Yoswa 4 - Amazwi Yakwe Leza 2013

Amawe ikumi na yaili aciusizyo

¹ Walanga uluko lonsi lwamala ukulamba Yodani, Yawe anena Yoswa ati,

² “Solola aonsi yaili ukufuma mu antu, muli cila mutundu mufume wenga,

³ nga uyapeele ilamulo kuti yasole amawe ikumi na yaili apakasi ka Luzi lwa Yodani, ukufuma pa ncende kwene ilya pano yasimapepo yimilile, muyasende nga mukayike pansi pa ncende ino mumaya mukasake insakwe usiku.”

⁴ Alino Yoswa aama aonsi yalya ikumi na yaili yano wasolwile ukufuma mu ina Izlaeli, muli cila mutundu mufuma wenga,

⁵ nga ayanena ati, “Yangini pa nkolelo ya Mbokosi ya Upangano yakwe Yawe Leza winu, mwingile apakasi ka Luzi lwa Yodani. Cila wenga uwa munomuli alinzile ukutoola iwe nu kulisenda pa ciye, ukulingana ni mpendwa ya mitundu ya ina Izlaeli,

⁶ kuti liye icimanyililo apakasi kinu. Mu manda akwiza lino amu mupanda winu yalamuzya vino amawe ya yakusenula kunomuli,

⁷ lyene muce muyanene ukuti amanzi amu Luzi lwa Yodani yatile ukupita lino Mbokosi ya Upangano yakwe Yawe yalamvile. Amawe ya yamayanga iciusizyo cakwe cii ku ina Izlaeli amanda pe.”

⁸ Aonsi yalya iyalondela amalamulo yakwe Yoswa. Iyasola amawe yalya ikumi na yaili apakasi ka Luzi lwa Yodani, ukulingana ni mpendwa ya mitundu ya ina Izlaeli, wakwe vino Yawe wapeezile ilamulo kuli Yoswa. Apali pa kuyasenda nu kuya yika pansi mu nsakwe zyao.

⁹ Yoswa atoola amawe ikumi na yaili nga ayasimpa apakasi ka Luzi lwa Yodani, papa kwene pano yasimapepo asenzile Mbokosi ya Upangano yimilile. (Napilelo kwene amawe yayo apano yacili.)

¹⁰ Lyene yasimapepo asenzile Mbokosi ya Upangano yasyala yaimi apakasi ka Luzi lwa Yodani mpaka ukufika lino antu yamala kufikilizya vyonsi vino Yawe wapeezile Yoswa ilamulo kuti yacite, wakwe vivi kwene vino Mose wanenyile Yoswa. Antu iyacincila ukulamba,

¹¹ nga zuwazuwa lino yonsi kwene yamala ukulamba, yasimapepo iyakolelela antu yonsi yala yasenzile Mbokosi ya Upangano yakwe Yawe.

¹² Amu mutundu wakwe Lubeni, na wakwe Gadi nga nu mutundu pakasi wakwe Manase ali yano yakolelile aina Izlaeli yonsi ala iyaipangasya ivyanzo, wakwe vino Mose wayatungulwile.

¹³ Pa manso yakwe Yawe antu ukulingana na mazimbi amakumi yani, yao aiteinye ku ulwi, iyalamba nu kulungama ku manyika aku Yeliko.

¹⁴ Uwanda ulya Yawe acindamika Yoswa sana pa manso ya ina Izlaeli yonsi. Nga antu iyamucindika mu manda ya umi wakwe onsi, ndi vino yacindikanga Mose.

¹⁵ Lyene Yawe anena Yoswa ati,

¹⁶ “Pela ilamulo kuli yasimapepo yano yasenzile Mbokosi ya Upangano kuti yafume umukasi ka Luzi lwa Yodani.”

¹⁷ Acino Yoswa apeela ilamulo kuli yasimapepo, ati, “Fumini umukasi ka Luzi lwa Yodani.”

¹⁸ Lino sile yasimapepo yalya asenzile Mbokosi ya Upangano yakwe Yawe yacifuma ukunzi ku cituntu ca Luzi lwa Yodani, uluzi nupya ilutandika ukupita nu kusambela monsi wakwe vino cali inkolelo.

¹⁹ Pa wanda uwalenga ikumi, mu mwezi wakutandika antu yalamvile Luzi lwa Yodani, iyaya yakuula insakwe mu Giligali pa mupaka waku ufumondaka wa musumba wa Yeliko.

²⁰ Alino ku Giligali Yoswa asimpa amawe yalya ikumi na yaili yano yafumizye mu Luzi lwa Yodani.

²¹ Lyene anena aina Izlaeli ati, “Mu manda akwiza lino amu mupanda winu yaluzya yaisi vino amawe ya yakusenula,

²² muce muyanene muti, ‘Aina Izlaeli yalamvile Luzi lwa Yodani pa musili uume.’

²³ Pano Yawe Leza winu umike amanzi amu Luzi lwa Yodani pa manso ya vikolwe vinu mpaka visuka vilamba. Yawe Leza winu wacisile icili conga na kuli Yemba Muyenzu kwene, wino wumike pa manso yaviko mpaka visuka vilamba.

²⁴ Wene wacisile ci pakuti antu yonsi amu nsi yamanye ukulu wa maka yakwe Yawe, na kuti mungaoopa Yawe Leza winu amanda pe.”