Zakaliya 14 - Amazwi Yakwe Leza 2013

Yelusalemu ni nko zyuze

¹ Lolini, uwanda wakwe Yawe ukwiza, lilyo lino ivisampwe vinu vilankanyiziwa apakasi kinu.

² Ndakonganinka antu amu nko zyonsi kuti yize ku kuzanza umusumba wa Yelusalemu. Yene yalapoka umusumba uo nu kunyenkana ivyaya mwenemo nga nu kulema pa maka anaci aya mwenemo. Citika wa antu amu musumba ulya yalayasenda mu uzya, alasyalapo yene yatalayazinga mu musumba foo.

³ Lyene Yawe nawe alakatuka, nu kuyalwisya antu yayo, ndi vino wacitanga na pa mpiti.

⁴ Pa nsita iyo wene alimilila pa Mwamba wa Miolivi, uwa uwalungatana nu musumba wa Yelusalemu lwaku ufumondaka. Nu Mwamba wa Miolivi ulalepuka pakasi, ukutandikila ku ufumondaka mpaka nu ku uwondaka. Fwandi palaya iciposi wakwe cimwi. Icipande conga ca mwamba cilaya uku katutu ni cuze naco uku kayeya.

⁵ Pakuutuka mwemo mulafyonsya mu ciposi kwene cico ukufika ku lusansa longa mpaka ukulambila ku lusansa luze lwa mwamba ulya. Mulutuka ndi vino ivikolwe vinu vyutwike lino pizile cilundumusi, pa nsita ino umwene Uziya wateekanga mpanga yaku Yuda. Yawe witu aliza aloleke pamwi na angeli yakwe yonsi.

⁶ Kutalaya impepo nanti sile icifutika pa wanda uwo, nupya kutala ukwila.

⁷ Ulaya uwanda wa kasanya sile, kasanya kalawala nu usiku kwene. A Yawe Leza wenga sile uwamanya lino uwanda uo ulafika.

⁸ Wanda ulya ndi waca wafika mu musumba wa Yelusalemu mulafuma amanzi ya umi, yamwi yalaya kuli Yemba Mufwe, yauze nayo yalaya ku uwondaka kuli Yemba wa Adiliya. Amanzi yayo yalapita ukuzinguluka umwaka onsi.

⁹ Alino lyene Yawe Leza awino alaateeka impanga yonsi, ala wenga mpo awino alaya Umwene, ni zina lyakwe lyonga mpo alino antu yalalumbula.

¹⁰ Mpanga yonsi ilasenuka iye inyika, ukutandikila ku Geba mpaka nu ku Limoni uwaku Negebu. Yelusalemu alatumpuka ukuluta, nanti angala alasyalila apa ncende yakwe yampiti. Mulikala antu ukufuma ku mpongolo yakwe Benjamini nu kufika ku mpongolo ya kutandikila, kuli kuti ku Mpongolo ya Pitungu, nga nu kutandikila pa Lupungu lwa Hananeli mpaka nu kufika nu mwakufenela waini ukwi sano.

¹¹ Antu yalikala kuku ku matwi cele, kutalaya nupya ica kuyofya ku kononwa nupya.

¹² Ii, ilaya ili mpungo ino Yawe alaponyezya imitundu yonsi iyalwisizye Yelusalemu. Imili yao ilaola lino yacili apuma, amanso yao yalaolela mu vimfonka vyao ni ndimi zyao zilaolela mu tunwa twao.

¹³ Wanda uwa kwene Yawe alayaletela intete izikalamba, cakuti cila muntu alalema umuze ikasa pakuti yalwe.

¹⁴ Antu aku Yuda nayo yalalwa inkondo na aku Yelusalemu. Ivyuma vyonsi vya mitundu yonsi iyazinguluka yalavikolonganika pamwi, zaabu, siluva, ni nsalu, ivivule wakwe cimwi.

¹⁵ Impungo ili yonga kwene ilaponela imfwalasi na yakawalwe kwene, ingamila, yapunda nga ni viteekwa vyonsi ivikazanwa mu nkambi iyo.

¹⁶ Yonsi alasyala amu mitundu yonsi iyalwisizye Yelusalemu yalaya cila mwaka ku kupepa Yawe Leza Wamaka yonsi wa Mwene wao, nu kukuzevya Cimulo ca Nsakwe.

¹⁷ Umutundu onsi uno ulakana ukuya ku Yelusalemu ku kupepa Yawe Leza Wamaka yonsi wa Mwene, utalasyukila imvula.

¹⁸ Umutundu wa ina Eguputo ndi waca wakana ukwiza zevya Cimulo ca Nsakwe, ulaponelwa ni mpungo ino Yawe alaponyezya imitundu ilakana kuzevya Cimulo ca Nsakwe.

¹⁹ Fwandi vivyo ali vino yalapezya Eguputo ni mitundu yonsi ilakana kuya ku kuzevya Cimulo ca Nsakwe.

²⁰ Pa wanda kwene ulya yalalemba pa nyenjele zyakwe yakawalwe amazwi akuti, “Kawalwe wii, Wapaatwilwa Yawe.” Na pa ntendo zyamu Ng'anda ikulu yakwe Yawe zilaya wa ngeso pa nkolelo ya kavuwa.

²¹ Intendo ili yonsi mu Yelusalemu nu mpanga yakwe Yuda ilasanguka icuma camuzilo cakwe Yawe Wamaka yonsi. Yonsi alalonda ukoca impolelwa, yalazitoola nu kuziomvya apakwelekela inyama wa mpolelwa kuli Yawe. Pa wanda ulya mutalayamo aculuzi mu Ng'anda ikulu yakwe Yawe Wamaka yonsi.