Zakaliya 1 - Amazwi Yakwe Leza 2013

Yawe waama antu yakwe kuti yazenzuke

¹ Mu mwezi wakwe cinani, uwa mwaka wakwe ciili lino Dalyusi wali umulasi waku Pesya, Yawe wavwanzile ilandwe lii kuli kasema Zakaliya, umwana umonsi wakwe Belekiya nupya umwizikulu wakwe Ido.

² Yawe Wamaka yonsi avwanga kuli Zakaliya kuti anene antu ati, “Nene ne Yawe nasokile ivikolwe vinu,

³ lelo ndakai ne Yawe Wamaka Onsi nkumunena ukuti welelini kunondi, nga nani namawela kunomuli.

⁴ Mutakolana ni vikolwe vinu. Uku mpiti yakasema yasemile amalandwe yane kunoyali yati, Yawe Wamaka Onsi wavwanga wati, ‘Zenzukini ku misango inu iipe nga nu ku vicitwa vinu ivyankota. Lelo yene yakanyile ukunguvwa nanti ukunjela.

⁵ Uzye ndakai ivikolwe vinu vivi vili kwi? Uzye yakasema yaya nayo yikalilila umuyayaya?

⁶ Uzye ivikolwe vinu vituvwile amazwi yane na masunde yane yano nanenyile aomvi yane yakasema? Lyene yene yazenzwike nu kuvwanga yati, Yawe Wamaka yonsi watatupezya ukulingana ni miyele nga ni vicitwa vitu iviipe.’ ”

Kasema walola imfwalasi mu cilolwa

⁷ Pa wanda walenga amakumi yaili na yani, uwamu mwezi walenga ikumi na onga, umwezi wa Syebati, mu mwaka wakwe ciili uwa kuteeka kwakwe Dalyusi, Yawe anena kasema Zakaliya amazwi, umwana umonsi wakwe Belekiya, umwizikulu wakwe Ido. Alino Zakaliya avwanga ati,

⁸ Mu nsita ya usiku nakweti icilolwa nga ndola umuntu akwezile pa mfwalasi iyenzu. Umuntu wiyo aimilila mu miti iyali mu cifoloma. Uku nsizi yakwe kwali imfwalasi, zimwi ziyenzu, na zimwi wakwe mulamba.

⁹ Alino nani imuzya inti, “Musambazi, uzye imfwalasi zii calola mwi?” Umungeli wilya nawe aasuka ati, “Namakulondolwela muno calola.”

¹⁰ Lyene umuntu wilya wino waimi mu misafwa andondolwela ati, “Imfwalasi zii ali zino Yawe watuma kuti zipite umu nsi yonsi.”

¹¹ Nga zyonsi kwene ziza zinena umungeli wakwe Yawe ziti, “Twatitupitana umu nsi yonsi, nga ituzana antu yonsi yatiyapelelwa nga yatiyacimviwa.”

¹² Lyene umungeli wakwe Yawe avwanga ati, “We Yawe Wamaka yonsi, uzye ukufika lilaci lino utalaya na mizu ku ikazi amu Yelusalemu nu mu misumba yaku Yuda, yayo yano waponyezizye ukali wako pa myaka amakumi cinimbali?”

¹³ Acino Yawe avwanga amazwi ya luse nupya akutekezya ku mungeli wiyo wino wavwangine na aliwe.

¹⁴ Lyene umungeli wilya uwavwanganga nani anena ati, “Umaimbila uti, Yawe Wamaka yonsi wavwanga wati, ‘Ukulanguluka kwane konsi nu mwenzo wane onsi vili pali Yelusalemu na Zioni.

¹⁵ Lelo antu amu mitundu yuze njakwatile icipyu wakwe cimwi, yayo yano yali ku matwi cele.’

¹⁶ “Caleka natimbwela ku Yelusalemu nu kuya na mizu apa ikazi amu musumba. Acino lyene Ng'anda yane ikulu ilakuulululwa nupya yalatola umwando wakupimilako kuti yatandike ukukuula umusumba cipya cipya.” Kuu kuli kulanda kwakwe Yawe.

¹⁷ Ulundepo ukuuma imbila uti, “Yawe Wamaka yonsi walanda wati, ‘Mu misumba yane ii mulaya icuma icivule. Yawe nupya kwene alatekezya Zioni, nga nu kuleka umusumba wa Yelusalemu waamwa ukuti umusumba wane.’ ”

Icilolwa ca mpembe

¹⁸ Lyene mu cilolwa nacuze indola impembe zini zyakwe yacipambasi.

¹⁹ Alino inuzya umungeli uwalandanga kunondi, inti, “Uzye impembe zii zyalola mwi?” Nga nawe aasuka ati, “Zii zili mpembe izyasalanginye antu aku Yuda, aku Izlaeli na aku Yelusalemu.”

²⁰ Lyene Yawe andanga yafundi yani yano yakapanga ivintu.

²¹ Nani inuzya inti, “Uzye antu yaa yizile cita cani?” Nawe aasuka ati, “Yene yatiyiza ku koofya nu kucimvya inko zino zyononyile impanga ya Yuda ukwaula kusya nanti pamwi, nu kusalanganya aikazi ya mwenemo.”