Yoswa 7 - Amazwi Yakwe Leza 2013

Akani wifya

¹ Lelo aina Izlaeli yamwi yatali acumi ku ciindo cino icakumile ivintu vino vyapeelwa ku kononwa. Akani umwana wakwe Kalimi, umwana wakwe Zimuli, umwana wakwe Zela, uwa mutundu wakwe Yuda, atoola ivintu vimwi vino yainzile. Caleka ukali wakwe Yawe ufulumila aina Izlaeli.

² Yoswa apali pakutuma antu yamwi ukufuma ku Yeliko iyaya ku Ai, pipi nu ku Beti Aveni lwaku ufumondaka waku Betele, nga ayanena ati, “Pitangini mutumbele mukalengule impanga ilya.” Acino antu yalya iyapita iyaya yalengula umusumba wa Ai.

³ Lino yawela kuli Yoswa, iyamunena yati, “Nanti tutaile swensi kweneko cisi nu mulandu. Tuma sile antu amazimbi yaili nanti yatatu akuti yakapoke impanga ilya. Utatuma ivita vyonsi pasi pano aikazi amu Ai yatavula.”

⁴ Acino aonsi aileko yali manye pipi na mazimbi yatatu, lelo yayacimvizye ku ina Ai,

⁵ iyakomapo antu amakumi yatatu na mutanda. Asyala nayo iyayacocovya ukutandikila sile pa mpongolo ya musumba mpaka ukufika lwaku cimbotela nga yayakoma pa mutentemuko wa mwamba. Pali cii aina Izlaeli iyatovoka nga nu munyanya iuyaputuka. Iyuvwa intete nu kuzakaza wakwe cimwi.

⁶ Lyene Yoswa alepula insalu zyakwe nga afukama pansi afupime ku nkolelo ya Mbokosi ya Upangano yakwe Yawe, alali papa kwene mpaka nalino ilanzi lyawa. Intunguluzi zya ina Izlaeli nazyo izicita icili cimwi, nga iziisansa ulukungu pa mitwe.

⁷ Lyene Yoswa akuta ati, “Uwi! We Yawe Simwandalali, uzye pacani cino walamvizye antu yako kuno mbalama ya Yodani kuti utupeele mu makasa ya ina Amoli pakuti yatonone? Si cange cizipe uleka twikale ku mbalama yuze iya Luzi lwa Yodani!

⁸ Owe Mwene! Uzye namalanda cani, pasi pano aina Izlaeli yatiyapuuka anisi yao?

⁹ Lino aina Kenani pali pamwi na antu yauze akaya ya mpanga ilya yaluvwa cii, yaliza yatuzinguluke nu kutulovya swensi pano pansi. Uzye lyene wemo ulacita cani pakuti umucinzi wako ukulu utakononeke?”

¹⁰ Alino Yawe anena Yoswa ati, “Si katuka! Uzye icani cino ufupime pansi mu musango ndi uwo?

¹¹ Aina Izlaeli yatiyifya. Yatiyaluvyanya Upangano wane uno nayapile ilamulo kuti yausunge. Yene yatiyatola ivintu vimwi vino vyapeelwa ku kononwa. Yene yatiyaviya, yatiyatumpoka, yatiyavifisa mu viya vyao.

¹² Icaleka aina Izlaeli yatiyayacimvya ku anisi yao. Yene yatiyasimula kantapepela, pamulandu wakuti aisikulu yatiyailetelela ukononeka. Acino nani namatala imufutuke, na pakuti nupya imupalamile, suka mwatala monona vino namulesizye ukutola.

¹³ “Ale fwandi katuka ukasangulule antu. Uyanene uti, ‘Isangululini mweisikulu apakuiteyanya pali vino vilacitika mutondo. Uyanene uti kuu kuli kulanda kwakwe Yawe, Leza wa ina Izlaeli ukwakuti, Pakasi kinu mukweti ivintu vino namunenyile ukonona, mwe ina Izlaeli mwe! Mulaposiwa ukulwa na anisi inu suka sile mwatala monona ivintu vivyo.’

