Yoswa 6 - Amazwi Yakwe Leza 2013

Ukuwa kwa musumba wa Yeliko

¹ Umusumba wa Yeliko yaukuulilile ilinga ningo sana pamulandu wa koopa aina Izlaeli. Kutali umwi uwakwingila mwenemo nanti ukufumila ukunzi.

² Lyene Yawe anena Yoswa ati, “Lola, Natimpeela umusumba wa Yeliko nu mwene wauko nga ni vita vyakweo mu makasa yako. Wewe kumwi ni vita vyako mulinzile ukupita nu kuzinguluka umusumba ulya iila lyonga. Mulinzile ukucita ci pa manda mutanda.

³ Wewe pamwi ni vita vyako vyonsi mulinzile ukuzinguluka umusumba, mula mukuuzinguluka iila lyonga cila wanda pa manda mutanda.

⁴ Yasimapepo cinimbali yace yasende intandala izyapangilwa ni mpembe zyakwe yasuuku, nupya yace yakolelele Mbokosi ya Upangano. Pa wanda uwalenga cinimbali, mulinzile ukupita ukuzinguluka umusumba amaila cinimbali, na yasimapepo yala yakulizya intandala.

⁵ Lino muvwa kuno yakulizya intandala yao, lyene impuka yonsi iya vita ilinzile yalaizya ukulaizya ukukulu. Alino lyene ilinga lya musumba lilawa nga ni vita vilaya pa nkolelo. Cila muntu alingila mwenemo ulunga na panoli.”

⁶ Acino Yoswa umwana umonsi wakwe Nuni aama yasimapepo nga ayanena ati, “Nyemulini Mbokosi ya Upangano yakwe Yawe, nga muleke yasimapepo cinimbali yakweyolelele ala yatiyasenda intandala.”

⁷ Nga apeela ilamulo ku antu ati, “Yangini pa nkolelo! Pitini muzinguluke umusumba, muleke ni vita ivyakucingilila vikolelele Mbokosi ya Upangano yakwe Yawe.”

⁸ Lino Yoswa wamala ukupeela ilamulo li ku antu, yasimapepo cinimbali asenzile intandala cinimbali pa manso yakwe Yawe iyaya pa nkolelo, yala yakulizya intandala zyao, nga ni Mbokosi ya Upangano yakwe Yawe ala iyalondelile pa nsizi.

⁹ Ivita ivyakucingilila ivikolelela yasimapepo akulizya intandala, nga ni vita ivyakufundikizya navyo ivilondelela Mbokosi ya Upangano pacisila, ni ntandala zila zikulila.

¹⁰ Lelo walanga Yoswa watapeela ilamulo ku antu kuti yateezya ukulaizya, nanti ukukatusya izwi, nanti ukulanda izwi nanti alimwi mpaka uwanda uno alayanena ukupunda. Alino lyene yangapunda na maka.

¹¹ Alino lyene Yoswa aleka kuti yasende Mbokosi ya Upangano yakwe Yawe yazinguluke umusumba iila lyonga. Nupya antu iyaweluluka mu nsakwe amuno iyalala usiku ulya.

¹² Katondotondo, uwanda uwalondelilepo Yoswa na Yasimapepo yanyemula Mbokosi ya Upangano yakwe Yawe.

¹³ Alino yasimapepo cinimbali asenzile intandala cinimbali iyakolelela Mbokosi ya Upangano yakwe Yawe yala yakulizya intandala. Ivita ivyakucingilila iviyakolelela nga ni vita ivyakufundikizya vila vilondelile Mbokosi ya Upangano yakwe Yawe, ni ntandala zila zikulila lino yakupita.

¹⁴ Nu wanda wakwe ciili iyapita ukuzinguluka umusumba iila lyonga, alino iyaswilila ku nsakwe. Na vivyo avili vino yacisile pa manda mutanda.

¹⁵ Pa wanda uwalenga cinimbali, iyakatuka pa macaca nga iyapita ukuzinguluka umusumba amaila cinimbali mu musango uli onga kwene. Lelo pa wanda ukwene sile yene yazingulwike umusumba amaila cinimbali.

¹⁶ Alino iila kwene ilyalenga cinimbali, lino yasimapepo yalizya intandala, Yoswa apeela ilamulo ku antu, ati, “Pundini! Pano Yawe watapeela umusumba uu kunomuli.

¹⁷ Umusumba uu pali pamwi na kali konsi akaya mwenemo, vyapeelwa kuli Yawe kuti vyononwe. Kusi umwi uwakusya umupuma, suka sile cizelele Laabu apali pamwi na yao yonsi ali mu ng'anda yakwe na aliwe. Pasi pano wene wafisile inengu zino twatumile.

¹⁸ Alino namwe muisunge ku vintu vino vyapeelwa ku kononwa, kuti mutailetelela uwononesi pa kulondela ulunkumbwa lwa kuitolela cimwi pali vino ivipelwa ukononeka. Pasi pano ndi mwacita vivyo insakwe yonsi ya ina Izlaeli ale yapeelwa ukononeka nu kuiletelela uzanzo.

¹⁹ Siluva na zaabu wensi nga ni vintu vyonsi vya mukuwa ni vya vyela vyene ivyakwe Yawe nupya vilinzile ukwikwa mu cipao cakwe.”

²⁰ Lyene lino intandala zyalila, antu nayo iyapunda na maka, nga ni linga ilipona. Ivita navyo ivisimwilila mukasi, cila muntu ulunga na pano wali, nga yapoka umusumba ulya.

²¹ Alino yapeela umusumba ulya kuli Yawe kuti wononwe nga ku malupanga yano yali nayo iyakomola ivyaumi vyonsi mu musumba, aonsi na anaci, ance na akote, ni ng'ombe, ni mfwele, nga na yapunda kwene.

²² Yoswa pali pakunena aonsi yalya yaili yano yendizye impanga, ati, “Yangini mukingile mu ng'anda yakwe cizelele nga mufumye aliwe kumwi na amu ng'anda yakwe yonsi ukunzi, ukulingana navino mwalavile nu mulapo kunoli.”

²³ Acino alumendo yalya aile iyendezya apali pakuyako nu kufumya Laabu, na isi na nyina na yakalume yakwe nga na amu ng'anda yakwe yonsi. Yafumya amu ng'anda yakwe yonsi nu kuyika mu ncende yonga ukunzi ya nsakwe zya ina Izlaeli.

²⁴ Alino iyoca umusumba onsi na vyonsi ivyali mwenemo, lelo yika siluva na zaabu nga ni viombelo vya mukuwa mu cipao camu Ng'anda ikulu yakwe Yawe.

²⁵ Lelo Yoswa atakomile cizelele wilya Laabu, ni vyamu ng'anda yakwe, na amu ng'anda yakwe, pamulandu wakuti wene wafisile aonsi yano Yoswa watumile ku kuya endezya umusumba wa Yeliko. Nga wene pamwi na amu ng'anda yakwe yakaikala pakasi ka ina Izlaeli na pilelo kwene.

²⁶ Pa nsita ilya Yoswa avwanga amazwi yaa amisindicila akuti, “Si citipu cakwe Yawe cikaye pa muntu wino aliza ku kukuululula umusumba uu, wa Yeliko: pakusokola umufula wauko, cazipa akafwilwe umwana wakwe umonsi wiyeli, na pakusimpa impongolo zyakweo, cazipa akafwilwe umwana wakwe umonsi kasuli.”

²⁷ Yawe wali na Yoswa, nga nu lulumbi lwakwe Yoswa lusalangana mu mpanga ilya yonsi.