Zakaliya 2 - Amazwi Yakwe Leza 2013

¹ Lyene insanzula amanso, nga nupya indola umuntu alemile umwando wakupimilako mu minwe yakwe.

² Nga nuzya inti, “Uzye aukwi kuno ukuya?” Nawe aasuka ati, “Nkuya ku kupima umusumba wa Yelusalemu, kuti imanye ukusalala nga nu utali wauko.”

³ Lyene umungeli wilya wino walandanga kunondi ansya, nga umungeli muze aiza ku kumukomenkanya.

⁴ Umungeli wankolelo wilya anena umuze ati, “Simula ukanene umulumendo wilya wino akweti umwando wakupimilako uti, ‘Mu musumba wa Yelusalemu mulaya antu avule nga ni viteekwa vivule cakuti utalakwata amalinga.’

⁵ Yawe wavwanga ukuti aliwe umwisikulu alaya ilinga lya moto ukulizizya umusumba ulya, nu kuti acingilile umusumba nga nu kwikala mwenemo mu lulumbi lwakwe.”

⁶ Yawe wavwanga wati, “Izini! Izini! Utukini mufume mu mpanga yaku katutu. Pasi pano nemo natimusalanganyizizya ku miza ini ya kwiyulu.

⁷ Izini, muutukile ku Zioni, mwemuno mwasenzilwe mu uzya ku kwikala mu Babiloni.

⁸ Ali wensi uwazanza mwemwe ala wazanza icintu ca mutengo ukulu cuze kunondi.” Acino Yawe Wamaka yonsi uwantumile ku nko zino zyasamfile ivyuma vya antu yakwe kuti nkazinene inti,

⁹ “Ne Yawe ndapezya antu yayo, nga lyene yalamusampa ivyuma kuli yao atatazile iyaya azya kuno muli.” Lino cico cilacitika, alino lyene umuntu ali wensi alamanya ukuti Yawe Wamaka yonsi aliwe wantuma.

¹⁰ Yawe wavwanga wati, “Umilini tupundu nu kusansamuka mwe ina Yelusalemu, pasi pano niza umu kwikala pakasi kinu!”

¹¹ Mu nsita kwene iyo antu ya mitundu avule yaliza kuli Yawe, uku kuya antu yakwe. Nawe alaikala apakasi kinu, nu kwiluka muliluka ndi vino Umweneco Wamaka yonsi aliwe wantuma kuno muli.

¹² Nupya nalyuze, Yawe alatengela Yuda ukuya wacuma cakwe mpo, icaya umu mpanga yamuzilo, nga lyene Yelusalemu aliwe alaya umusumba wakwe utemwikwe ukuluta pali yonsi.

¹³ Mwe antu mwensi si myalalini sile apa manso yakwe Yawe! Pasi pano awiyo watavwandamuka ukufuma umu cifulo cakwe icamuzilo, akwiza kunotuli.