Yoswa 2 - Amazwi Yakwe Leza 2013

Yoswa watuma inengu ku Yeliko

¹ Lyene Yoswa, umwana wakwe Nuni, mu umfisolo atuma inengu ziili ukufuma ku nkambi yaku Syitimu. Ayapeela ilamulo kuti yaye yakendezye impanga ya Kenani mu umfisolo, makamaka umusumba wa Yeliko. Caleka inengu zizi izipita zizana indo mumu ng'anda yakwe Laabu cizelele.

² Lino umwene uwamu Yeliko uvwa ukuti aina Izlaeli yamwi yatiyiza usiku ku kwendezya impanga,

³ atuma inkombe kuli Laabu ku kumunena ziti, “Fumya aonsi yano yatiyiza ukwako uyalete kuno, pano yene yatiyiza ku kwendezya impanga ii yonsi.”

⁴ Lelo umwanaci wilya walanga watafisa aonsi yalya yaili. Alino avwanga ati, “Icacumi, aonsi yaa yatiyiza kunondi, lelo nemo ntalimanyile kuno yafumile.

⁵ Lino kakuku katola, apipi ni nsita ya kuyala impongolo ya musumba, aonsi yalya iyala iyapita. Ntamanyile ni ntunga ino yalungime, lelo ndi mwapitisya mwayalondelela mungayazana.”

⁶ (Lelo walanga Laabu watatola aonsi yalya nu kuyafisa apilali mu mutumba wakwe fulakisi wino watulike penepo.)

⁷ Acino inkombe zizi izitenuka izilondelelela inengu zizi ku ntunga yi lambwa lya Luzi lwa Yodani, nga lilyo kwene lino zyapita antu yayala impongolo ya musumba.

⁸ Lino inengu zitacili zilale mu usiku ulya, Laabu akwela apilali pano zili,

⁹ nga azinena ati, “Manyile ukuti Yawe watapeela impanga ii kunomuli nu kuti ingofyo izya pali mwemwe zyatizituponela, cakuti umuntu wensi mu mpanga ii akuzakaza ku ntete pamulandu winu.

¹⁰ Tuuvwa vino Yawe wakamizye Yemba Muyenzu pakuti mulambe pa kufuma mu Eguputo. Tuuvwa na vino mwacisile kuli Siooni na Ogi, yamwene yalya yaili ya ina Amoli lwaku ufumondaka wakwe Yodani, yano mwakomile.

¹¹ Lino tuvwile cii, ituya na miiku nga imyenzo itu izakaza ku ntete pamulandu wa kwiza kwinu, pano Yawe Leza winu ali Leza ukwiyulu na pano pansi kwene.

¹² Caleka, ndakai lapini kunondi mwi zina lyakwe Leza ukuti muli nu kulanga uluse ku ang'anda yane wakwe vino nemo namucitile. Mumpeele ni cimanyililo icakusininkizizya

¹³ ukuti mulalanga uluse kuli tata na mayo, nu ku ina yane yakalume na yakaci, nga nu ku aluko lwao yonsi, nu kuti mutalatukoma.”

¹⁴ Alino inengu zizi izimunena iziti, “Swemo twaifima ukufwa pa kupususya umi wako, cikulu sile utanena umwi pali vino tukucita kuno. Lyene lino Yawe alatupeela impanga ii, swemo tulaya acumi kunuli pa kukucitila icisuma.”

¹⁵ Laabu pali pakufumizya inengu zizi api windo, aziisya na pansi ku mwando, pano ing'anda ino wikalanga mwenemo yasemelile ku lung'umba lwi linga lya musumba.

¹⁶ Nga azikonkomezya ati, “Utukilini ku myamba pakuti inkombe zya mwene zitamuzana. Mufisame kuku kwene mpaka amanda yatatu yasuke yapite nupya suka inkombe zizi zikaweluluke. Lyene mungaca mutwalilile pa ulendo winu.”

¹⁷ Alino nazyo izimunena iziti, “Tutalafikilizya umulapo uno wemo walenga kuti tucite

¹⁸ suka sile ndi waca wanyepelela umwando uyenzu ukwi windo, lilya kwene lino waliwatufumizyamo nu kutwisizya pansi. Nupya suka sile ndi ulakonganika so na nyoko, na anyonko yakalume na yakaci, na akazi kako yonsi mu ng'anda yako.

¹⁹ Ndi umwi cilamukumba waca wafumila panzi nu kupita mu misolo, lyene ndi wakomwa ale wailya umwisikulu. Nupya mutaca mutulilile awe. Lelo wensi aalazanwa mu ng'anda pamwi nawe ndi waca wazanzwa, lyene ale twailya sweisikulu!

²⁰ Lelo ndi wanena umwi pali vino tukucita kuno, ale lyene tulasapulwa ku kufikilizya umulapo uno walenzile kuti tucite.”

²¹ Alino Laabu azumilizya ati, “Cilaya ndi vino mwatimuvwanga.” Acino ayanena ukupita pa lwendo lwao nga nayo yapita. Lyene lino yapita asyala anyepelela umwando uyenzu ukwi windo.

²² Inengu nazyo pali pakuya ku myamba akuno zyaya zyafisama pa manda yatatu, mpaka ukufika lino inkombe zizi zyaweluluka ku Yeliko pacisila cakusapika monsi monsi mu kulonda inengu zizi ukwaula ukuzizana.

²³ Alino lyene inengu zizi ziili izitandika ukuswilila mwenemo. Izitentemuka imyamba, iziya zilamba uluzi, ziza kuli Yoswa umwana umonsi wakwe Nuni, nga izimunena vyonsi vino vyacitike kunozili.

²⁴ Inengu zizi izinena Yoswa ziti, “Icumi kwene Yawe watapeela impanga ilya yonsi mu makasa itu. Aikazi yakweneko yonsi yakuizakazila sile ku ntete pamulandu witu.”