Yoswa 8 - Amazwi Yakwe Leza 2013

Umusumba wa Ai wazanzwa nu kononwa

¹ Lyene Yawe anena Yoswa ati, “Utuvwa intete nanti ukutonsiwa. Senda ivita vyonsi, nga mupite ku kuzanza umusumba wa Ai. Pasi pano natimpeela umwene waku Ai mu makasa yako, kumwi na antu yakwe, umusumba wakwe nga ni mpanga yakwe.

² Ulacitila umusumba wa Ai nu mwene wauko vivi kwene vino wacitile umusumba wa Yeliko nu mwene wauko, suka sile ivisampwe nga ni viteekwa vyene mungasenda. Tuma ivita ivya kuyateyamila kunzi ya musumba ulya.”

³ Acino Yoswa ni vita vyonsi yafuma iyaya ku kuzanza umusumba wa Ai. Wene asolola asilika yakwe azwangane ukulingana na antu mazimbi amakumi yatatu nga ayatuma usiku

⁴ ayapeela ilamulo lii ati, “Yangini mukayateyamile kunzi ya musumba. Mutezya kuya ukutali ukufuma ku musumba. Mwensi kwene muiteyanye ningo.

⁵ Nemo na yano tuli nayo tulaya apankolelo ku musumba, nga lino aina Ai yalafumila ku kutuzanza, wakwe vino yacisile ilyankolelo, alino tulasenuka nu kuyapuuka.

⁶ Nayo yalatucocovya mpaka naswe tuyafuntusye ukuyelile umusumba, pasi pano yene yalelenganya ukuti tukuyapuuka wakwe vino twacisile ilyankolelo. Acino lino tukuutuka ukufuma kunoyali,

⁷ namwe mulinzile ukufisamuka muno mufisime nu kwizapoka umusumba wao. Yawe Leza winu alaupeela mu makasa inu.

⁸ Lino mwapoka umusumba, mulinzile ukuwoca nu moto. Mucite kulingana ni lamulo lyakwe Yawe. Yaa ali malamulo yano nkumupeela.”

⁹ Acino Yoswa ayatuma iyapita. Alino nayo iyaya ku cifulo ukwa kufisama, nga iyatuwama pakasi ka musumba wa Betele nu wa Ai. Lelo Yoswa pamwi ni mpuka yakwe iya vita yikala mu nkambi usiku ulya onsi.

¹⁰ Katondotondo uwanda uwalondelilepo Yoswa akonganika antu yakwe, nga aliwe pamwi ni ntunguluzi zya ina Izlaeli iyayatungulula iyaya ku Ai.

¹¹ Ivita vyonsi ivyali pamwi na aliwe ivipita, nga ivipalama ku musumba, nga iyakuula insakwe lwaku katutu ka musumba wa Ai, na pakasi kao nu musumba pali cifoloma.

¹² Yoswa watozile aonsi ukulingana manye amazimbi yasano, nga ayafisamika pakasi ka musumba wa Betele nu wa Ai, lwaku uwondaka wa musumba.

¹³ Iyasalanganya vita mu ntunga wakwe vii. Yonsi ali mu kamba iyayatwala ku katutu ka musumba nga nayo yano yafisile iyayatwala ku uwondaka wa musumba. Lelo Yoswa wali mu cifoloma usiku ulya onsi.

¹⁴ Lino umwene waku Ai walola vivyo, aliwe pamwi na onsi amu musumba iyazwangana katondotondo ukwizafuma mu musumba ku kukomenkanya aina Izlaeli mu ulwi pa ncende imwi ulunga na Alaba. Lelo wene atamanyile ukuti kuli atiyamuteyamila ukunzi ya musumba.

¹⁵ Yoswa na ina Izlaeli yonsi iyacita kwati yakuutuka, iyaleka aina Ai iyayazinganya, nga iyutuka kulungama ku lwanga.

¹⁶ Acino antu yonsi ali mu musumba wa Ai yamilwe ku kuzinga, nga lino yakucocovya Yoswa, iyafuntukisya ukutali nu musumba wao.

¹⁷ Kusi umonsi umwi uwasile mu musumba wa Ai nanti wa Betele wino atafumile ku kucocovya aina Izlaeli. Yasile umusumba pwanku iyaya ku kucocovya aina Izlaeli.

¹⁸ Alino Yawe anena Yoswa ati, “Tola isumo lyako nu kulisonta ku Ai, pasi pano namapeela umusumba wa Ai mu makasa yako.” Acino Yoswa asonta isumo lyakwe ku Ai.

