Zakaliya 7 - Amazwi Yakwe Leza 2013

Yawe wakanya kuizilizya ukulya ukusi kwampomvu

¹ Mu mwaka walenga ini wakuteeka kwa Mwene Dalyusi, pa wanda walenga yani mu mwezi walenga fundimbali, umwezi wakwe Kisilevi, Yawe avwanga kuli Zakaliya.

² Aina Betele yatumile Syalezeli na Legemu Meleki pamwi na antu yao ku Ng'anda ikulu yakwe Yawe Wamaka yonsi ku kuya mupapata.

³ Yaile ku kuyauzya yasimapepo na yakasema yati, “Uzye tumatwalilila sile ukulosya pamulandu wakononwa kwa Ng'anda ikulu yakwe Yawe nu kuizilizya ukulya mu mwezi wakwe cisano ndi muno tukacitila pa myaka ivule ndi vii?”

⁴ Lyene izwi lyakwe Yawe lyamfikile ne Zakaliya.

⁵ Atandika nu kunena ati, “Nena antu yonsi mu mpanga, unene na yasimapepo kwene ukuti lino yakuizilizya ukulya na lino yakulosya mu mwezi walenga cinimbali, apa myaka amakumi cinimbali yonsi ino yapita, uzye apamulandu wakwe nene, acino mwacitilanga cico?

⁶ Lino mwalyanga nu kumwa, uzye asi mwemwe kwene mwaililanga nu kuimwela?

⁷ Uzye amazwi yaa yasi yano Yawe wavwanzile ukukanwa kakwe yakasema ampiti, lino antu yikalanga umutende mu Yelusalemu nu mu misumba yamu mbali, lino mu Negebu nu mu mpanga ya misana ya twamba twaku uwondaka mwali antu?”

⁸ Yawe alanda nupya kuli Zakaliya ati,

⁹ “Yawe Wamaka yonsi wavwanga wati, ‘Putulini imilandu nu ulungami wa cumi. Nupya cila wenga aye nu luse na mizu ku muntu muze.

¹⁰ Mutacuzya yamukamfwilwa na ana asyale, na aenyi ainamasi aikala kuno muli. Mutacuzya na apina kwene. Nupya mutapanga mu mwenzo inu ukucuzyanya.’

¹¹ “Lelo antu nayo ku mufulo sile yakana ukuuvwa, yene ku kutalama kwao sile, yakana ukwika amano kuli vii vyonsi.

¹² Yumika imyenzo yao iya ndi wi we. Nupya yatakasi kuuvwa nanti ukusakamala kuli vino Yawe Wamaka yonsi akuyasunda, lilyo lyonsi lino wayatumilanga yakasema yakwe, pakuti yasema amazwi yakwe ukufuma na pampiti. Fwandi Yawe Wamaka yonsi nawe ali pakuyasokela.

¹³ Yawe Pali pakuvwanga ukuti antu yakwe ndi yasikuvwa vino akulanda, awe cumi nawe atalauvwa vino yalamupapata.

¹⁴ Pali pakuvwanga ati, ‘Uli mulandu kwene ukalenga ukuti nasalanganyizizya antu yane mu mpanga zya inamasi. Mpanga itaizipila apali pakuisyalila amapooli, umwaula nanti umwi wakwikalamo.’ ”