Zakaliya 11 - Amazwi Yakwe Leza 2013

Yakateeka akali yalowa

¹ Yula ivisasa vyako, we Lebanoni, umoto woca imiti yako imikelide.

² Pongomokini mpooma mwalosya mwe miti imipaini, pasi pano umukelide watiuwa, antu yamaka yonsi yatiyononeka! Losyini mwe milemo yaku Basyani, pano umutengo usiingilwamo yatiyautema!

³ Kulosya kwakwe yakacema kwatikuvwika, pasi pano muno yakacemelamo mwatimononeka! Kuvwika nu kung'anza kwa twana twakwe yacisama, pasi pano matesi aku Yodani yatiyononeka kuno twene tukaikala!

Yakacema yaili

⁴ Yawe Leza wane wanenyile wati, “Wemo cemanga imfwele zino yasya yatandike ukukomola.

⁵ Aeneco ya mfwele yasya yazikome ukwaula ukupelwa umulandu, yasya yazikazye, nu kuvwanga ala yakuvwanga yakuti, ‘Leza twakutaizya, pano lyene twaya akama! Na yayo kwene akazicema yasikutala yazitezele foo.’ ”

⁶ Yawe wavwanga wati, “Lyene nemo ntalatala ntezele aikala nsi. Antu yonsi wenga wenga nemo ndaleka intunguluzi zyao nanti yamwene yao ayano yakayateeke uku kalili. Intunguluzi zizyo zilonona impanga, nani ntalayapususya kuno yali, awe.”

⁷ Fwandi yayo akalanga imfwele nu kuzikazya, nemo ne Zakaliya yandemvile incito, nani ali pakuyacemela imfwele zizyo zino yali nu kukoma. Nakweti intuwa ziili, yonga nayamanga inti “Cikuku” ni yuze inti “Kulemana”. Awe nani ali pakuwaka imfwele zizyo.

⁸ Lelo yakacema yatatu yano yampasile, yamansalosya ku nsingo, nani ali pakuyazinga yonsi pa mwezi onga.

⁹ Alino namanena imfwele inti, “Lyene mwemo nsikumusunganga foo nupya. Mwemuno yali nu kukoma, kayamukome sile. Mwemuno yali nu kulovya, kayamulowe sile. Mwemuno mulasyala penepo, kamuce mwakomana sile mwenga.”

¹⁰ Apali pakutoola intuwa yane, Cikuku, naikontola paili pakonona upangano uno napangana na antu ya mitundu yonsi.

¹¹ Fwandi pa wanda kwene ulya nu upangano ali kononeka. Yayo akalanga imfwele nu kuzikazya ala nayo yakundolekesya, nu kusininkizya alino lyene yasininkizya ukuti fwandi a Yawe aliwe akunena ukucita vino nkucita.

¹² Nani ali pakuyanena inti, “Mwemo ndi mwalola ukuti cati ciyana, lyene ndipilini amalipilo yane. Ndi citailemo, fwandi amalipilo lyene kayaliyali.” Awe nayo ali pakundipila impiya amakumi yatatu zyakwe siluva.

¹³ Lyene Yawe wanenyile ati, “Kaziike umu cipao ca mu Ng'anda yane ikulu.” Fwandi nani ali pakusenda impiya zizi amakumi yatatu zyakwe siluva, zino yene yaweni kwati zyatizindinga ningo, avino nani nzisumbila mu cipao camu Ng'anda ikulu yakwe Yawe.

¹⁴ Ali pakufuma ni ntuwa yane yakwe ciili, Kulemana, nga nayo injikontola paili pakonona kulemana kwa Ayuda na ina Izlaeli.

¹⁵ Nupya Yawe wanenyile ati, “Tola iviombelo vyakwe kacema iciwelewele.

¹⁶ Pasi pano ninsonta umuntu wenga mu mpanga akucema imfwele zyane. Wiyo wene asikusakamala kucingilila imfwele zino zikuzanza, asikwazwa ni zikuluwantika, asikupozya izikucisika nanti kulisya izikusyala penepo. Wene apunukile sile ku kulya izisuma iziine nu kuzifyontola inkamba.

¹⁷ Kalanda kuli kacema wii ciwelewele ca muntu! Wene watatazyela imfwele! Maka yakwe yalasilila umu nkondo. Ikasa lyakwe liluuma liye na ndi, na manso yakwe yalapafula!”