Zakaliya 12 - Amazwi Yakwe Leza 2013

Kukululwa kwakwe Yelusalemu mu manda akwiza

¹ Ii imbila ya mazwi yakwe Yawe akumile Izlaeli. Yawe, wiyo uwanzika amayulu, uwaumba insi, aliwe akapeela umi ku muntu. Wene wavwanga wati,

² Nemo ndasangula Yelusalemu wa lwako lwakumwelako waini wino akalenga kuti antu ya mitundu yuze iyazinguluka Yelusalemu yapempezyoke. Anisi yayo yalaponya inkondo mu mpanga ya Yuda nga nu musumba wa Yelusalemu.

³ Pa wanda kwene ulya umusumba wa Yelusalemu ndaucita wa ciliwe cinyome wakwe cimwi ku mitundu yonsi ya antu. Na antu yonsi alezya kucikatusya imisana yao ilavunika. Mitundu yonsi ya antu ya panonsi yaluminkana kuti yezye ukuwililila umusumba wa Yelusalemu.

⁴ Yawe wavwanga wati, “Pa wanda kwene ulya nemo ndapupanya imfwalasi ili yonsi nu kupenya yayo yonsi alakwela penepo. Ayuda ndayawaka, lelo imfwalasi zya anisi yao zyene ndazipafuzya amanso.

⁵ Alino intunguluzi zya Ayuda zilanenana iziti, ‘Ala swemo a Yawe Leza Wamaka yonsi aliwe akatukomya swe antu yakwe, swemuno twikala mu Yelusalemu.’

⁶ “Pa nsita iyo ndaleka inko zyaku Yuda ziye wa moto ukwaka mu mutengo onga nanti mu calo conga umuli ingano zikupya. Inko zizyo izilalovya antu amu mitundu yonsi iya mupipi. Aikazi amu Yelusalemu yalaikalila ku matwi cele mu musumba wao.

⁷ “Ne Yawe ndaleka ivita vyaku Yuda vikatale vikacimvye anisi, apali pakuti umucinzi uno ana yakwe Davidi yalakwata pamwi na ikazi amu Yelusalemu, utakacile umucinzi uno Ayuda yauze yonsi yalakwata.

⁸ Pa nsita iyo ne Yawe ndacingilila aina Yelusalemu cakuti nu tupopo twao kwene tulakwata amaka ali yamwi kwene na yano umwene Davidi wakweti. Ana yakwe Davidi ali yano yalayatungulula wa mungeli wane ne Yawe.

⁹ Pa nsita iyo ndatandika ukulovya antu amu mitundu yonsi alawilila ku mutundu wakwe Yelusalemu.

¹⁰ “Ana yakwe Davidi na ina Yelusalemu nemo ndayapeelesya amano akukwatisya uluse, na mano akumpepesya wakwe cimwi. Yalatamba umwi wino yatulinkinye icanzo, yalamulosya vivi kwene ndi vino yakalosya umwana umonsi uwavyalwa wenga mpo. Yalamulosya kwati antu afwililwe umwana wao umonsi uwi yeli.

¹¹ Pa wanda uo umusumba wa Yelusalemu mulaya impooma ikalamba, wakwe iya kwene iyuvwikike mu nyika ya Megido, lino antu yalosizye Hadadi Limoni.

¹² Inko zyao zyonsi mu mpanga zilaalosya ntalentale. Aluko lwakwe Davidi aonsi yalalosya yonga, aci yao nayo yonga. Aluko lwakwe Natani yalalosya yonga, aci yao nayo yonga.

¹³ Aluko lwakwe Levi yalalosya yonga, aci yao nayo yonga. Aluko lwakwe Syimei aonsi yalalosya yonga, aci yao nayo yonga.

¹⁴ Nga nu mu nko zyonsi zyuze zyasyala cilaya icili cimwi kwene, aonsi yalalosya yonga, na aci yao nayo yonga.”