Yoswa 22 - Amazwi Yakwe Leza 2013

Yoswa wata imitundu pakasi kuti iswilile kumwao

¹ Alino Yoswa aama amu mutundu wakwe Lubeni, na wakwe Gadi nga nu mutundu pakasi wakwe Manase

² nga ayanena ati, “Mwatimucita vyonsi vino Mose umuomvi wakwe Yawe wamupile ilamulo kuti mucite, nupya mwatimuyela na malamulo yane muli vyonsi kwene.

³ Ukufika na ndakai kwene mutatazyela anyonko aina Izlaeli. Lelo mwalondela ilamulo lyakwe Yawe leza winu.

⁴ Lolini lyene Yawe watapeela umutende ku anyonko wakwe vino wayalavile. Lyene fwandi swililini kumwinu, ku mpanga ino Mose umuomvi wakwe Yawe wamupile lwaku ufumondaka wa Luzi lwa Yodani.

⁵ Lelo mutekele kuti musunge amasunde na malamulo yano Mose umuomvi wakwe Yawe wamupile yano yakati mwatemwa Yawe Leza winu nu kucita ukulonda kwakwe. Nupya muye acumi kunoli nu kumutumikila ni myenzo inu yonsi nu umi winu onsi.”

⁶ Lyene Yoswa ayapolelela ayata iyapita, nga iyaya kumwao.

⁷ Umutundu pakasi wakwe Manase Mose aupela impanga yamu Basyani, nga umutundu uze pakasi pamwi na ina yao nao aupela impanga lwaku ufumondaka wa Luzi lwa Yodani. Lino Yoswa wayanena kupita kumwao, ayapolelela,

⁸ ayanena ati, “Swililini ku mwinu ni vyuma ivivule, ni viteekwa ivisanduluke, na siluva, na zaabu, nu mukuwa ni vyela, nga ni vyakuzwala ivivule wakwe cimwi. Lyene mwankanye na anyonko asyala ivintu vino mwasampa ku anisi inu.”

⁹ Acino amu mutundu wakwe Lubeni, na wakwe Gadi nga nu mutundu pakasi wakwe Manase iyasya aina Izlaeli pa Syilo mu Kenani kuti yaswilile ku Gileadi, impanga yao, ali kuno iyacita icifulo cao, ukulingana navino Yawe wapile ilamulo ukupitila muli Mose.

Kavuwa mu nkumba yakwe Yodani

¹⁰ Lino yiiza ku Geliloti pipi nu ku Luzi lwa Yodani mu mpanga ya Kenani, amu mutundu wakwe Lubeni, na wakwe Gadi, nga nu mutundu pakasi wakwe Manase iyakuula kavuwa akakulu kuku mumbali ya luzi apasi pafisame.

¹¹ Aina Izlaeli asile iyuvwa ukuti amu mutundu wakwe Lubeni, na wakwe Gadi, nga nu mutundu pakasi wakwe Manase yatiyakuula kavuwa pa mupaka wa Kenani pa Geliloti, pipi nu Luzi lwa Yodani ku mbalama ya ina Izlaeli.

¹² Acino lyene iuvi lyonsi lya ina Izlaeli likongana pa Syilo kuti lipite ku kuyalwisya.

¹³ Caleka aina Izlaeli iyatuma Pineasi umwana wakwe Eleaza, simapepo, kunoyali ku mpanga ya Gileadi kuli Lubeni, Gadi alino nu mutundu pakasi wakwe Manase.

¹⁴ Iyamutuma pamwi ni ntunguluzi ikumi, intunguluzi yonga ukufuma muli cila umba lya mutundu wa ina Izlaeli, nupya iyali ili ntunguluzi ya ng'anda pakasi ka nko zya ina Izlaeli.

¹⁵ Lino yiiza ku Gileadi kuli Lubeni, na Gadi nu ku mutundu pakasi wakwe Manase, iyayanena yati,

¹⁶ “Iuvi lyonsi lyakwe Yawe likuilizyanya iliti, ‘Uzye pacani cino mwacitila ulukota luu, pa kutalamila Yawe Leza wa ina lzlaeli? Uzye ndakai mukasi mute ukulondela Yawe, pa kuikuulila kavuwa kuti mumukane apaswe?

¹⁷ Iusyini iifyo litu lino twacisile pa Peoli, ilyalesile impungo pi uvi lyakwe Yawe! Ukufika na pilelo kwene tutali tuswefiwe kwi iifyo lili.

¹⁸ Uzye lyene ndakai mukufutatila uli Yawe? Ilelo ndi mwasangukila Yawe, ale lyene mutondo alasokela iuvi lyonsi ilya ina Izlaeli.

¹⁹ Ndi mwalola ukuti impanga inu italingine ukupepela mwenemo, icani cino mutange mulambile kunotuli ku mpanga yakwe Yawe ukuli Itaalu lyakwe, nu kwankana impanga kwene ii naswe? Lelo mutaezya ukusangukila Yawe nanti ukulenga sweswe ukuponela mu kwifya ukuli kumwi kwene pa kuikuulila kavuwa kauze ukuluta kakwe Yawe Leza witu.

