Yowelo 2 - Amazwi Yakwe Leza 2013

Yawe watuma makanta apa kusoka antu

¹ Lizini intandala ku Zioni. Pundini nu kuyasoka pa mwamba wane uwamuzilo. Aikala nsi yonsi yazakaze, pano ukwiza kwa wanda wakwe Yawe kwatikupalama.

² Ulaya uwanda wa mfinzi nu ulanda, ulaya uwanda wa makumbi ni mfinzi. Impuka ya vita vyamaka iikulu cuze ikwiza, ino ikoline wa mfinzi iyatikupa imyamba, ino itatala yayako nupya italatala iyeko umu manda akwiza.

³ Ku nkolelo nako kuli umoto ukaonona, kunsizi nako kuli amakala ya moto akoca ivintu. Lino yene yatacili yafike, impanga yali wa muyanda wa Edeni. Lelo lino yafumilemo, yasangwike iya wa lwanga, umutasile akantu nanti kamwi.

⁴ Imilolekele yao yali uti i mfwalasi, nga yakasimula wa mfwalasi zya nkondo.

⁵ Yakutoloka apapela ya myamba nu kupanga icongo ungati amaceleta, yakuvwika wa makala ya moto yano yakooca inyemvu, wa vita vya maka ivyati viiteyanya uku kulwa inkondo.

⁶ Antu ya mitundu yuze pasi pa ntete ndi yalola imiyele yao. Nga ni vinso vyao ivikwatisya intete ivyazakaza.

⁷ Yene yakazanza wa vita. Yene yakwela apa viumba vya malinga wa asilika. Ali wensi akulondela umu mulongo ukwaula kuti ailondele inzila.

⁸ Yatakukankanakankana, lelo cila muntu akupita mu molwela. Yakupuzyanya ni vyanzo vya ulwi ukwaula kupumana, nanti ukwimika yao akuyapitilila.

⁹ Nga yatampukila umusumba uo, iyaukwelela papela ya malinga. Alino yingila muli cila ng'anda, ala yakukwela apa mawindo wa ivi.

¹⁰ Insi ya pansi ikuzakaza na mayulu yakusunkana lino yene yakupalama. Ilanzi nu mwezi vikafita iviya wa mfinzi. Alino ni ntanda izita ukuwala.

¹¹ Izwi lyakwe Yawe likuvwika uku nkolelo ampuka ya vita vyakwe. Impuka ya vita vyakwe iikulu wakwe cimwi. Wino wensi akucita ukulonda kwakwe Yawe, umucumi wene uwamaka. Wanda ukulu wakwe Yawe uwakoofya sana. Uzye aweni angaposya pa wanda kwene ulya?

Leza waama antu yonsi

¹² Lelo Yawe wavwanga wati, “Nanti cili vivyo, welini kunondi nu mwenzo winu onsi, ale mwatimufunga ukulya nu kuponya aminsozi, nga nu kuililila ulanda ulanda.

¹³ Si imyenzo inu ilange ulanda kunondi, asi kulepula sile vizwalo vinu awe. “Swililini kuli Yawe Leza winu, pano wene wazipa umwenzo nupya uwa luse. Wene asisoka zuwa nga ukutemwa kwakwe kusifutuka. Insita zyonsi wene akaelela.

¹⁴ Limwi limwi akasenula umwenzo nu kwelela, alino nu kutupolelela. Upolelelo uo ukaya uwa vilyo ni vyakumwa ivyakupeela kuli Yawe Leza winu.

¹⁵ “Lizini intandala mu Zioni. Manyisyini antu kuti yafunge ukulya. Amini antu yonsi kuti yakongane.

¹⁶ Konganikini antu yonsi apali pamwi, muyanene kuti yaizilizye. Konganikini aikolo na ance kwene. Mukonganike nu tunya kwene utucili tukonka. Pelini ilamulo kuli siwinga na nawinga, kuti nayo kwene yafume umu ng'anda yao nu kwiza.

