Yoswa 24 - Amazwi Yakwe Leza 2013

Yoswa wavwanga ku antu ku Syekemu

¹ Lyene Yoswa akonganika antu amu mitundu yonsi ya ina Izlaeli ku Syekemu. Aama aikolo, ni ntunguluzi, na yakapingula nga na yamusika yonsi ya ina Izlaeli, nga nayo yiiza yimilila pa manso yakwe Yawe.

² Alino Yoswa anena antu yonsi ati, “Yawe, Leza wa ina Izlaeli, watavwanga ati, ‘Mpiti mpiti, ivikolwe vinu, ukwikapo na Tela isi wakwe Abulaamu na Nawoli, yatenzi ku mbalama ya Luzi lwa Yufulate nupya yatumikilanga tuleza tuze.

³ Lelo nemo natoozile Abulaamu icikolwe cinu ukufuma ku mbalama ilya iya Luzi lulo nu kumutungulula ukusalala impanga yonsi iya Kenani nga imupeela amu mupanda avule. Namupiile Isaki,

⁴ nga Isaki nawe amupeela Yakobo na Esau. Napeezile impanga ya myamba iya Seili kuli Esau, lelo Yakobo na ana yakwe yatentemukile ku Eguputo.

⁵ Lino papisile insita, natumile Mose na Aloni, nga imponya impungo pa ina Eguputo, nga pacisila iniza imufumya mwenemo.

⁶ Nafumizye ivikolwe vinu mu Eguputo, nga aina Eguputo yatumile amaceleta yao na ali pa mfwalasi kuti yayalondelele. Lelo lino ivikolwe vinu vizile vifika pali Yemba Muyenzu,

⁷ ivikuta kunondi, nga nawe aika akanda pakasi kao na ina Eguputo. Alino aleka na yemba wilya awela nu kwiza tuwizya aina Eguputo. Mwailolile na manso inu vino nacitile aina Eguputo.’ ” “Mwatenzi mu lwanga pa nsita ntali.

⁸ Alino lyene namulesile ku mpanga ya ina Amoli, yano yikalanga lwaku ufumondaka wa Luzi lwa Yodani. Yene yamulwisizye, nga lelo nemo nayapile mu makasa inu. Nemo nayononyile pa manso inu, nga namwe imupoka impanga yao.

⁹ Lyene Balaki umwana wakwe Zipoli, umwene waku Moabu, akatuka kwiza lwisya aina Izlaeli. Wene atuma intumi ku kwama Balamu umwana wakwe Beoli kuti aize atipwile mwemwe.

¹⁰ Lelo nemo nakanyile ukuvwa Balamu. Caleka wene atwalilila kupolelela mwemwe, nga nani impususya mwemwe mu makasa yakwe Balaki.

¹¹ Alino mwalamvile Luzi lwa Yodani imwiza ku Yeliko. Aikazi amu Yeliko nayo iyamulwisya, wakwe vino aina Amoli, aina Pelizi, aina Kenani, aina Hiti, aina Giligasi, aina Hivi na ina Yebusi yacisile. Lelo nayapile mu makasa inu.

¹² Nene kwene nayaponyezizye isakamiko, nga nalyo ililenga yamwene yalya yaili ya ina Amoli kuti yutuke pa manso inu. Mwemo mutacisile cico ku lupanga lwinu nanti ulapwa.

¹³ Acino namupiile impanga ino mutatazile mulime nga ni misumba ino mutatazile mukuule. Nga namwe mukaikala mwenemo nu kulya iviseekwa vyamu vyalo vya matingi ni vya miolivi ino mwemo mutalemile.”

¹⁴ Lyene Yoswa atwalilila kuvwanga ati, “Fwandi lyene mulinzile koopa Yawe nu kumutumikila umucumi nu mukutailwa. Sumbini tuleza tuno ivikolwe vinu vyapepanga ku mbalama ya Luzi lwa Yodani nu mu Eguputo, nga mwatumikila Yawe.

¹⁵ Lelo ndi mutakasi ukutumikila Yawe, lyene sololini ilelo kwene wino mumatumikilanga, nga cakuti a tuleza tuno ivikolwe vinu vyatumikilanga ku mbalama ya Luzi lwa Yodani, nanti tuleza twa ina Amoli, yano pali ndakai mukwikala mu mpanga yao. Lelo nemo na amu ng'anda yane, tumatumikilanga Yawe.”

