Zakaliya 4 - Amazwi Yakwe Leza 2013

Cilolwa ca cakutekapo inyali

¹ Lyene umungeli wino twalanzile nawe pakutandika, wizile nupya nu kwiza njiukizya ne Zakaliya, kwati umuntu wino yazyula ku tulo.

² Alino anguzya ati, “Uzye icani cino ukulolekesya?” Nga nani imwasuka inti, “Nkulolekesya cakutekapo inyali, naco cili sile cakwe zaabu mutuputupu, nkulolekesya na pa musazi wa mafuta uli papela yakweco, nga ni nyali penepo cinimbali. Inyali zyonsi yonga yonga zyakweti vipongo vya utambi cinimbali.

³ Mumbali yakweco kuliko imiolivi iili, onga imbali yuze uze nao imbali yuze.”

⁴ Nga alino nani nuzya umungeli inti, “Uzye ivintu vii vilozile mwi?”

⁵ Mungeli wilya aasuka ati, “Uzye fwandi utamanyile?” Nani inti, “Awe, ntamanyile?”

⁶ Acino umungeli wilya anena amazwi yakwe Yawe Wamaka yonsi kuli Zelubabeli akuti, “Ivilacitika, asi ku maka ya vita ukulalenga vicitike, nanti asi ku maka yako foo, lelo vilacitika sile ku maka ya Mupasi wane.

⁷ “Nanti pace paye intazi uli, nemo ndalenga ukuti ukacimvye. Awewe ulankuulila cipya cipya Ng'anda yane ikulu, awewe nupya ulika ni iwe ilyapa nsonsi, lilyo na antu yalapunda yati, ‘Eya, kalukuwala! Kalukuwala!’ ”

⁸ Nupya Yawe wanenyile icintu nacuze ati,

⁹ “Zelubabeli watatandika ukukuula umufula wa Ng'anda kwene ii ikulu, nu kumala ali wino alamala. Lino Ng'anda iyo ilasila, alino antu yane yalasininkizya ukuti fwandi nene Yawe Wamaka yonsi nakutumile kuno yali.

¹⁰ Umu cumi, antu yasikusansamuka pakulola vino Zelubabeli akwangalila umulimo wa kunkuulila Ng'anda yane ikulu.” Umungeli wanenyile ati, “Inyali ali manso cinimbali yakwe Yawe yano akalolelako insi yonsi.”

¹¹ Lyene nani inuzya umungeli wilya inti, “Ngi miolivi ilya iili ino ili kuli ndilo nu kwimani lya cakutekapo inyali, nayo iyacani?

¹² Ni misambo iili ilya ya miolivi ino ikutonezya amafuta mu mipaipi yakwe zaabu, mumo muno amafuta yakukonkoloka, uzye nayo iyacani?”

¹³ Nawe umungeli wilya angasuka ati, “Uzye fwandi utamanyile?” Nani inti, “Awe mukwai ntamanyile.”

¹⁴ Umungeli nawe ati, “Antu yaa yaili ali yano Yawe umweneco wa nsi yonsi wapaka amafuta nu kuipaatwila pakuti awino yaombela.”