Yoswa 5 - Amazwi Yakwe Leza 2013

¹ Lino Yamwene yonsi aina Amoli aikalanga ku uwondaka wa Luzi lwa Yodani alino na yamwene yonsi aina Kenani aikalanga mu nkumba yakwe yemba wa Adiliya yuvwa ukuti Yawe watakamya Yodani pa manso ya ina Izlaeli mpaka itusuka itulamba, iyazakaza ku ntete nupya iyatovoka pamulandu wa ina Izlaeli.

Aina Izlaeli yasilamulwa ku Giligali

² Pa nsita ilya Yawe anena Yoswa ati, “Conga imipeni ya mawe pakuti usilamule aina Izlaeli.”

³ Acino Yoswa aconga imipeni ya mawe nu kusilamula aina Izlaeli pa Gibeati Halaloti.

⁴ Icalenzile ukuti Yoswa asilamule aonsi aici: Aonsi yonsi afumile ku Eguputo, yao alinzile ukulwa inkondo yafwilile umu nzila mu lwanga pacisila ca kufuma mu Eguputo.

⁵ Antu yonsi afumile mwenemo yasilamwilwe, lelo antu yonsi avyalilwe mu lwanga mu nsita iya lwendo ukufuma mu Eguputo walanga yatali yasilamulwe.

⁶ Aina Izlaeli yazeulukanga mu lwanga imyaka amakumi yani suka aonsi yonsi ali vita mu luko iyafwa, yonsi afumile mu Eguputo yano yatayezile Yawe. Pano Yawe walafile kunoyali ukuti yatalatala yalole impanga ino wene walavile ivikolwe vyao ukuti alaipeela kunotuli, impanga ilya ikulu nupya ivunde cuze.

⁷ Acino ana yao yano Yawe wapyanikile penepo pa cifulo cao, ali yano Yoswa asilamula. Yene wayasilamwile pamulandu wakuti pa lwendo lwao walanga yatali yasilamulwe

⁸ Lino yamala ukusilamulwa, uluko lonsi ilutala ilusyala mu nsakwe muno yali pakuti ivilonda vimalilike ukupola.

⁹ Lyene Yawe anena Yoswa ati, “Ilelo natimfumya ukunenola kwa ina Eguputo panomuli. Acino na pilelo kwene icifulo cici cikaamwa ukuti Giligali.”

¹⁰ Lino ilanzi lyawa pa wanda uwalenga ikumi na yani, lino yatenzi mu nsakwe zyao zino yakuuzile ku Giligali lwa ku manyika aku Yeliko, aina Izlaeli iyazevya Cimulo ca Ucilo.

¹¹ Alino pa wanda uwalondelilepo Cimulo ca Ucilo, pa wanda kwene ulya iyatomola ivyakulya vya mpanga ilya: ingano izipuke nga ni mikate isi na citutumusi.

¹² Cali ukufuma pa wanda kwene ulya, lino yatandike ukulya iviseekwa vya mpanga ilya, alino na mana kwene watile ukupona. Aina Izlaeli yatatazile yakwate mana nupya. Lelo umwaka ulya yene yalyanga iviseekwa vya mpanga ya Kenani.

Umungeli wakwe Yawe walolekela Yoswa

¹³ Lyene lino Yoswa wali pipi nu ku Yeliko, asanzula amanso nga alola umuntu aimi ku nkolelo yakwe ala alemile ulupanga lwakwe mu minwe. Yoswa amulungama nga amuuzya ati, “We, uzye uli ku lusansa lwitu nanti uli ku lusansa lwa anisi itu?”

¹⁴ Nawe amwaasuka ati, “Awe, insi ku lusansa ululi lonsi! Nemo indi pano wakwe musika mukalamba uwa vita vyakwe Yawe.” Yoswa afukama pansi afupime, nga akomela na makufi ati, “Musambazi, nene muzya kunuli. Uzye lyene icani cino ukulonda kuti incite?”

¹⁵ Nga musika mukalamba uwa vita vyakwe Yawe amunena ati, “Zula ndyatu zyako, pamulandu wakuti cifulo cino uimililepo icamuzilo.” Yoswa nawe acita vivyo kwene.