Yoswa 9 - Amazwi Yakwe Leza 2013

Aina Gibyoni yasomba Yoswa

¹ Lyene yamwene yonsi aikalanga ku uwondaka wa Luzi lwa Yodani yuvwa ivintu vii vyonsi, yano yonsi aikalanga mu mpanga ya myamba, nu mu misana ya twamba yaku uwondaka, nu mu nkumba yonsi yakwe Yemba wa Adiliya kufika na lwaku katutu ku Lebanoni, nga na yamwene ya ina Hiti, na ina Amoli, na ina Kenani, na ina Pelizi, na ina Hivi, nga na ina Yebusi

² iyumana kapi kuti yalwisye Yoswa na ina Izlaeli.

³ Lelo lino aikazi yaku Gibyoni yuvwa vino Yoswa wacitile umusumba wa Yeliko nu wa Ai,

⁴ iyelenganya ukuomvya usomvi kunoli. Iyaya iyatola impao zimwi alino iyazilongelela mu mifuko iya vikampa nga iyakwezya pali yapunda kumwi ni nyambi zyao izyampiti zyakwe waini izilepoke nupya izisumilile, nga iyapita.

⁵ Antu yalya iyazwala indyatu izisile nga ni vinyanko. Nu mukate uno yasenzile wali uume solokoto nupya uvungoke.

⁶ Lyene iyaya kuli Yoswa mu nsakwe ku Giligali nga yanena aliwe na ina Izlaeli, yati, “Twafuma ku mpanga imwi ukutali. Tukasi kuti tucite cipangano namwe.”

⁷ Aina Izlaeli iyanena aina Hivi yalya yati, “Limwi mwemo mukaikala mu pipi naswe. Ndi cakuti avino cili, uzye lyene tungacita uli cipangano namwe?”

⁸ Nayo yaasuka Yoswa yati, “Sweswe azya inu.” Alino Yoswa ayuzya ati, “Uzye mwemwe yaweni nupya mufumile kwi?”

⁹ Lyene nayo yaasuka yati, “Musambazi, kwene swemo kuno twafuma ukutali sana, pamulandu wa kuvwa ululumbi lwakwe Yawe Leza winu. Pasi pano twatituvwa vyonsi vino wene wacisile umu Eguputo,

¹⁰ na vyonsi vino wene wacitile yamwene yaili ya ina Amoli lwaku ufumondaka wa Luzi lwa Yodani, na Siooni umwene waku Hesyiboni, na Ogi umwene waku Basyani, wino wateekanga mu Asyitaloti.

¹¹ Intunguluzi zitu nga na antu yonsi akaikala mu mpanga itu yatunenyile kuti tusende impao pa lwendo lwitu tumulondelele kuno nga twize tumunene tuti, ‘Sweswe aomvi inu. Lekini tucite cipangano namwe.’

¹² Si lola we musambazi umukate uno tusenzile. Lino twakatwike mu ng'anda kuno tufumile wali ukaye sile ningo. Lelo si lola! Ndakai watiuma nu kuvungoka.

¹³ Ni nyambi zii zyakwe waini zyali izipya lino twazuzizyemo waini, lelo si lola vino zyatizilepoka. Silola vino ivyakuzwala vitu ni ndyatu zitu vyativinyansoka pamulandu nu utali wa lwendo.”

¹⁴ Aina Izlaeli iyazumila ukutoola ivyakulya vimwi ukufuma kunoyali ukwaula ukuuzya Yawe pa vyakulya vivyo.

¹⁵ Alino Yoswa nawe acita cipangano ca mutende nayo kuti ayate yikale, nga ni ntunguluzi zi uvi nazyo kwene izilaya nu mulapo ukuti zimasunga cipangano.

¹⁶ Lelo walanga papita sile amanda yatatu ukufuma pano yacitile cipangano, aina Izlaeli iyamanya ukuti cumi cumi antu yalya ainipamba, aikalanga mupipi na aliyo.

¹⁷ Acino aina Izlaeli iyatenuka nga pa wanda uwalenga yatatu iyafika ku misumba yao kuno yakaikala. Ni misumba iyo aei: Gibyoni, Kefila, Beeloti na Kilyati Yealimu.

¹⁸ Lelo aina Izlaeli yatayazanzile, pamulandu wakuti intunguluzi zi uvi zyalafile nu mulapo kunoyali umwi zina lyakwe Yawe, Leza wa ina Izlaeli. Iuvi lyonsi iliilizyanya pali cii ku ntunguluzi.

¹⁹ Lelo intunguluzi zyonsi izyasuka ziti, “Twalafile nu mulapo kunoyali umwi zina lyakwe Yawe, Leza wa ina Izlaeli. Acino ndakai tutangacita cimwi iciipe kunoyali.

²⁰ Swemo lyene tulinzile tuyate yikale ulumi, pakuti ukali wakwe Yawe utatuponela pa kuntasunga umulapo uno twalafile kunoyali.

²¹ Yatini yaye apuma, lelo lekini yatutiyila inkwi nu kusembela iuvi lyonsi amanzi.” Vii avili vino intunguluzi zizi zyelenginye ukucita.

²² Lyene Yoswa aama aina Gibyoni nga ayanena ati, “Uzye pacani cino mwatusomvile pa kulanda imuti, ‘Tukaikala kutali namwe.’ Mucifulo cakuti mukaikala mu pipi naswe?

²³ Apakucita vivyo, ukufuma ndakai mwatipwilwa na Leza. Antu inu yalaya azya pe. Yene yalaatiya inkwi nu kusembela ing'anda yakwe Leza wane amanzi.”

²⁴ Nayo yaasuka Yoswa, yati, “Mukwai swemo tuvwile ukuti Yawe Leza wako wapile ilamulo kuli Mose kuti apeele mwemwe impanga yonsi nga nu kulovya aikazi ya mwenemo yonsi pyu. Acino fwandi lino twaweni ukuti mwapalama, imyenzo itu itatenzi nu kuzakaza. Uli mulandu uno twacitile vivyo.

²⁵ Lyene ndakai tuli mu makasa inu. Mutucitile icili consi icingamuzipila nupya cino mungalola ukuti icati cilungama.”

²⁶ Acino Yoswa ayacingilila nu kunena aina Izlaeli ukukana yakoma, nga nayo yatayakomile.

²⁷ Ukufuma pa wanda kwene ulya, Yoswa apeela aina Gibyoni umulimo wa kutiya inkwi nu kusembela iuvi na kavuwa kakwe Yawe amanzi. Ukufika na pilelo kwene yene yakaomba umulimo uwo pa ncende ino Yawe wasolola.