²⁰ Iusyini vino Akani umwana wakwe Zela wakanyile ukuyela ilamulo ilya pa vintu vino vyapeelwa ku kononwa. Cico calenzile kuti iuvi lyonsi ilya ina Izlaeli livunukwe. Atali aliwe wenga sile uwafwile pamulandu wi iifyo lyakwe.’”

²¹ Lyene aina Lubeni, na amu mutundu wakwe Gadi, nu mutundu pakasi wakwe Manase yaasuka intunguluzi zya miko ya ina Izlaeli yati,

²² “Uwamaka wilya ali Leza! Wene ali Yawe! Wene amanyile cino twacitile cii, nga naswe kwene tukasi kuti mumanye! Ndi cakuti twasangukile Yawe nu kuntaya acumi kunoli, lyene ilelo mutaleka tutwalilile ukuya nu umi.

²³ Ndi cakuti twaikuulile kavuwa pakuti tufutatile Yawe, nanti pakuti apano twapeela amawila yakoca na mawila ya cakulya, nanti kupeelapo amawila ya utandano, ale lyene Yawe umwisikulu atuvunuke.

²⁴ Lelo swemo twacisile cii pamulandu wakusakamala ukuti umu wanda ukwiza amu mupanda winu yangiza yanena amu mupanda witu yati, ‘Pasi icimukumile mwemwe kuli Leza wa ina Izlaeli.

²⁵ Yawe uwacita Luzi lwa Yodani ukuya umupaka pakasi kitu namwe, mwe amu mutundu wakwe Lubeni na wakwe Gadi. Mutakweti icipande cimwi muli Yawe.’ Acino amu mupanda winu yangalenga amu mupanda witu ukuta ukupepa Yawe.

²⁶ Ali cino fwandi twelenginye ukuti katukuule kavuwa, kasi ka mawila yakoca nanti ka kupelelapo impolelwa.

²⁷ Lelo akakwimilila umboni pakasi kakwe sweswe namwe nga na amu mikulo iliza, ukuti swemo tukaapepa Yawe umwi taalu lyakwe tule tukupeela amawila yitu akoca, ni mpolelwa zitu, na mawila itu autandano. Lyene mu manda aliiza amu mupanda winu yatalalanda ku amu mupanda witu yati, ‘Mutakweti icipande cimwi muli Yawe.’

²⁸ “Nga twelenginye ukuti ndi cakuti yene yangaca yalande ci kunotuli, nanti ku amu mupanda witu, lyene tulaasuka tuti, ‘Lolini kavuwa kano ivikolwe vitu vyakuuzile akakoline na kavuwa kakwe Yawe, akasi ka mawila yakoca yonsi nanti aka mpolelwa, lelo aka umboni pakasi kitu namwe.’

²⁹ Cipelele ukutali kuti swemo tusangukile Yawe nu kumufutatila ilelo pa kumukuulila kavuwa ka mawila yakoca, nu kupeelapo amawila ya cakulya ni mpolelwa, ukuluta kupelela pa kavuwa kakwe Yawe kano kali ku nkolelo yi Taalu lyakwe.”

³⁰ Lino simapepo Pineasi nga ni ntunguluzi zi uvi, izyali zili ntunguluzi zya miko ya ina Izlaeli, nupya izyali pamwi na aliwe, zyuvwa ukulanda kwa amu mutundu wakwe Lubeni, na amu mutundu wakwe Gadi nga na amu mutundu wakwe Manase, awe iciyazanzya.

³¹ Pineasi umwana wakwe simapepo Eleaza, avwanga ku amu mutundu wakwe Lubeni, na amu mutundu wakwe Gadi nga na amu mutundu wakwe Manase, ati, “Ilelo twamanya ukuti Yawe ali naswe, pamulandu wakuti mutasangukile Yawe, lelo mwatimukulula aina Izlaeli ku kuvunukwa na Yawe.”

³² Lyene Pineasi umwana wakwe simapepo Eleaza, nga ni ntunguluzi zizi izisya amu mutundu wakwe Lubeni na wakwe Gadi mu Gileadi, iyaswilila ku Kenani ku ina Izlaeli, nga iyayalandila.

³³ Aina Izlaeli iyasansamuka pa kuvwa amazwi yao nga iyalumbanya Leza. Lyene ukufuma lili kwene yatatazile yaye na mapange akuya yalwisya nu kuzanza impanga ukwikalanga amu mutundu wakwe Lubeni na wakwe Gadi.

³⁴ Alino amu mutundu wakwe Lubeni na wakwe Gadi yavwanga yati, “Kavuwa kaa, kalaya umboni pakasi kitu uwakuti Yawe ali Leza.” Nga iyakatemela izina yati, “Umboni.”