Zakaliya 10 - Amazwi Yakwe Leza 2013

Yawe walaya ukukulula antu yakwe

¹ Mwauzya imvula ya mooko kuli Yawe. A Yawe aliwe akaleta amakumbi ni mvula kwene, nu kumezya ivintu mu vyalo vya muntu ali wensi.

² Antu yakauzya vimwi ku tuluwi tuleza twao, lelo vino tuluwi tukayasuka ala vyauwelewele sile, nupya ivyaufi ufite fititi. Yakasapoola nayo aufi sile, yakatumpoka, yakalota sile vyakulota, yakaicuzya sile ukutekezya antu imyenzo. Fwandi uli mulandu kwene uno antu yakalulumba sile wa mfwele ziponge. Antu yakacula pano yatakwata wakuyatungululako.

³ Yawe wavwanga wati, “Nemo natinsokela akateeka antu yane, nupya nasya njavunuke. Ayuda ala antu yane ne mweneco, nene ne Yawe Wamaka yonsi ndayawaka. Yalaya wa mfwalasi zyane zyamaka zyakulwilapo inkondo.

⁴ Pa antu yane kwene yayo apalafuma wenga alaya wi we lya pitungi, nupya muli aliwe umulafuma ulupopo lwakulema itaalu, umulafuma ulapwa wa kulwila inkondo, nupya umulafuma intunguluzi zyonsi.

⁵ Ayuda yalacimvya wa vita ivikulyatola pa anisi yaviko mu matipa yamu miseo. Ayuda yalalwa inkondo pano ne Yawe naya nayo, yene yalacimvya na anisi kwene akapitila pa mfwalasi.

⁶ “Nemo ndakomya ang'anda yakwe Yuda, ndatuula ang'anda yakwe Izlaeli, ndayawezezya ukumwao, pano ninjuvwila inkumbu. Yalaya kwati ntatazile injafutatila, pasi pano nemo nene indi Yawe wao, fwandi acino ndauvwa na mapepo yao.

⁷ Aina Izlaeli yalakolana na asambazi, yalasansamuka wa antu amwile waini. Ana yao yalaiusya vino ivikolwe vyao vyacimvizye, nu kusansamuka nayo yalasansamuka, yalazanga pakulola vino ne Yawe nacita.

⁸ “Ndayaamila antu yane mu miluvi, nupya ndayakonganika pamwi, pano anene ndayakulula nu kuyasandulula ndi vino yali apa mpiti.

⁹ Nanti nayasalanganyizizya mu inamasi, lelo namo kwene yalanjiusya mukwene muno yali. Yene yalapusuka pamwi na ana yao, nu kuwelulukila pamwi kumwao.

¹⁰ Ndayafumya mu mpanga yaku Eguputo nu mu Asilya, ndayawezezya na kuno ukumwao. Ndayateeka mu mpanga ya Gileadi nu mu mpanga ya Lebanoni kwene, nu mu mpanga ilya yonsi mulasuka muzuule antu.

¹¹ Lino yalacululuka pakulamba yemba, nemo ne Yawe ndamyalalika amaimbi, namatenga yonsi amu luzi lwa Nailo yalapwa. Cilumba ca antu amu mpanga ya Silya cilasila, na maka yakwe yamwene amu Eguputo nayo yalasila.

¹² Nene ne Yawe ndakomya antu yane, nayo yalampepa nu kunjela.” Avino Yawe wavwanga.