¹⁷ Lekini yasimapepo, yao akatumikila Yawe, nayo yalosye apakasi ka musolo wapa wingililo na kavuwa. Lekini yavwange yati, ‘We Yawe, su ngala uye nu luse pa antu yako. Utazumilizya kuti umwi asausye antu yako asololwe.’ Utaleka ainamasi yayaseke apa kuvwanzyanya yati, ‘Uzye Leza wao ali kwi?’ ”

Leza welela aina Izlaeli

¹⁸ Lyene ulukundo lwakwe Yawe lwakanga ungati umoto upembe pamulandu wa mpanga yakwe. Nga acitila antu yakwe yonsi uluse.

¹⁹ Yawe aasuka antu yakwe ati, “Namamutumila ingano, ivyakumwa na mafuta, nupya mulikuta cuze. Ntalazumilizya nupya kuti ainamasi yamuwele nu kumutumfya.

²⁰ Ndafumya anisi aku katutu kuti yaye ukutali namwe, nupya ndayazingila uku lwanga. Ankolelo yene ndayazingila kuli yemba uwaku uwondaka. Acisila nayo ndayazingila kuli yemba uwaku ufumondaka. Lyene ivyala vyao vilaola nu kutandika ukununka.” Icumi kwene Yawe alacita ivikulu.

²¹ “Mwe vyalo namwe mutuvwa intete, lelo muzange nu kusansamuka pamulandu wa vintu vyonsi vino Yawe watamucitila.

²² Mutuuvwa intete, mwe nyama zyamu mpanga, pasi pano umulemvwe watiumela umu nyika. Imiti nayo yatiseeka iviseekwa. Amasamvu na matingi vyativivula wakwe cimwi.

²³ “Mwe ina Zioni, zangini nu kusansamuka pamulandu wa vintu vino Yeona watamucitila. Wene watamuyela amizu apakumupeela imvula muli zuwazuwa nupya ivulisye cuze, ukufuma ku miundo mpaka uku mwela, ndi vino cali uku mpiti.

²⁴ Apa lwano pene wavuzya ingano. Umu vina vyakupondelamo amatingi, namo wazuzyamo waini umupya, na mafuta kwene yatiyavulisya wakwe cimwi.

²⁵ Umu musango uli umwi kwene, nemo indamuwezezya vyonsi sile ivyononeka kuli makanta, nu ku vikwe, na kuli lulele na manzombwe. Ikwene ili mpuka ya vita vyane, ino natumile ku kwiza mupezya.

²⁶ Mulalya ivivule mpaka mwikute, alino mulalumbanya izina lyakwe Yawe Leza winu, wino wamucitila ivizungusyo. Acino antu yane yonsi kwene yatalazewana nupya, awe.

²⁷ Mulamanya ukuti nene nenga indi namwe mwe ina Izlaeli, nu kuti nene indi Yawe Leza winu. Antu yane yatalazewana nupya, awe.”

Ukwiza kwa wanda wakwe Yawe

²⁸ “Apacisila ca nsita imwi, uwanda wakwe Yawe ulafika, lino ndapongolwela Mupasi wane pa antu onsi, Ana inu aonsi na anaci yalasema, na ikolo yalalota viloto, na ana inu alumendo yalalola vilolwa.

²⁹ Endi, na pa yaomvi yane kwene, aonsi pali pamwi na anaci, ndapongolwela Mupasi wane mu manda yayo, nga nao yalasema.

³⁰ Ndacita ivinjelengwe umwiyulu nga ni vilangililo pano pansi, kulaya uwazi, umoto, ni cifutika ca cunsi.

³¹ Ilanzi lilasanguka mfinzi, nu mwezi nao ulayenza wa wazi, lino uwanda ukulu wa lulumbi wakwe Yawe utacili ufike.

³² Lyene alino wensi wino alaama pi zina lyakwe Yawe alatuulwa. Pasi pano uku Mwamba wa Zioni nu ku Yelusalemu, na muli yayo yamwi asyala palazanwa yamwi yano Yawe alaama.”