¹⁴ Mutondo katondo cila mutundu uce waiza onga onga. Umutundu uno Yawe wasonta ulinzile ukwiza ku nkolelo uluko nu luko, nga ni ng'anda ino Yawe wasonta yalaiza wenga wenga.

¹⁵ Alino umuntu wino alazanwa ni vintu vino vyapeelwa ku kononwa, wene uwakoca pamwi na amu ng'anda yakwe yonsi nga na vyonsi vino wakwata. Pasi pano wene asi uwacumi ku upangano wakwe Yawe nupya watacita icamuzewanya mu Izlaeli.”

¹⁶ Katondotondo uwanda uwalondelela Yoswa pali pakunena cila mutundu wa ina Izlaeli ukwiza ku nkolelo, nga icilema umutundu wakwe Yuda.

¹⁷ Amu luko lwakwe Yuda Yiza ku nkolelo. Lyene asonta amu luko lwakwe Zela ing'anda ni ng'anda, nga icilema Zimuli.

¹⁸ Alino Yoswa pali pakunena cila muntu uwamu ng'anda yakwe Zimuli ukwiza ku nkolelo, nga icilema Akani umwana wakwe Kalimi, nupya umwizikulu wakwe Zabidi, umwana wakwe Zela, uwa mutundu wakwe Yuda.

¹⁹ Lyene Anena Akani ati, “Uwi mwanane, sungala ulande icisinka pa manso yakwe Yawe Leza wa ina Izlaeli nga wemwisikulu uilongwele kunoli. Unene sile vino watucita, utezya umfise nanti kamwi.”

²⁰ Akani nawe aasuka ati, “Endi icacumi! Nemo natinifya kuli Yawe Leza wa ina Izlaeli. Vii avili vino nacisile:

²¹ Pali vino twasamfile naweni ikoti ilisuma sana ilyaku Babiloni, na siluva angalingana impiya zya masyekele amakilogalamu yaili, ni ciulungwa cakwe zaabu icinyome ukucizya pali citika wakwe kilogalamu. Nakumvilwe ivintu vii nu kuvitola. Vyonsi vii mumavizana umwi taalu lyane amuno navifisa, kumwi na siluva umwisika lyaviko.”

²² Yoswa pali pakutuma inkombe zimwi, nga nazyo izisimula ukuya kwi taalu lilya, nga kuku kwene iyazana ikoti ilifiswe umwi taalu kumwi na siluva umwisika.

²³ Lyene intumi zizi izisenda ivintu vivi ukufuma mwi taalu nu kuvitwala kuli Yoswa uwali pamwi na ina Izlaeli yonsi nu kuvilambalika pansi pa manso yakwe Yawe.

²⁴ Alino Yoswa pamwi na ina Izlaeli yonsi iyasenda Akani umwana wakwe Zela, kumwi na siluva, ni koti, ni ciulungwa cakwe siluva, na ana yakwe aonsi na anaci, na yamasaye yakwe, na yapunda yakwe, ni mfwele zyakwe, ni taalu lyakwe, nga na vyonsi vino wali navyo, nga yayaleta ku Cifoloma ca Akoli.

²⁵ Yoswa auzya ati, “Uzye pacani cino watuletela intazi ii? Ilelo Yawe amakuletela intazi.” Alino aina Izlaeli yonsi iyamutama na mawe mpaka afwa, iyatama na amu ng'anda yakwe kwene nga iyayoca kumwi na vyonsi vino yali navyo.

²⁶ Alino iyatulikapo nu mutumba wa mawe ukulu sana. Umutumba uu na ndakai apano waya. Ali cino ukufika na pilelo pantu papa yakapaama yati Cifoloma ca Akoli. Awe lyene nu ukali wakwe Yawe pali pakusila.