¹⁹ Lyene lilyo kwene lino wasonta, aonsi yaya afisime iyasokoloka zuwazuwa nga iyasimula ulwilo kuya ku nkolelo. Alino yingila mu musumba, iyaupoka, nga iyawoca.

²⁰ Aonsi amu Ai iyapepela icisila nga iyalola icunsi pa musumba ulya cikututumuka mupela. Amaka na mano viyaputula imisana cakuti yatamanyile nu kwakuutukila, pamulandu wakuti aina Izlaeli autukile ku lwanga ku mufulo sile, lyene iyasenuka nu kuzanza yao ayacocovyanga.

²¹ Pano lino Yoswa na ina Izlaeli yonsi yalola ukuti yao asile yafisime lyene yapoka umusumba, nu kuti icunsi ukufuma mu musumba uwo cikukwela papela, iyasenuka nu kuzanza aonsi aina Ai.

²² Aina Izlaeli ali mu musumba lyene iyafuma ku kwizalemana na auze mu kulwisya aina Ai, cakuti aina Ai iyalola ukuti yatiyazingulukwa na ina Izlaeli ku mbali zyonsi. Lyene aina Izlaeli iyakoma aina Ai yonsi pyu, cakuti yatapanyizye nanti wenga.

²³ Suka sile umwene waku Ai awino yalemile umupuma iyamutwala kuli Yoswa.

²⁴ Lino aina Izlaeli yamala ukukomola aonsi yonsi aina Ai mu citungu cici nu mu lwanga muno yayazinginye, nga na lino yakomola antu yonsi, aina Izlaeli yonsi kwene iyaswilila ku Ai iyaya iyakomola yao ali mwenemo.

²⁵ Impendwa ya ina Ai yonsi akomilwe pa wanda ulya yali amazimbi ikumi na yaili, aonsi na anaci.

²⁶ Yoswa atatazile aponye ikasa lyakwe ilyalemile isumo mpaka kufika lino yakomozile aina Ai yonsi.

²⁷ Lelo aina Izlaeli iyaitolela iviteekwa ni visampwe ivyamu musumba ulya, wakwe vino Yawe wanenyile Yoswa.

²⁸ Acino Yoswa aoca umusumba wa Ai nu kuusangula itongwa lya pe, wakwe vino lyaya ukufika na pilelo.

²⁹ Alino akulika umwene waku Ai ku cimuti, nga amusya akulelemba kuku kwene mpaka lino ilanzi lyawa. Nga lino ilanzi lyawa, Yoswa ayapeela ilamulo lya kusamula icala nu kucifuntula pa wingililo wa mpongolo ya musumba ulya. Alino lyene iyalonga penepo umutumba ukulu wa mawe, uno uliko ukufika na pilelo kwene.

Masunde yawelengwa pa Mwamba wa Ebali

³⁰ Lyene Yoswa akuulila Yawe, Leza wa ina Izlaeli, kavuwa pa Mwamba wa Ebali,

³¹ wakwe vino Mose umuomvi wakwe Yawe wapile ilamulo ku ina Izlaeli. Wakakuzile wakwe vino calembwa mu Lupapulo lwa Masunde yakwe Mose. Kali kavuwa akapangilwa na mawe asi yacekule yano yatatala yawazwa ni ciombelo ca cela. Apali pano yapeela kuli Yawe amawila akoca nga ni mpolelwa zya mawila ya utandano.

³² Kuku kwene pa manso ya ina Izlaeli, Yoswa aambulula pa mawe amasunde yakwe Mose, yano wene walemvile.

³³ Aina Izlaeli yonsi, ainamasi na akaya kwene, kumwi ni ntunguluzi zyao, na yamusika nga na yakapingula, yaimi ku mbali zyoili izya Mbokosi ya Upangano yakwe Yawe, ukulungatana na yasimapepo aina Levi, yao aisenzile. Citika wa antu yaimi ala iyalozya ivinso ku Mwamba wa Gelizimu nga na citika muze ala iyalozya ivinso ku Mwamba wa Ebali, kuti yafikilizye ilamulo lyakwe Mose umuomvi wakwe Yawe ilya kupolelela aina Izlaeli.

³⁴ Pacisila cakwe vii, Yoswa awelenga amazwi yonsi amu masunde, akumile kupolelelwa ni ntipu, wakwe vino yalembwa mu lupapulo lwa Masunde.

³⁵ Kutasiile izwi nanti lyonga mu masunde yano Mose wapile lino Yoswa atawelenzile pa manso yi uvi lyonsi lya ina Izlaeli, ukwika pamwi na anaci na ana, nga na inamasi aikalanga pakasi kao.