Yoswa 3 - Amazwi Yakwe Leza 2013

Aina Izlaeli yalamba Yodani

¹ Katondotondo Yoswa na Ina Izlaeli yonsi iyatenuka ukufuma ku Syitimu nga iyaya ku Yodani, kuno yakuuzile insakwe lino yatacili yalambe.

² Apa mpela ya manda yatatu yamusika ya vita iyasalala mu nsakwe zyonsi,

³ nga yapeela ilamulo ku antu yati, “Lino mwaca mwalola yasimapepo aina Levi yasenzile Mbokosi ya Upangano yakwe Yawe Leza winu ku nkolelo, namwe kwene mulinzile ukukatuka musye vifulo vinu muilondelele pacisila.

⁴ Lyene mulamanya intunga ukwakuya, pasi pano mwemo mutatazile mupita umu nzila ii. Lelo ukufuma apayelile Mbokosi iyo ya Upangano mulinzile ukusyalikila musye iciposi ukulingana intampulo kilomita wenga. Mutakezye ukupalamila ku Mbokosi iyo.”

⁵ Yoswa anena antu ati, “Isangululini mweisikulu, pano mutondo Yawe alacita icinjelengwe apakasi kinu.”

⁶ Alino Yoswa anena yasimapepo ati, “Nyemulini Mbokosi ya Upangano nga mupite mukolelele antu.” Acino iyakatusya Mbokosi nga iyakolelela antu.

⁷ Lyene Yawe anena Yoswa ati, “Vino namacita ilelo vimalenga kuti aina Izlaeli yonsi yatandike kucindamika, pakuti yamanye ukuti nemo indi nawe wakwe vino nali na Mose.

⁸ Upeele ilamulo lii kuli yasimapepo yano yakasenda Mbokosi ya Upangano, uti, ‘Lino mulafika pa cituntu ca Luzi lwa Yodani, muce mwingile nu kwimilila mu luzi mukasi.’ ”

⁹ Alino Yoswa anena aina Izlaeli ati, “Palamilini kuno nga muyuvwile amazwi yakwe Yawe Leza winu.

¹⁰ Lino mulaya pankolelo, wene atalaposiwa ukumuzingila aina Kenani, aina Hiti, na ina Hivi, na ina Pelizi, na ina Giligasi, na ina Amoli nga na ina Yebusi. Vii avino mulamanya ukuti Leza wa umi ali pakasi kinu

¹¹ lilyo lino yasimapepo yalasenda Mbokosi ya Upangano ya Mwene wa nsi yonsi nga yamukolelele ukwingila mu Luzi lwa Yodani.

¹² Lyene alino muce musolole aonsi ikumi na yaili ukufuma mu mitundu ya ina Izlaeli, umonsi wenga ukufuma muli cila mutundu.

¹³ Nga zuwazuwa lino yasimapepo asenzile Mbokosi ya Upangano yakwe Yawe, umwene wa nsi yonsi yalyata mu Luzi lwa Yodani, amanzi yaluko yano yakukonkolokela ukwisika yalaputulwa nga yatulumane pamwi.”

¹⁴ Caleka lino antu yakuululula insakwe zyao kuti yakalambe Luzi lwa Yodani, yasimapepo asenzile Mbokosi ya Upangano iyapita iyayakolelela.

¹⁵ Lyene Luzi lwa Yodani lukasambela monsi mu nsita yonsi iya uzombozi, nga lelo zuwazuwa lino yasimapepo asenzile Mbokosi ya Upangano yafika ku Yodani nga ni ngazo zyao zyakumya amanzi mu mbali,

¹⁶ amanzi ukufuma ukupela ya luzi iyata ukupita. Amanzi iyatulumana kufika na papela ya cituntu kulingana intampulo izingi ukuwelela icisila, ukufika na lwaku musumba wa Adamu, pipi nu ku Zaletani. Pa nsita ili imwi kwene amanzi yano yakonkolokanga yakuya kuli Yemba wa Alaba (kuli kuti Yemba wa Musilya) iyata ukupita iyaputuka. Acino antu iyalambila ku mbalama yuze kulungatana nu musumba wa Yeliko.

¹⁷ Yasimapepo asenzile Mbokosi ya Upangano yakwe Yawe yimilila silili pa musili uume apakasi ka Luzi lwa Yodani, nga aina Izlaeli yonsi yala yakulamba, mpaka uluko lonsi ilulamba.