya kaluwi kaleza kao.”

¹⁰ Yawe wavwanga wati, “Apa wanda ulya muluvwa inkuuta uku Mpongolo ya Nswi iyamu Yelusalemu, muluvwa impoma ikufuma kwi pamba lipya ilya musumba, muluvwa ni ntinti zikalamba ukufuma mu twamba.

¹¹ Mwe muno mwikala umwi pamba lya mwisika lya mwamba, lino muluvwa ivintu vivyo muce mupomole impoma, pano aculuzi yonsi yalafwa.

¹² Apa nsita iyo ndatoola ulukozyo ince nje mukunengula umusumba wa Yelusalemu. Ndavunuka antu atasakamalapo nanti cimwi, akaikala mu musango uno aeneco yakulondelamo, yao akaelenganya iyati, ‘Awe Leza atalacitapo icintu nanti cimwi, icisuma nanti iciipe kwene.’

¹³ Ala ivyuma vyao vilasampwa, nga na mang'anda yao yalaongololwa. Amang'anda yano yakuula yatalikalamo foo. Na matingi yano yalima yatalamwako waini wayako, awe.”

Uwanda ukulu wakwe Yawe

¹⁴ Uwanda ukulu wakwe Yawe uli mupipi, watiupalama, ala pasi pakukalauka ukufika! Uvwini! Uwanda ulya uwanda wa malanda nu kulilizika, pano ni vita viposye vilapunda tutulwe.

¹⁵ Uwanda uo ulaya uwanda wa ukali, ulaya uwanda wa malanda nupya uwa cililizi, ulaya uwanda umwi uwa ononyi, nupya uwa cimvulunganya, ulaya uwanda wa mfinzi nayo ifitisye fititi, ulaya uwanda wa cifutika nupya uwa cipunga icikulu.

¹⁶ Uwanda kwene ulya ulaya uwakulizyamo intandala, nupya uwa kawele ka nkondo, kako akalacitwa ni vita ivilalwisya imisumba ya malinga ni mpungu izitali.

¹⁷ Yawe wavwanzile ati, “Nemo ndaponyezya antunze impungo, cakuti yene yalapuputa wa mpafu, pano yene yiifya kunondi. Uwazi wao ulakonkoloka wakwe mulamba, ni vyala vyao vilaolela apambiliwili wakwe citindi.”

¹⁸ Siluva wao wensi na zaabu wao wensi, vilaposiwa ukuyapususyako pa wanda uno Yawe alayafokela ukali ukali. Icipyu cakwe cino cilalunkuma wa moto, cilonona insi yonsi, pasi pano mukupumikizya wene alalovya antunze yonsi aikala pano nsi.