Yuda 1 - Amazwi Yakwe Leza 2013

¹ Kalata kufuma kuli ne Yuda, muomvi wakwe Yesu Klistu, nupya umwina wakwe Yakobo, kuli yano aamwa, akundwe yakwe Leza Tata nupya acingililwa na Yesu Klistu.

² Mizu, mutende nu kutemwa kufuma kuli Leza vivuziwe kunomuli.

Yakasambilizya yaufi

³ Mwe yacuza yane akundwe, nalondesyanga kumulembela pa vya ufyusi uno swensi twakumako. Lelo pandakai calondekwa kuti mulembele kuti imukomelezye kutwalilila mu ulwi wa kucingilila utailo uno Leza wapela ku antu yakwe.

⁴ Pano antu yamwi yakaifya, yasokelela munotuli ukwaula kumanyika. Nupya yakasenula ilandwe lya pa cikuku cakwe Leza witu pakuti yaipele insambu pa miyele yao ya winyi. Yene yakana Yesu Klistu, Musambazi nupya Mwene witu wenga sile. Antu yaa yalavunukwa ndi vino calembwa mpiti mu malembelo.

⁵ Pano nanti mumanyile vyonsi vii, nkasi kumwiusya vino Mwene watuuzile aina Izlaeli kufuma mu Eguputo. Lelo pacisila alovya yano atataile.

⁶ Iusyini angeli yano asile vifulo vyao vya ulasi, nu kuvifutatila. Yene yanyepwa mu minyololo ya manda pe, mu kanda nu mu ulanda kufika pa Wanda ukulu wa upinguzi uno yalavunukwamo.

⁷ Iusyini Sodoma na Gomola, nga ni misumba iyazingulwike muno antu yaitumfile mu vyawinyi. Yene yaya icilangililo kuli yonsi ca uvunuko waku moto wape.

⁸ Mu musango uli umwi, antu yaa, yakalondela viloto vino vikayalenga ku yembukila miili yao. Yakasuula maka yakwe Leza nga nu kupontela viumbwa vyalulumbi vya mwiyulu.

⁹ Nanti Mikaeli kwene mungeli mukulu atacisile cii lino walemanile na Ciwa pa kulola wino angatola cala cakwe Mose. Mikaeli atavwanzile izwi nanti lyonga lya miponto. Wene wavwanzile sile ati, “Mwene akukalipile!”

¹⁰ Lelo antu yaa, yakapontela cintu consi cino yatiiluka. Ndi vino inyama zya mpanga zyaya, vintu vino yamanya mu civyalilwa vyaya ivintu vilayonona.

¹¹ Kalanda kunoyali! Pano yene yalondela musango wakwe Kaini. Mulandu wakutemwisya impiya, yene yaisumba aisikulu mu usomvi wakwe Balamu. Yene yakatukila Leza ndi vino Kola wacisile. Acino yalononwa.

¹² Antu yaa, mu vicitwa vyao vyansonyi yakolana na maala akowele lino mu kulya nao vimulo vinu vya utandano. Yakaisakamala sile aisikulu. Yakolana na makumbi akaululwa nu muza, lelo yatangaleta imvula. Yakolana ni miti isyaseeka vizao pa nsita yakweyo, ino yuuma, yatukulwa kumwi na masinte.

¹³ Yakolana na maimbi yamaka apali yemba, ni vicitwa vyao vyansonyi vikaloleka wa kufuluma kwi tomvu. Yakolana ni ntanda zikazeuluka. Antu yaa, Leza wayateyanyizizya icifulo ca mfinzi ikomesye iyape.

¹⁴ Enoki, cikolwe calenga cinimbali kufuma pali Adamu, awino apa mpiti wasowile pamulandu wao ati, “Cumi Mwene aliza pali pamwi na angeli yakwe amuzilo mazimbi na mazimbi.

¹⁵ Alaleta upinguzi pali yonsi nu kuvunuka yakaifya pa vicitwa vino yacitanga na pa mazwi aipe amiponto kunoli!”

¹⁶ Antu yaa, yakailizyanya lyonsi nu kutwika auze milandu. Yene yakalondela vya lunkumbwa vyao viipe. Yakaitutumula nga nu kucindika auze mwi syente kuti yazanilemo muzano.

Mazwi ya kuceulwa nga nu Utunguluzi

¹⁷ Lelo mwe yacuza yane akundwe, iusyini vino Atumwa ya Mwene witu Yesu Klistu yamunenyile.

¹⁸ Yalanzile kunomuli yati, “Lino manda ya mpela yaliza, kulaya antu akalondela ivilondwa vyao visi vya upefi, alamuseka.”

¹⁹ Yaa, ali antu akamupaatukanya, akatungululwa ni vya lunkumbwa lwa civyalilwa cao, nupya yasi na Mupasi Wamuzilo.

²⁰ Lelo mwe yacuza yane akundwe, twalililini kukula mu utailo winu wamuzilo. Pepini mu maka yakwe Mupasi Wamuzilo.

²¹ Ikalini mu kutemwa kwakwe Leza. Lolelini Mwene witu Yesu Klistu, nawe alaya na mizu kunomuli nu kumupeela umi wape.

²² Muye na mizu kuli yano akutwisika mu utailo.

²³ Tuulini nu kusompola yamwi yataponela mu moto. Na kuli yamwi Muye na mizu nga ni ntetepo. Lelo sokini miyele yao ni vizwalo vyao kwene ivyakoweziwa ni vya lunkumbwa lwao lwipe.

Ipepo lya kulumbanya Leza

²⁴ Kuli Leza wiyo angamucingilila kukuponela mu maifyo, wene angamulenga kwimilila panoli mu lulumbi lwakwe aulwa umulandu nupya aluzango.

²⁵ Kuli Leza wiyo wenga sile Katuula witu, muli Yesu Klistu Mwene witu kunoli kuye ululumbi, ukulu, maka nu wangalizi, kufuma ku katalili, ilelo na manda pe. Ameni.