Yoswa 20 - Amazwi Yakwe Leza 2013

Misumba iyakuzina mwenemo

¹ Lyene Yawe anena Yoswa ati,

² “Nena aina Izlaeli kuti yasolole imisumba iyakuzina mwenemo, wakwe vino nakunenyile kupitila muli Mose,

³ pakuti umwi ndi wakoma umuntu muze mu uzanzo nupya kusi ku mufulo, wene angutukila kweneko ku kuzina ukufuma kuli kalandula.

⁴ Lino wene utukila ku musumba onga pali iyo, alinzile ukwimilila pa wingililo wa mpongolo ya musumba uwo nu kutula umulandu wakwe inkolelo ya ntunguluzi zya musumba kwene uwo. Alino lyene yalinzile kumuzumilizya ukwingila mu musumba wao nga yamupele incende pa kwikala nayo.

⁵ Ndi cakuti kalandula wamulondelela pacisila, yene yatalinzile kumupeela mu makasa yakwe, pamulandu wakuti wene wakomile umuze kusi ku mufulo nanti ukumupangila.

⁶ Nupya wene angikala mu musumba uwo ukufika lino yalamutwala pa kaungwe ku kupingulwa pa manso yi uvi nupya mpaka sile lino Simapepo Mukulu wino akutumikila pa nsita ilya waca wafwa. Lyene alino umuntu wiyo angaswilila ku musumba wakumwao kuno wutwike.”

⁷ Acino iyapaatula umusumba wa Kedesyi mu Galile mu mpanga ya myamba yakwe Nafutali, nu musumba wa Syekemu mu mpanga ya myamba yakwe Efulemu, nga na Kilyati Aliba (kuli kuti Hebuloni) mu mpanga ya myamba yakwe Yuda.

⁸ Ukulambuka Luzi lwa Yodani lwaku ufumondaka ukufuma mu Yeliko yasolwile imisumba ii: ukufuma mu mutundu wakwe Lubeni, yasolwile umusumba wa Bezeli pa mpanga itumpuke nupya itambalale mu lwanga, nu musumba wa Lamoti mu mpanga ya Gileadi ukufuma mu mutundu wakwe Gadi, nu musumba wa Golani mu Basyani ukufuma mu mutundu wakwe Manase.

⁹ Iyo kwene iyali ili misumba iya kuutukila kweneko umuntu ali wensi, ciye umwina Izlaeli nanti umwinipamba uwakoma umuntu mu uzanzo nupya kusi ku mufulo. Wene angazina nu kupusuka ku makasa yakwe kalandula wa wazi lino yatali yamupingule pa kaungwe pa manso yi uvi.