¹⁶ Lyene antu yaasuka yati, “Cipelele ukutali na kunotuli ukutazyela ukutumikila Yawe kuti tukatumikila tuleza tuze!

¹⁷ Pasi pano Yawe Leza witu umwisikulu uwatufumizye mu uzya mu Eguputo, sweswe ni vikolwe vitu, nga acita ni vinjelengwe vivi vikulu pa manso itu. Wene watucingilile pa lwendo lwitu lonsi nga na pakasi ka antu amu nko zyonsi muno twapisile.

¹⁸ Lino twingilanga mu mpanga ii, Yawe atuzingila aina Amoli aikalanga mukwene. Acino naswe kwene tumatumikilanga Yawe, pano wene ali Leza witu.”

¹⁹ Yoswa avwanga ku antu ati, “Mungaposiwa kutumikila Yawe, pano wene a Leza uwamuzilo. Wene a Leza asilonda wakucimvyanya nawe. Wene atalamwelela pali ucisanguka winu na pa maifyo inu.

²⁰ Ndi mwafutatila Yawe nu kutumikila tuleza tuze, nawe alamusenuka alete nu uzanzo panomuli nga amulovye, nanti angala wene wamucitilanga ivisuma.”

²¹ Antu iyanena Yoswa yati, “Awe! Swemo tukaatumikila Yawe.”

²² Lyene Yoswa ayanena ati, “Mwemwe yakambone mweisikulu mwenga ukuti mwatimusolola ukutumikila Yawe.” Nga nayo yavwanga yati, “Endi, sweswe tuli yakambone.”

²³ Yoswa nawe ayanena ati, “Fwandi sumbini tuleza tuno tuli pakasi kinu nu kufima imyenzo inu iye iyakuyela Yawe, Leza wa ina Izlaeli.”

²⁴ Lyene antu iyanena Yoswa yati, “Swemo tumatumikilanga Yawe Leza witu nu kumuyela.”

²⁵ Acino pa wanda ulya kwene Yoswa acitila antu upangano, nga kuku kwene ku Syekemu ayapeela vipope na masunde.

²⁶ Nga Yoswa alemba ivintu vii mu Lupapulo lwa Masunde lwakwe Leza. Lyene atoola iwe ilikulu, nga alimika papa kwene umwisika ya muti umu oki, uwali lwa mu Ncende Yamuzilo yakwe Yawe.

²⁷ Yoswa anena antu yonsi ati, “Lolini, iwe lii lilaya akambone uwakutusinila. Pano lyene lyatilyuvwa amazwi yonsi yano Yawe watavwanga kunotuli. Lyene lilaya akambone uwakumusinila ndi cakuti mwaca mwasangukila Leza winu.”

²⁸ Alino Yoswa ata antu iyapita, cila muntu aya ku mpanga yakwe iyaupyanyi.

Imfwa yakwe Yoswa na Eleaza

²⁹ Lino ivintu vii vyonsi vyapita, Yoswa umwana umonsi wakwe Nuni, nupya umuomvi wakwe Yawe, afwa ala ali ni myaka umwanda onga ni kumi.

³⁰ Iyamuzika mu mpanga yakwe iyaupyanyi, ku Timunati Selaa umu mpanga ya myamba yakwe Efulemu, lwaku katutu ka Mwamba wa Gaasyi.

³¹ Aina Izlaeli yatumikilanga Yawe mu nsita yonsi lino Yoswa na ikolo amukulilile yali nu umi. Aikolo kwene yaya yamanyile imilimo yonsi ino Yawe wacitile aina Izlaeli.

³² Amafupa yakwe Yosefu, yano aina Izlaeli yasenzile ukufuma ku Eguputo, iyayazika mu Syekemu mu katungu kano Yakobo wakazile ku ana yakwe Hamoli, isi wakwe Syekemu, pa mpiya zyakwe siluva ukulingana umwanda onga. Impanga ii yizile iya icaupyanyi ca amu mupanda wakwe Yosefu.

³³ Eleaza umwana wakwe Aaloni afwa, nga iyamuzika ku Gibeya, umusumba wakwe Pineasi umwana wakwe, uno wapezilwe kunoli mu mpanga ya myamba yakwe Efulemu.